בריוון פונעם ראש ישיבה שליט"א

#2 - די גרויסקייט פון צדיקים וואס פארלירן זיך נישט אפילו בעת צרתם
התחזקות, רענט, חב"ד

בעזרת ה' יתברך


יום ג' פרשת וישב, י"ט כסליו, שנת תשע"ט לפרט קטן


 


לכבוד מיין טייערער ... נרו יאיר.


איך דאנק דיר פארן ארויסהעלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל דיר העלפן אז אין דעם זכות זאלסטו האבן הצלחה אין אלע ענינים.


היינט איז זייער א גרויסער טאג, אינעם היינטיגן טאג איז דער הייליגער בעל התניא זכותו יגן עלינו באפרייט געווארן פון תפיסה.


מוהרא"ש פלעגט אונז שטענדיג דערציילן דעם סיפור פון זיין באפרייאונג; דער הייליגער בעל התניא האט זיך נישט פארלוירן זייענדיג אין תפיסה און איז שטענדיג געווען דבוק צום אייבערשטן, געווען איז דאס בשעת ער האט געזאגט מזמורי תהלים און ווען ער האט געהאלט אינמיטן קאפיטל נה ביי פסוק יט וואס הייבט זיך אן מיט די ווערטער: "פָּדָה בְשָׁלוֹם" איז מען אים געקומען באפרייען פון תפיסה; ער האט דעמאלט מחבר געווען א ניגון אויף די ווערטער "פָּדָה בְשָׁלוֹם" (וואס מען זינגט נאך עד היום אין חב"ד).


זעט מען פון דעם דאס גרויסקייט פון צדיקים, אז אפילו בעת צרתם פארלירן זיי זיך נישט, נאר בלייבן צוגעקלעבט צום אייבערשטן.


איך האב זייער אסאך געוויינט צום אייבערשטן פאר דיר אז דו זאלסט ארויסגיין פון דיין צרה; ברוך ה', ברוך הוא וברוך שמו אז דו ביסט ניצול געווארן פון דיין ביטערע צרה, דארפסטו מאכן א יום טוב להודות ולהלל אויף די חסדים וואס דער אייבערשטער טוט מיט אונז.


שטארק דיר און ווער נישט צעפאלן; דו וועסט נאך זוכה זיין צו דאס וואס שטייט: (חגי ב, ט): "גָּדוֹל יִהְיֶה כְּבוֹד הַבַּיִת הַזֶּה הָאַחֲרוֹן וכו'"; דו וועסט זוכה זיין אויפצושטעלן א שיינע ווארימע ערליכע שטוב בקרוב ממש.


פון דיין ראש ישיבה וואס בעט פאר דיר און האט דיר זייער ליב.


...

#1 - מירון איז א פרייליכע פלאץ
הפצה, רענט, חב"ד, מירון

בעזרת ה' יתברך


יום א' פרשת וישב, י"ז כסליו, שנת תשע"ט לפרט קטן


 


לכבוד מיין טייערער חבר ר' ... נרו יאיר.


איך האב זיך אריבערגעכאפט אויף שבת קיין ארץ ישראל; דעם שבת איז אויסגעפאלן די ערשטע יארצייט פון מיין באבע עליה השלום וועלכע ליגט אין מירון, דערפאר בין איך געפארן מיט מיין ווייב און מיינע דריי עלסטע קינדער צו זיין ביי יארצייט.


אינעם "ספר התולדות" וואס איר האט מיר געשאנקען במתנה האב איך געזען שטיין אז דער פריערדיגער רבי דער ריי"ץ נשמתו עדן, ווען ער איז געווען אין מירון ביים ציון פון רבי שמעון בר יוחאי האט ער זיך אויסגעדרוקט מיט דעם לשון: מירון איז א פרייליכע פלאץ". איך האב זיך דערמאנט פון דעם ווארט פרייטאג צו נאכטס ביים דאווענען אינעם מערה פון רבי שמעון, און איך האב דאס געשפירט.


אינטערעסאנט איז אז ווען דער רבי איז געווען אין מירון ביי זיין נסיעה קיין ארץ ישראל בשנת תקנ"ט איז ער געווען זייער פרייליך; ער האט זיך ארומגעדרייט אין די מערה מיט א מורא'דיגע שמחה (עיין באריכות בשבחי הר"ן, סימן יט; פעולת הצדיק סימן רנט).


א גרויסן דאנק פארן העלפן די ישיבה מיטן געבן פאר די רענט פון דעם חודש ... דאללער; איר ווייסט דאך אביסל וואס די פעולות פון ישיבה טוען אויף. אין חב"ד וואלט איך געווען א שליח, אבער ביי אונז אין ברסלב בין איך א שמש, איך בין משמש דעם רבי'ן. דער אייבערשטער זאל אייך העלפן אז אין דעם זכות זאלט איר זען נחת ביי אייערע קינדער און אייניקלעך.


א ליכטיגן חנוכה.


אייער פריינד.


...