בעזרת ה' יתברך

יום ג' פרשת בהעלותך (שלח בא"י), י"ז סיון, שנת תשפ"ו לפרט קטן

... נרו יאיר

מזל טוב, מזל טוב! דער אייבערשטער זאל העלפן דו זאלסט זען ערליכע אידישע נחת ביי דעם קינד און ביי אלע קינדער אינאיינעם מיט דיין ווייב געזונטערהייט.

זייער א שיינע מעשה וואס דו דערציילסט, אז דו האסט גע'חזר'ט דעם רבינ'ס ווערטער וואס ער זאגט (שיחות הר"ן, סימן קכב), אז מען דארף אויסווארטן ביז דער אייבערשטער געבט די ישועה און נישט ווערן צעדריקט פון וועלן שוין גלייך זען די ישועה, נאר ווארטן און ווארטן ביז דער אייבערשטער וועט העלפן; דו שרייבסט אז דאס האסטו גע'חזר'ט און גע'חזר'ט, און יעצט גייסטו צו די חתונה פון דיין קינד אן קיין איין פרוטה חובות; דאס איז אן אפענע מופת פון רבי'ן.

מוהרנ"ת דערציילט (שיחות הר"ן, סימן רמט): "וְעִקַּר הַחִדּוּשִׁים וְהַמּוֹפְתִים הַנּוֹרָאִים שֶׁרָאִינוּ מִמֶּנּוּ ז"ל, הוּא רַק בְּעִנְיַן הִתְקָרְבוּת יִשְׂרָאֵל לַאֲבִיהֶם שֶׁבַּשָּׁמַיִם", דער עיקר מופתים וואס מיר האבן געזען ביים הייליגן רבי'ן איז געווען נאר אינעם ענין פון מקרב זיין אידישע קינדער צום הייליגן באשעפער, אז יעדעס מאל ווען איינער איז געקומען צום רבי'ן און אנגעהויבן הערן דעם רבינ'ס שמועסן, דעם רבינ'ס חיזוק - איז ער געווארן איבערגעדרייט אינגאנצן, ער האט באקומען א שטארקע אמונה און געווארן א גרויסער ערליכער איד; און דאס זעט מען נאך ביז היינט, ווער עס איז זיך מתקרב צום רבי'ן און לערנט דעם רבינ'ס ספרים - ווערט אן ערליכער איד, מען ווערט אנגעפילט מיט אמונה, מיט שמחה, מיט דביקות צום אייבערשטן, אזוי ווי דער רבי זאגט (חיי מוהר"ן, סימן שנח): "מיט יעדע שמועס וואס איך שמועס מיט ענק קען מען זוכה זיין צו זיין אן ערליכער איד, און אפילו א צדיק גמור א גאנץ לעבן - אן ערליכער איד אזוי ווי איך מיין אן ערליכער איד"; נאך האט דער רבי געזאגט (שם, סימן שכ): "ווער עס וועט מיך פאלגן און טון אלעס וואס איך הייס, וועט זיכער ווערן א גרויסער צדיק - זאל עס זיין ווער עס זאל נאר זיין".

דערצייל פאר אלע דיינע חברים די מופת, מענטשן דארפן אסאך חיזוק אין דעם ענין, ספעציעל די וואס מאכן חתונה ווערן זייער צעדריקט פון די גרויסע הוצאות, און מען דארף אסאך חיזוק צו האבן אמונה, גלייבן אינעם אייבערשטן אז ער וועט העלפן, און האבן אסאך סבלנות אויס צו ווארטן די ישועה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת נשא ב' (בהעלותך בא"י), י"א סיון, שנת תשפ"ו לפרט קטן

