פתיחת הזמן פונעם ווינטער זמן אין ישיבה

דעם פארגאנגענעם דינסטאג פרשת נח, האט דער ראש ישיבה שליט"א געגעבן די דרשת פתיחת הזמן פאר די בחורים אין ישיבה. דער ראש ישיבה שליט"א האט אויסגעווארט אויף דעם טאג, ווען די בחורים פונעם שטעטל זענען אויך אריינגעקומען אין שטאט מיטצוהאלטן אין ישיבה, כדי מ'זאל קענען געבן די דרשה פאר אלע בחורים אינאיינעם.   דורכאויס די דרשה האט דער ראש ישיבה שליט"א אוו עקגעשטעלט די דריי יסודות פון די ישיבה, און ארויסגעברענגט פאר די בחורים אז אויב זיי וועלן זיך צוהערן און פאלגן די הדרכות, וועלן זיי האבן א גוט און געשמאק לעבן, סיי אויף דער וועלט און סיי אויף יענער וועלט.   אלס ערשטע יסוד, איז די ישיבה אויסגעשטעלט אויף אן אופן אז יעדער איינציגער בחור האט א מהלך וויאזוי צו לערנען תורה. דער הייליגער רבי האט אונז געגעבן א סדר "דרך הלימוד", א וועג צו לערנען דורך זאגן די ווערטער פון די תורה, אפילו אויב מ'פארשטייט נישט וואס מ'זאגט און מ'געדענקט נישט וואס מ'האט געלערנט. אויף דעם וועג קען יעדער איינציגער איד לערנען תורה יעדן טאג, און קיינער קען זיך נישט ארויסדרייען דערפון.   היות פילע בחורים האבן אנגעפרעגט וועלכע שיעורים זיי זאלן לערנען, האט דער ראש ישיבה שליט"א אוועקגעשטעלט פיר יסודות'דיגע שיעורים פאר יעדן בחור; אויב איינער וויל צולייגן נאך שיעורים, זאל ער קומען פרעגן פריוואט.   דער ערשטער שיעור איז חומש רש"י מיט תרגום. מען זאל זיך מאכן א קבוע'דיגן סדר צו לערנען יעדן טאג א שטיקל פון די פרשה, שנים מקרא ואחד תרגום: זונטאג ביז שני, מאנטאג ביז שלישי, און אזוי ווייטער ביזן סוף וואך וועט מען האבן געענדיגט די גאנצע פרשה; מען קען עס שוין ענדיגן אפילו דאנערשטאג. עס וועלן נישט זיין קיין בחינות דערויף און מען גייט קיינעם נישט פארהערן, נאר דער עיקר איז אז יעדער בחור זאל זוכה זיין צו לערנען יעדן טאג אביסל חומש. דאס דארף נישט נעמען מער ווי זיבן מינוט א טאג, און אפילו אויב מען קען נישט די טראפן, קען מען פשוט זאגן די ווערטער.   דער צווייטער שיעור איז משניות. דער ראש ישיבה שליט"א האט געבעטן אז יעדער בחור זאל זיך אנשטרענגען צו לערנען יעדן טאג ח"י (אכצן) פרקים משניות. פאר א מתחיל וועט עס נעמען בערך א שעה, אבער מיט די יארן ווען מען געוואוינט זיך צו, וועט עס נעמען נישט מער ווי א האלבע שעה ביז פערציג מינוט. דער ראש ישיבה שליט"א האט אסאך ארומגערעדט איבער די גרויסקייט פון משניות, און בתוך הדברים אויסגערופן עטליכע סיומים פון בחורים וואס האבן געענדיגט ששה סדרי משנה. אבער אויב א בחור פילט אז ער קען נישט לערנען אכצן פרקים, זאל ער זאגן כאטש אזויפיל וויפיל ער קען.   דער דריטער שיעור איז תהלים: מען זאל פרובירן צו זאגן יעדן טאג דעם יום תהלים און אזוי ארום ענדיגט מען דעם גאנצן ספר תהלים יעדע וואך. דאס דארף צו נעמען בערך צווישן צוואנציג מינוט און א האלבער שעה, און אפילו דא, אויב מ'קען נישט זאגן דעם גאנצן 'יום', זאל מען כאטש זאגן עטליכע קאפיטלעך. דער פערטער שיעור איז גמרא: מען הייבט אן פון מסכת ברכות און מען גייט כסדר ביז מען איז זוכה צו ענדיגן גאנץ ש"ס און מען הייבט עס אן נאכאמאל פונדאסניי.   