תוכן השאלה
לכבוד דער ראש ישיבה שליט"א
איך האב זיך געוואלט שואל עצה זיין איבער א שידוך. איך בין א בעל תשובה פון ארץ ישראל, איך בין דרייסיג יאר אלט, א גרוש אן קינדער. מען טראגט מיר אן א שידוך א דריי און דרייסיג יעריגע מיידל, א בעלת תשובה, זי האט גוטע מדות און יראת שמים, זי איז צניעות'דיג און איז מקושר צום הייליגן רבי'ן.
די מעשה איז אבער אז איך ווייס נישט אויב זי וועט קענען זיין א גוטע ווייב און מאמע, ווייל זי איז נישט מסודר, זי איז נישט מיט די צוויי פיס אויף דער ערד, זי איז זייער אריינגעלייגט אין רוחניות, לערנט אסאך דעם רבינ'ס ספרים, און רוב צייט גייט איר אוועק פאר עבודת ה', איך האב מורא אז זי וועט נישט קענען געהעריג זיך אפגעבן מיט די שטוב ארבעט נאך די חתונה.
מען זעט אויף איר אז זי איז נישט מסודר און מיושב, זי קענען נישט קורץ און שארף צו די זאך, יעדע זאך וואס זי וויל זאגן, ווערט א לאנגע גאנצע מעשה, זי רעדט און רעדט באריכות, און זי שפרינגט פון איין זאך צום אנדערן.
איך ווייס נישט אויב זי וועט קענען אוועקשטעלן גבולים פאר די קינדער, אין די צייט וואס עס איז איר שווער צו שטעלן גבולים פאר זיך אליין.
למעשה זעט אבער אויס ווי מיר קומען זיך אויס, וואס האלט דער ראש ישיבה שליט"א אז ס'איז ריכטיג צו טון?
יישר כח
תשובה מאת הראש ישיבה שליט"א:
יום ה' פרשת שמות, ט"ז טבת, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
אודאי זאלסטו גיין צום שידוך; מידות טובות און יראת שמים דאס איז אויף וואס מען דארף קוקן, אישה יראת ה' היא תתהלל, א פרוי א בעלת תשובה וואס האט א געפיל אין דינען דעם אייבערשטן - איז נישטא עפעס בעסערס; וואלסטו געפרעגט אויב מען זאל מאכן א שידוך מיט א מיידל וואס זיצט אויפן טעלעפאן שעות אויף שעות, דאס איז א פראגע; ווער ווייסט אויב זי וועט וועלן ברענגען קינדער און זיי מגדל זיין מיט תורה ויראת שמים, אבער אז א מיידל ציט זיך צו עבודת השם - איז דאס נאר א מעלה.
דער אייבערשטער זאל העלפן זאלסט חתונה האבן וואס שנעלער און לעבן מיט אהבה אחווה שלום וריעות.