לכבוד מיין ליבער טייערער ... נרו יאיר

איך וויל דיר פרעגן, וואס וואלסטו געטון ווען דו גייסט אין גאס און דו פאלסט אראפ? אודאי וואלסטו זיך אויפגעהויבן, און וואס וואלסטו געטון ווען דו הייבסט זיך אויף און שפעטער פאלסט נאכאמאל אראפ? אודאי וואלסטו נישט געבליבן ליגן אויף דער ערד, אודאי וואלסטו זיך נאכאמאל אויפגעהויבן; יעצט וויל איך דיר פרעגן, וואס טוסטו אז נאכן נאכאמאל זיך אויפהייבן ביסטו נאכאמאל אראפגעפאלן? וועסטו ענטפערן: "עד כאן, דאס איז עס, גענוג געווען מיטן זיך אויפהייבן, איך בלייב שוין ליגן אין די בלאטע, עס איז נישט קיין עסק נאכאמאל און נאכאמאל זיך אויפהייבן"? קיינער וואלט נישט אזוי געזאגט, קיינער וואלט נישט געבליבן ליגן אפילו מען איז שוין געפאלן כמה וכמה פעמים.

יעצט ליבער ברודער ווען עס רעדט זיך איבער פאלן אין עבירות, אז מען איז ליידער אראפגעפאלן אין אן עבירה - איז דאס נישט קיין תירוץ אדער א באווייז אז מען קען נישט מער זיין גוט, מען קען מער נישט מצליח זיין אין עבודת השם; וואס האט צו טון וויפיל מאל מען איז געפאלן און וויפיל מאל מען האט שוין אנגעהויבן און וויפיל מאל מען האט אויפגעגעבן? ווער דארף דאס בכלל ציילן? ווער דארף דאס בכלל וויסן? אז מען פאלט - הייבט מען זיך אויף, און אז מען פאלט נאכאמאל - הייבט מען זיך נאכאמאל אויף, און אזוי איז די גאנצע לעבן; מען פאלט און מען פאלט - און מען הייבט זיך אויף, מען פאלט און מען פאלט - און מען הייבט זיך אויף.

דאס ווייסטו אודאי ווי אזוי מען הייבט זיך אויף, מען הייבט זיך אויף דורך גיין צום אייבערשטן, דורך דערציילן דעם אייבערשטן ווי שטארק מען וויל זיין גוט און ווי שווער עס גייט. ליבער ברודער, זיכער יעצט ווען מיר האבן זוכה געווען צו וויסן פון הייליגן רבינ'ס עצה פון זיך מתבודד זיין, זיך אויסגיסן דאס הארץ פארן אייבערשטן, אים דערציילן ווי שטארק מען וויל זיין גוט און ווי שווער עס איז; דער הייליגער רבי האט אונז מגלה געווען די מעלה און דאס גרויסקייט ווען א מענטש וואס פאלט אראפ אין נישט גוטע זאכן, ער איז נכשל געווארן אין פגם הברית רחמנא לצלן, ווען דער מענטש הייבט זיך אויף און קומט צום אייבערשטן מיט א טענה: "רבונו של עולם וואס וועט דא זיין? איך וויל דאך אזוי שטארק זיין גוט און ערליך, און איך האלט אין איין פאלן, איך וויל אזוי שטארק מער נישט פוגם זיין, אבער נאכדעם פאל איך אראפ נאכאמאל, וואס טו איך? וואס איז מיין עצה? צו וועם זאל איך מיך ווענדן?" דאן ווערט א רעש און א טומל אין הימל, אלע מקטריגים אנטלויפן, און ער נעמט אראפ פון זיך אלע דינים.