די צווייטע נקודה פון די ישיבה איז, אז יעדער זאל זיך קובע זיין א צייט יעדן טאג צו רעדן צום אויבערשטן אויף זיין אייגענע שפראך. דאס איז א זאך וואס ס'איז נישט גענוג צו הערן איין מאל, נאר מען דארף יעדן טאג פרישע חיזוק דערויף. קיינער קוקט נישט אויף יענעם; יעדער האט זיך זיין אייגענעם פלאץ און זיין מהלך וויאזוי ער רעדט צום אייבערשטן. איינער גלייכט ענדערש צו גיין אין א שטילע, באהאלטענע פלאץ, א צווייטער גלייכט צו גיין שפאצירן, און אנדערע האבן אנדערע וועגן און פלעצער, אבער יעדער מוז האבן א באשטימטע צייט צו רעדן יעדן טאג צום אויבערשטן, אים דערציילן אלעס וואס ליגט אים אויפ'ן הארץ און אלעס וואס ער דארף. דער ראש ישיבה שליט"א האט ארומגערעדט און געגעבן משלים וואס און וויאזוי מען זאל רעדן צום באשעפער.   די דריטע נקודה אויף וואס די ישיבה איז געבויט, איז זיך צו פרייען מיט דעם וואס מען האט; זיין פרייליך און צופרידן מיט יעדע מצוה און גוטע זאך וואס מען האט זוכה געווען אריינצוכאפן. מען זאל נישט קוקן אויף א צווייטן אז יענער האט מער אדער אז יענער איז בעסער, נאר קוקן אויף יעדע זאך וואס מען אליין פארמאגט: מען האט א קאפל מיט פיאות און א בארד, מען טראגט ציצית, מען היט שבת, מען עסט כשר, און אזוי ווייטער. מען דארף זיך שטארק פרייען מיט יעדע גוטע זאך וואס מען האט, זיך מורא'דיג מחי' זיין דערמיט, און זיין צופרידן מיט זיך אליין.   מיט דעם האט מען אנגעהויבן דעם נייעם זמן אין ישיבה, וואו דער ראש ישיבה שליט"א האט אויסגעפירט אז דאס איז בעצם די גאנצע מהות וואס די ישיבה האט צו פארקויפן. במשך דעם יאר וועט מען מער מרחיב זיין און אויסקלארן אלע נקודות, כדי יעדער זאל זוכה זיין צו לעבן דערמיט און האבן דעם גן עדן אויף דער וועלט און אויף יענער וועלט. עס לוינט זיך אויסצוהערן דעם גאנצן שיעור וואס פארמאגט נאך אסאך שיינע זאכן. דרוקט דא עס צו הערן.   דינסטאג אינדערפרי איז אויך פארגעקומען א ברית אין ישיבה, ווען מו"ה אהרן שלמה שווארץ הי"ו האט געפראוועט א ברית אין ישיבה. ביים סעודת ברית האט דער חשוב'ער זיידע מו"ה יהונתן שווארץ הי"ו אויפגעטרעטן מיט א דרשה פאר די בחורים. עס איז אויך געווען דארט א חשוב'ער גאסט, דער באקאנטער מגיד מישרים מו"ה לייביש ליש שליט"א, וועלכער האט אויפגעטרעטן מיט טרעפליכע דיבורים פאר די בחורים און ארויסגעברענגט זיין התפעלות פון די ערליכקייט און דרך ארץ פון די חשוב'ע תלמידי הישיבה. מען קען הערן די דרשה אויף "קול ברסלב" ביי דעם וועכנטליכן "ברסלב'ע ברידער" ליל שישי שמועס: דרוקט 1 פאר אידיש, דערנאך 4 פאר שמועסן און אנאליזן, דאן 5 פאר די "ברסלב'ע ברידער", און נומער 195 פאר דעם שמועס פון פרשת נח.   דער זמן האט זיך ברוך ה' אנגעהויבן אויפ'ן רעכטן פוס, סיי אין די ישיבה אין וויליאמסבורג, סיי אינעם שטעטל אין ליבערטי, און אזוי אויך אין ארץ ישראל; און מיט'ן אייבערשטנ'ס הילף וועט מען ווייטער ממשיך זיין מיט א שטארקייט אויף ווייטער, צו מאכן א נחת רוח פאר'ן הייליגן באשעפער.

