בעזרת ה' יתברך
יום ב' פרשת בהר בחוקותי, י"ז אייר, ל"ב לעומר, שנת תשפ"ג לפרט קטן, אתרא קדישא מירון
לכבוד ... נרו יאיר
היינט נאכט ל"ג בעומר איז זייער א גרויסער טאג, מען קען פועל'ן ישועות; וואו מען געפינט זיך - קען מען פועל'ן ישועות. איך בין געפארן קיין מירון, נאך אביסל גייט מען אנצינדן די הדלקה לכבוד התנא אלוקי רבי שמעון בר יוחאי; דו זאלסט אויך גיין צו אן הדלקה זיך פרייען מיטן גרויסן טאג.
מאך זיך א שיעור אין ספר הזוהר. ווער עס לערנט זוהר, ער זאגט די ווערטער פון זוהר, אפילו אן פארשטיין - הויבט אן זען דאס ליבשאפט וואס דער אייבערשטער האט צו אונז און ווי חשוב יעדע מצוה איז אין הימל, און מען הויבט אן בענקען צום אייבערשטן.
אויך זאלסטו זיך מאכן א שיעור אין תיקוני זוהר, דאס וואשט אפ די נשמה. אויך פאר דיינע זין זאלסטו קויפן א ספר תיקונים און זיי מרגיל זיין אין זאגן תיקונים.
איך האב נעכטן געלערנט תיקון ע' אפאר שעה מיט אפאר חברים תלמידי היכל הקודש אויבן אין די מערה ביי רבי אלעזר בן רבי שמעון. אויך מיין זון דער בר מצוה בחור נחמן נתן - האט אנגעהויבן א שיעור אין תיקונים.
דער אייבערשטער זאל העלפן זאלסט האבן הצלחה אין אלע ענינים.