מען קען זיך גארנישט פארשטעלן דאס גרויסקייט פון זיך אויסגיסן דאס הארץ פארן אייבערשטן, דער הייליגער זוהר זאגט (בלק, קצה.), אלע מלאכים קומען און פרעגן: "וואס זענען זיינע טענות? מיר ווילן אים דן זיין", זאגט דער אייבערשטער: "לֹא בָּעִינָא הָכָא בֵּי דִינָא דִיְדוּנוּן בֵּינָנָא", איך וויל נישט ענק זאלן זיך אריינמישן, "אֲנָא וְהוּא בִּלְחוֹדָנָא", איך וויל זיין אליינס מיט דעם מענטש, איך וויל אים דן זיין, איך וויל ער זאל נאר צו מיר זיך אויסוויינען, "וְלֵית תֵּיאוּבְתָּא לְקוּדְשָׁא בְּרִיךְ הוּא אֶלָּא כַּד מְקַבֵּל לוֹן וְאוֹשְׁדוּ קַמֵּיהּ", דער אייבערשטער האט נישט קיין גרעסערע פארגעניגן ווי ווען א מענטש וויינט זיך אויס פאר אים, "דְּהָא כָּל נִטוּרֵי תַּרְעִין לֹא שַׁבְקִין הָכִי לְמֵיְעַל כַּמָה דְשַׁבְקִין לְמִסְכְּנִין", אלע טירן פון הימל זענען אפן פאר א צעבראכענעם מענטש וואס וויינט זיך אויס צום אייבערשטן, "דְּהָא בְּלֹא רְשׁוּתָא עָאֳלִין", און זיינע תפילות גייען ארויף אן קיין רשות; דאס הייסט, ווען א מענטש גייט אין א ווינקל וואו קיינער איז נישט דארט, ער רעדט זיך אויס זיין הארץ צום אייבערשטן און ער פארציילט אים אלעס - די תפילות גייען גלייך ארויף צום אייבערשטן און דער אייבערשטער ענטפערט פארן צעבראכענעם הארץ שנעלער ווי ער ענטפערט פאר דעם גרעסטן צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת נשא ב' (בהעלותך בא"י), י"א סיון, שנת תשפ"ו לפרט קטן

...

איך האב ערהאלטן די בריוו.

דיינע שלעכטע מחשבות קומען פון דיין עצבות, ווען מען איז בעצבות קומען שלעכטע מחשבות און מען קען זיי נישט פארטרייבן, ווייל די עצבות און מרה שחורה געבט כח פאר די שלעכטע מחשבות.

שטארק זיך, זיי פרייליך, טראכט פון פאזעטיווע זאכן, טראכט פונעם אייבערשטן, און ווען דו גייסט אין גאס זאלסטו טראכטן ווי גוט דער אייבערשטער איז צו דיר; דו האסט געזונטע פיס צו גיין, דו האסט אזויפיל גוטע זאכן; דעמאלט וועסטו קענען זיין בעל הבית אויף דיינע מחשבות, אזוי ווי דער הייליגער זוהר זאגט (תיקון כב, דף סז.): "וְאַתְוָון בְּשִׂמְחָ"ה אִיהִי מַחֲשָׁבָ"ה", 'מחשבה' איז די אותיות 'בשמחה'; דורך זיין פרייליך האט מען גוטע מחשבות, פאזעטיווע מחשבות.

ווארף אוועק די מרה שחורה, ווארף אוועק די עצבות, זוך אין דיר א גוטע זאך, זוך נקודות טובות. דער הייליגער רבי זאגט (לקוטי מוהר"ן חלק ב, סימן י'), פארוואס זענען מענטשן אזוי געפאלן ביי זיך און זענען נישט נאנט צום אייבערשטן? ווייל מען האט נישט קיין ישוב הדעת - מען טראכט נישט פון תכלית, און פארוואס האבן מענטשן נישט קיין ישוב הדעת? ווייל מען איז נישט פרייליך, און ווען מען איז נישט פרייליך איז שווער צו קענען טראכטן נארמאל, מען קען נישט טראכטן גוט, די קאפ לויפט נעגעטיוו, "רַק עַל יְדֵי הַשִּׂמְחָה יוּכַל לְהַנְהִיג הַמֹּחַ כִּרְצוֹנוֹ, וְיוּכַל לְיַשֵּׁב דַּעְתּוֹ, כִּי שִׂמְחָה הוּא עוֹלָם הַחֵרוּת", אבער ווען מען איז פרייליך, זענען די מחשבות מסודר און מיושב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת נשא א', ראש חודש סיון, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

זאגן זוהר איז פאר אלעמען, אויך פאר יונגע; זאגן זוהר איז נישט קיין שרעקעדיגע זאך, זאגן זוהר איז א הייליגע זאך, מען ווערן אויסגערייניגט און אויסגעאיידלט. דער הייליגער רבי זאגט (שיחות הר"ן, סימן קח): "יָדוּעַ שֶׁלִּמּוּד הַזֹּהַר", לערנען זוהר "מְסֻגָּל מְאֹד מְאֹד", איז זייער מסוגל פאר די נשמה, "וְדַע שֶׁעַל יְדֵי לִמּוּד הַזֹּהַר נַעֲשֶׂה חֵשֶׁק לְכָל מִינֵי לִמּוּדָם שֶׁל הַתּוֹרָה הַקְּדוֹשָׁה", דורך לערנען דעם הייליגן זוהר באקומט מען א שטארקע גליסטעניש צו לערנען אלע ספרים פון די הייליגע תורה.