< זעה מער יב חשון תשפ"ז 📝

הערליכע הכנסת ספר תורה דורכ'ן חשוב'ן דיין שליט"א דעם חול המועד

  מ'האלט שוין היבש נאכן פרייליכן און געשמאקן יום טוב סוכות, אבער עס ליגט נאך אלץ טיף אין די ביינער די געהויבענע און הערליכע שמחת הכנסת ספר תורה וואס איז אפגעראכטן געווארן דעם צווייטן טאג חול המועד אינעם שטעטל, וועלכע איז אריינגעגעבן געווארן דורכן חשובן דיין פונעם שטעטל, הרה"ג מו"ה יונה זינגער שליט"א.   די סיום כתיבת האותיות איז שוין אפגעראכטן געווארן נאך פאר יום טוב, איין טאג אין בארא פארק און איין טאג אינעם שטעטל. עס האבן זיך באטייליגט און אריינגעשריבן אותיות דער ראש ישיבה שליט"א, כ"ק אדמו"ר מבאבוב-45 שליט"א, הגה"צ קארלסבורגער רב שליט"א, און הגה"צ דומ"ץ סאטמאר לב אהרן שליט"א פון בארא פארק, אינאיינעם מיט נאך פילע חשוב'ע רבנים און אידן.   צום באשטימטן צייט דינסטאג חול המועד האט זיך דאס גאנצע שטעטל צוזאמגענומען, אנשים נשים וטף, אינאיינעם מיט א גרויסן עולם געסט וואס זענען געקומען צו פארן פון דערווייטנס, קרובים וידידים פונעם דיין שליט"א און פילע אנשי שלומינו. אלע האבן זיך פארזאמלט ביים הויז פונעם דיין שליט"א אין שטעטל, פון וואו מען איז ארויסגעגאנגען בתופים ובמחולות מיט פייערדיגע טענץ און געזאנג, אנגעפירט דורך די חשוב'ע און טאלאנטפולע שפילער און זינגער פון אנשי שלומינו. מען האט געטאנצן לעבעדיג דעם גאנצן וועג ביז צום בית המדרש אויף האשקי, וואו מען איז ארויסגעקומען מיט די ספרי תורה פון שול מקבל פנים צו זיין דעם נייעם ספר תורה. דאן איז דער נייער ספר תורה אריינגעפירט געווארן אין בית המדרש, וואו מ'האט ווייטער געטאנצן מיט א גרויסע שמחה און התרגשות פאר א לאנגע צייט לכבודה של תורה.   דער דיין שליט"א האט מיט גרויס התרגשות געמאכט די ברכת שהחיינו אויפ'ן נייעם ספר תורה, און פארגעזאגט דעם קאפיטל "לדוד מזמור" בשעת מ'האט אריינגעלייגט דעם ספר תורה אינעם ארון הקודש.   די סעודה איז אפגעראכטן געווארן אינעם גרויסן סוכה פונעם בית המדרש, וואו די באטייליגטע האבן זיך געקוויקט מיט א רייכע סעודה כיד המלך. עס האט אויפגעטרעטן מיט שיינע דברי ברכה דער שווער פונעם דיין שליט"א, הרה"ח ר' שמחה פנחס שטראהלי שליט"א, משב"ק אדמו"רי באבוב. ער האט געעפנט זיין דרשה מיט די הייליגע ווערטער פונעם רבי'ן אין ספר המדות: "על ידי דיינים כשרים, התורה חביבה בעולם", וואס דאס קומט אריין זייער פאסיג צום יעצטיגן מאמענט ווען דער חשוב'ער דיין האט אריינגעגעבן א ספר תורה. ער האט ארויסגעברענגט אז דאס איז א "שמחה משולשת": די שמחה פונעם הכנסת ספר תורה, אינאיינעם מיט דעם פרייליכן יום טוב סוכות - זמן שמחתינו, און די שמחת בית השואבה. ער האט ווייטער ממשיך געווען מיט שיינע טרעפליכע דיבורים, און האט מסיים געווען מיט חרוזים פונעם זיידן דער הייליגער חתם סופר זי"ע, וואס דער חתם סופר האט מחבר געווען טאקע לכבוד אן הכנסת ספר תורה וואס ער האט אריינגעגעבן אום חול המועד סוכות.   