זאג יעדן טאג זוהר, דאס וועט דיר אויסרייניגן דיין נפש, רוח און נשמה. דער הייליגער אריז"ל האט געגעבן א תיקון פאר א בעל תשובה ער זאל יעדן טאג לערנען פינף בלעטער תיקוני זוהר, אז דאס וועט אים מתקן זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת נשא א', ראש חודש סיון, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

די גאנצע זאך פון שידוכים איז פארהוילן פון אלעמען, מען ווייסט נישט ווען, מיט וועם וכו' וכו', שידוכים ליגט נאר אין דעם אייבערשטנ'ס הענט. אזוי ווי חכמינו זכרונם לברכה זאגן (בראשית רבה סח, ג): "מָצִינוּ בַּתּוֹרָה בַּנְּבִיאִים וּבַכְּתוּבִים שֶׁאֵין זִוּוּגוֹ שֶׁל אִישׁ אֶלָּא מִן הַקָדוֹשׁ בָּרוּךְ הוּא", מיר געפינען אין די תורה, אין נביאים און אין כתובים אז א שידוך האט נאר מיטן אייבערשטן, אין די תורה שטייט (בראשית כד, נ): "וַיַּעַן לָבָן וּבְתוּאֵל, וַיֹּאמְרוּ, מֵה' יָצָא הַדָּבָר", אין נביאים שטייט (שופטים יד, ד): "וְאָבִיו וְאִמּוֹ לֹא יָדְעוּ כִּי מֵה' הִיא", און אין כתובים שטייט (משלי יט, יד): "בַּיִת וָהוֹן נַחֲלַת אָבוֹת, וּמֵה' אִשָּׁה מַשְׂכָּלֶת", זעען מיר איבעראל אז א שידוך האט נאר מיטן באשעפער.

עס איז דא א זאך וואס טוט אפהאלטן די שידוך; אז מען היט נישט די אויגן, מען איז פוגם בברית - דאס טוט אפהאלטן די שידוך, און אויך נאך די חתונה, אויב מען פירט זיך נישט ערליך - פארלירט מען די שלום בית. איך בעט דיר זייער, היט דיינע אויגן, אין דעם זכות וואס דו וועסט היטן דיינע אויגן - וועסטו טרעפן דיין שידוך. ווייל דער רבי זאגט (לקוטי מוהר"ן חלק ב, סימן פז), ווען א מענטש זינדיגט אין פגם הברית פארלירט ער זיין שידוך, און אפילו ווען מען האט שוין א שידוך, מען איז שוין חתונה געהאט, אויב מען זינדיגט אין פגם הברית - פארלירט מען די שידוך, מען הייבט זיך אן קריגן און מען האט נישט קיין שלום בית; ווידער אז מען טוט תשובה, מען פאררעכט וואס מען האט פוגם געווען, דעמאלט טרעפט מען די שידוך און מען לעבט א גוט לעבן.

אז דו וועסט זיין שטארק נישט צו האבן א טעלעפאן, טעבלעט, וכדומה, וואס מען קען זען אויף דעם עבירות - וועסטו זוכה זיין צו טרעפן דיין שידוך, דו וועסט חתונה האבן און האבן ערליכע דורות, די שכינה וועט רוען ביי דיר אין שטוב.

דער אייבערשטער זאל העלפן זאלסט האבן הצלחה אין אלע ענינים.

ניין, חס ושלום.

די פשוט'ע און די נישט באקוועמע, אז עס זאל נישט ציען צו זיין אויף דעם.

בעזרת ה' יתברך

יום א' פרשת נשא א', ראש חודש סיון, שנת תשפ"ו לפרט קטן

... תחי'

דערציילן דעם אייבערשטן אלעס וואס טוט וויי און האבן קשיות און תרעומות – זענען צוויי באזונדערע זאכן; האבן קשיות אויפן אייבערשטן - דאס טאר מען נישט, און זיך אויסגיסן דאס הארץ פארן אייבערשטן, אים דערציילן אלע ווייטאג - דאס איז זייער הייליג.

עס איז נישט שייך מיר זאלן קענען פארשטיין דעם אייבערשטנ'ס דרכים, דער הייליגער רבי זאגט (לקוטי מוהר"ן חלק ב, סימן נב), דאס וואס עס איז דא קשיות אויפן אייבערשטן - אזוי דארף צו זיין, "וְכָךְ נָאֶה וְיָפֶה לוֹ", און דאס איז די שיינקייט פונעם אייבערשטן, ווייל אויב מיר וואלטן אלעס פארשטאנען וואלט דאך געווען זיין שכל אזוי ווי אונזער שכל - חס ושלום; קומט אויס אז דאס איז די שיינקייט פונעם אייבערשטן, אז מיר פארשטייען אים נישט, אבער דער רבי האט אויסגעפירט: "וואויל איז דעם וואס האט נישט קיין קשיות אויפן אייבערשטן".

זיך אויסגיסן דאס הארץ פארן אייבערשטן דאס מיינט נישט אז מען וועט יעצט געבן מער שלעכטס; דאס איז ווען א מענטש רעדט זיך אפ, ווען מען רעדט זיך אפ - דעמאלט קען מען ברענגען דינים אויף זיך, אויף דעם זאגט מוהרנ"ת אז ווען מען רעדט זיך אפ זאגט מען אין הימל אז מען וועט אים מאכן ער זאל האבן נאך מער אויף וואס זיך אפ צו רעדן, און ווען א מענטש דאנקט דעם אייבערשטן זאגט מען אין הימל אז מען וועט אים ברענגען מער גוטס, ער זאל האבן אויף וואס צו דאנקען; אפרעדן און אויסרעדן – זענען צוויי זאכן, אפרעדן איז עצבות ומרה שחורה, דאס איז די סטרא אחרא, און זיך אויסרעדן, זיך אויסגיסן דאס הארץ - דאס איז די העכסטע מדריגה; מען בעט דעם אייבערשטן ער זאל רחמנות האבן, מען דערציילט אים אלעס וואס גייט אריבער, מען זאגט: "רבונו של עולם איך ווייס אז אלעס איז פאר מיין טובה, איך ווייס אז דו מאכסט נאר גוטס, דאך בעט איך דיר, העלף מיר איך זאל עס קענען דערהייבן און פארנעמען, רבונו של עולם געב מיר א שטארקע אמונה, איך זאל וויסן און געדענקען אז אלעס ביסטו און אלעס איז נאר פאר מיין גוטס" וכו' וכו'.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ה' פרשת במדבר, כ"ז אייר, שנת תשפ"ו לפרט קטן

... תחי', מאנסי

עס איז טאקע א נסיון, ווען מען איז יונג האט מען די שטארקע נסיון צו וועלן אויסזען ווי די שכנים, צייגן גוט פאר די ארומיגע, אבער אז מען איז שטארק נישט נאכצוגיין די גאס, נאר גיין אנגעטון איידל און זיך פירן איידל - באקומט מען זייער אסאך גוטס, מען איז זוכה צו הערליכע שיינע ערליכע דורות. דער הייליגער זאגט (ספר המדות אות בנים, סימן ט), אז מען פירט זיך איידל, מען גייט אנגעטון איידל - איז מען זוכה צו גוטע קינדער.