דערנאך האט מען געהערט שיינע דיבורים פונעם דיין שליט"א, וועלכער האט ארומגערעדט איבערן הייליגן יום טוב סוכות און איבערן ענין פון הכנסת ספר תורה. דער דיין האט געדאנקט דעם אייבערשטן אויף די גרויסע זכיה פון קענען שרייבן א ספר תורה, און אויף די זכיה צו קענען מרביץ תורה זיין פאר אידן.   דערנאך האט מען געהערט דברות קודש פונעם ראש ישיבה שליט"א. ער האט ארויסגעברענגט אז יעצט, ווען מיר האלטן ביים מסיים זיין און נאכאמאל אנהויבן די הייליגע תורה אום שמחת תורה, איז דאס די מערסטע פאסיגע צייט אריינצוגעבן א ספר תורה. ער האט אויך מעורר געווען זיך צו שטארקן אין די מצוה פון מעביר סדרה זיין יעדע וואך. דער ראש ישיבה שליט"א האט מאריך געווען איבער די גרויסקייט און די סגולות וואס ליגן אין די מצוה, און דערמאנט דאס וואס מוהרא"ש פלעגט כסדר זאגן, אז א מענטש דארף מאכן א חשבון ביי זיך אויב ער טוט טאקע די מצוה יעדע וואך.   די סיבה פארוואס מענטשן זענען זיך אמאל מתרשל איז ווייל נישט יעדער קען דאס באווייזן אום פרייטאג; דעריבער דארף מען וויסן אז לויטן שלחן ערוך קען מען איינטיילן די פרשה במשך די גאנצע וואך. אויב מען לערנט יעדן טאג א שטיקל שנים מקרא ואחד תרגום – וואס נעמט אינסעגזאמט נאר ארום זעקס-זיבן מינוט א טאג – קען מען גרינג ענדיגן יעדע וואך די גאנצע פרשה און זוכה זיין צו אלעס גוטס.   דער ראש ישיבה שליט"א האט מיט פייערדיגע דיבורים ארויסגעברענגט די געוואלדיגע חשיבות פון לערנען תורה, ער האט ארויסגעברענגט אז דאס איז די איינציגסטע זאך וואס קען מאכן א מענטש באמת צופרידן און נאר דאס זעטיגט אן די נשמה. מ'דארף נישט מאכן קיין איבעריגע חשבונות וואו מ'האלט אויף דער וועלט; אפילו אויב מ'איז פארפארן אדער ארויסגעפאלן פון די קבועה'דיגע שיעורים, קען מען אלעמאל אנהייבן פון דאסניי. מ'זאל פשוט נעמען א חומש, א משניות, א תהלים, אדער א גמרא, און געבן אביסל "עסן" פאר'ן נשמה.   דער ראש ישיבה שליט"א האט אויך ארויסגעברענגט די גרויסע זכיה פונעם דיין שליט"א, וואס האט זיך אוועקגעגעבן און איז געקומען וואוינען אינעם שטעטל מיט'ן איינציגן ציל צו קענען ענטפערן שאלות פאר די תושבים, אריינבלאזן א פרישע חיות אין יעדן אינגערמאן, אנפירן מיט'ן ארטיגן כולל, און נאך פילע גוטע זאכן וואס דער דיין טוט כסדר לטובת הקהילה.   דער ראש ישיבה האט אויסגעפירט מיט ווארעמע ברכות פאר'ן דיין שליט"א, פאר זיין חשוב'ע משפחה, און פאר'ן גאנצן עולם. די געהויבענע און הערליכע הכנסת ספר תורה וועט בלייבן איינגעקריצט אין די ביינער פאר א לאנגע צייט.

< זעה מער ג חשון תשפ"ז 📝