איך בעט אייך זייער, טוט זיך נישט אן ווי די שכנים, טוט זיך אן אזוי ווי אייער טאטע מאמע ווילן איר זאלט גיין, די גרעסטע און שענסטע זאך איז אז מען פאלגט עלטערן און מען מאכט זיי א נחת רוח; ליידער זענען מיר פארטריבן אין גלות אמעריקע, די אמעריקאנע שיטה איז אז יעדער קען טון וואס זיי ווילן, די עלטערע דארפן געבן כבוד פאר די יוגנט, מיר וואוינען טאקע אין אמעריקע אבער מיר זענען נישט קיין אמעריקאנע, מיר זענען דא ביז משיח וועט אונז אויסלייזן און אהיים נעמען קיין ארץ ישראל; בכן זאלט איר נישט טוישן די שיינע ערליכע אידישע לבוש, גייט נישט מיט קורצע שטרימפ, גייט מיט טייץ, און זייט אזוי פרייליך און געשמאק, אז די שכנים זאלן אייך נאכמאכן, זיי זאלן זאגן פאר זייערע עלטערן 'מיר ווילן זיין איידל, אזוי ווי די שכן'.

געבט א גרוס פאר אייערע עלטערן.

דֶער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום א' פרשת בהר בחקותי, ט"ז אייר, שנת תשפ"ו לפרט קטן

... תחי'

איך האב ערהאלטן אייער בריוו.

איך פריי זיך זייער צו הערן אז איר זאגט תהלים און אז איר האט שוין געזאגט פיר און פערציג מאל ספר תהלים; דער הייליגער רבי זאגט (לקוטי מוהר"ן חלק ב, סימן עג), דורך תהלים ווערט אלעס פארראכטן, און מען באקומט א בענקעניש צום אייבערשטן, מען וויל נאר זיין גוט.

ביי אונז מאכט מען נישט קיין סעודה ביים יום הולדת, און אויך נישט ווען מען ווערט בת מצוה; מוהרא"ש זאגט, די איינציגסטע מאל וואס מען געפינט אין די תורה וועגן א יום הולדת איז ביי פרעה, אזוי ווי עס שטייט (בראשית מ, כ): "יוֹם הֻלֶּדֶת אֶת פַּרְעֹה". מען מאכט נישט קיין עסק פון יום הולדת; אינעם געבורטס טאג דאנקט מען דעם אייבערשטן אז מען האט נאך א יאר די מעגליכקייט אים צו דינען, און מען נעמט זיך פאר גוטע קבלות.

מען פירט זיך אין די טאג וואס מען ווערט בת מצוה, אז די מאמע באקט חלות און מען איז מכבד די טאכטער וואס ווערט יענעם טאג מחיוב מיט מצוות - זאל אפשיידן חלה; די מאמע לערנט אויס די טאכטער די מצוה פון חלה, און ווי אזוי מען זאגט די תפילה וכו'.

נעמט זיך פאר לכבוד אייער בת מצוה איר זאלט זיך נישט ארומדרייען אין שטוב - אפילו פריוואט - אן קיין שטרומפ, נאר ביים שלאפן שלאפט מען אן שטרומפ; צניעות איז די שענסטע זאך וואס אידישע טעכטער האבן, און בזכות צניעות איז מען זוכה צו געראטעוועט ווערן - סיי אויף די וועלט און סיי אויף יענע וועלט - פון אלע שלעכטס.

געבט א גרוס פאר אייערע עלטערן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת אמור, י"א אייר, שנת תשפ"ו לפרט קטן

... תחי'

איך האב ערהאלטן אייער בריוו.

בעטס אייער טאטע זאל אייך נעמען קיין אומאן; דעם רבינ'ס ציון איז אויך פאר פרויען און מיידלעך. פרעגט אייער טאטע, אפשר איין מאל קענט איר פארן מיט אים צום הייליגן רבינ'ס ציון.

ראש השנה איז נישט שייך אז פרויען זאלן קומען, עס איז נישט מעגליך פאר פרויען צו גיין צום ציון, און אויך איז נישט מעגליך צו גיין אין גאס, אין די אלע גאסן וואו צענדליגער טויזנטער מענער קומען צום רבי'ן; אבער דורכן יאר איז גוט אז איר זאלט איין מאל קומען צום רבינ'ס ציון זאגן דארט די תיקון הכללי. ווייל דער הייליגער רבי האט צוגעזאגט (חיי מוהר"ן, סימן רכה), אז ווער עס וועט קומען צו זיין ציון זאגן דעם תיקון הכללי, די צען קאפיטלעך תהילים [קאפיטל טז, לב, מא, מב, נט, עז, צ, קה, קלז, קנ] און געבן א פרוטה לצדקה פאר זיין זכות, אפילו ער האט געטון די הארבסטע עבירות: "וועל איך מיך לייגן אויף די לענג און אויף די ברייט אים א טובה צו טון, ביי די פיאות וועל איך אים ארויסציען פון שאול תחתית".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת אמור, י"א אייר, שנת תשפ"ו לפרט קטן

... תחי'

איך האב ערהאלטן אייער בריוו.

עס איז גוט צו בלייבן מיט די לבוש ווי אזוי די מאמע גייט; יעצט ווען מען איז יונג וויל מען מאכן ווי די חברט'עס, אבער ריכטיג איז - זיך פירן ווי די מאמע פירט זיך; וואס וועט זיין ווען איר וועט חתונה האבן און אייערע קינדער וועלן נישט וועלן גיין ווי אייך, זיי וועלן נאכמאכן זייערע חבר'טעס? וועט דאס אייך נישט זיין איינגענעם.

שמועסט עס אויס מיט אייער מאמע, און ווי אזוי די מאמע זאגט איר זאלט טון - אזוי זאלט איר טון. די תורה זאגט (משלי א, ח): "וְאַל תִּטֹּשׁ תּוֹרַת אִמֶּךָ", דו זאלסט נישט אפלאזן די וועגן וואס דיין מאמע לערנט מיט דיר; אז מען גייט ווי די מאמע וויל מען זאל גיין - דערלייגט מען נישט.

בעטס דעם אייבערשטן יעדן טאג די תפילה:

"הייליגער באשעפער העלף מיר איך זאל האבן ערליכע חבר'טעס, איך זאל ליב האבן צו גיין אנגעטון מיט אידישע קליידער, איך זאל ליב האבן צו גיין אנגעטון שבת מיט שבת קליידער, איך זאל נישט אראפקוקן די אידישע וועג, די ערליכע וועג, הייליגער באשעפער העלף מיר אז איך און מיינע דורות זאלן זיין ערליך, מיר זאלן נישט אוועק גיין פון די וועג ווי אזוי אונזערע עלטערן זענען געגאנגען, ווייל נאר אין די זכות פון גיין אנגעטון אידיש - זענען מיר אויסגעלייזט געווארן פון גלות מצרים, אזוי ווי חכמינו זכרונם לברכה זאגן (במדבר רבה יג, כ), אידישע קינדער זענען אויסגעלייזט געווארן פון מצרים אין די זכות וואס זיי האבן אכטונג געגעבן צו רעדן א אידישע שפראך, האבן אידישע נעמען און זיך אנטון אידיש"; אזוי זאלט איר בעטן דעם אייבערשטן, ביז איר וועט אנהייבן ליב האבן די וועג ווי אזוי מען גייט שבת וכו'.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת אמור, י"א אייר, שנת תשפ"ו לפרט קטן

... תחי'

איך האב ערהאלטן אייער בריוו.

נעמט זיך פאר ווען איר גייט שלאפן זיך אנצוגרייטן נעגל וואסער, און אינדערפרי זאלט איר נישט אראפטרעטן פון בעט אן אפגיסן נעגל וואסער; אז מען גיסט אפ נעגל וואסער גייען אוועק פונעם מענטש אלע קליפות און מזיקים, דער מענטש באקומט א שמירה עליונה. און אויב חס ושלום מען גיסט נישט אפ נעגל וואסער - איז מען אין א סכנה, אלעס וואס מען כאפט אן ווערט טמא; און די סיבה פארוואס עס איז אייך אזוי שווער די מצוה פון נעגל וואסער, איז ווייל נעגל וואסער איז אזא הייליגע זאך אז די קליפות און שדים האבן זייער מורא פון דעם, דעריבער מאכן זיי עס זאל אויסקוקן שווער, זיי מאכן מען זאל נישט האבן געדולד, מען זאל זיך ארויסדרייען דערפון, מען זאל גיין שלאפן אן נעגל וואסער און אראפגיין פון בעט אן זיך אפגיסן.

אויך זאלט איר זיך שטארקן צו ליינען קריאת שמע יעדע נאכט איידער איר גייט שלאפן; קריאת שמע שעל המיטה היט דעם מענטש, חכמינו זכרונם לברכה זאגן (ברכות ה.), ווער עס ליינט קריאת שמע שעל המיטה - "מַזִיקִין בְּדֵילִין הֵימֶנּוּ", גייען אוועק אלע מזיקים פון אים; נאך זאגן זיי (שם), דער וואס ליינט קריאת שמע פארן שלאפן גיין: "כְּאִילוּ אוֹחֵז חֶרֶב שֶׁל שְׁתֵּי פִּיּוֹת בְּיָדוֹ", איז אזוי ווי ער האלט א שארפע שווערד וואס האט צוויי שארפן, ער פארשניידט אלע קליפות און מזיקים, און מען דארף גארנישט מורא האבן.

ועל כולם זאלט איר זיך מתבודד זיין; בעטס דעם אייבערשטן אין אייער שפראך אז איר זאלט קענען טון מצוות, און אים שטענדיג מאכן א נחת רוח; דאס רעדן צום אייבערשטן קלעבט צו דעם מענטש צום אייבערשטן מען זאל באקומען א שטארקע אמונה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ב' פרשת אמור, י' אייר, שנת תשפ"ו לפרט קטן

לכבוד ... נרו יאיר

וואס זאל איך דיר זאגן? די עבירה פון פוגם זיין בברית איז אזוי געפערליך, עס איז א מחלה ווי אלע מחלות, און אויב מען קען נישט ארויסגיין פון דעם דארף מען גיין צום דאקטער ער זאל פארשרייבן מעדעצין; ווייל די עבירה מאכט דעם מענטש אינגאנצן משוגע. אזוי זאגט דער רבי (לקוטי מוהר"ן חלק א, סימן לו), אז ניאוף מאכט משוגע, און אמאל איז עס אזוי אזוי געפערליך אז עס איז נישט מעגליך ארויסצוגיין פון דעם נאר דורך וכו', עיין שם; אויך זאגט דער רבי (שם, סימן ס), אז די עבירה פון פגם הברית מאכט אז די מח זאל ווערן אויסגעטרוקנט, ביז מען ווערט משוגע.

די עבירה פון פגם הברית איז אזוי שלעכט, עס קילט אפ די אמונה, די עבירה מאכט מען זאל האבן קשיות און ספיקות אויפן אייבערשטן, עס ברענגט מחשבות פון כפירות ואפיקורסות, מען ווערט א דערביטערטער מענטש; ווייל די עבירה מאכט חרוב דעם מענטש, סיי פיזיש; מען ווערט קראנק, און סיי גייסטיש, מענטל; מען ווערט א דערשלאגענער.

זיי זיך מקבל מער נישט צו זינדיגן אין די עבירה, און געוואוין זיך צו צו זאגן די תיקון הכללי, די צען קאפיטלעך תהלים [קאפיטל טז, לב, מא, מב, נט, עז, צ, קה, קלז, קנ], און די תפילה פון רבי נתן, און ועל כולם זיי זיך מתודה פארן אייבערשטן, דערצייל אים וואס דו האסט געטון און וויין זיך אויס צו אים ער זאל דיר מוחל זיין, בעט אים ער זאל רחמנות האבן אויף דיר, ער זאל דיך מקרב זיין צו אים, דו זאלסט מער נישט זינדיגן; דאס זאלסטו טון יעדן טאג, זוך דיר א פלאץ, א שטילע פלאץ, און שמועס אויף דיין אייגענע שפראך, אויף דיין מאמע לשון; דערצייל דעם אייבערשטן ווי שטארק דו ווילסט זיין גוט און ווי שווער עס גייט דיר, ווי דער יצר הרע ווארפט דיך אראפ נאכאמאל און נאכאמאל; דאס וועט אראפנעמען פון דיר אלע דינים, און דער אייבערשטער וועט דיר מוחל זיין.

אויך זאלסטו לערנען יעדן טאג אביסל חומש מיט תרגום פון די פרשה פון די וואך איינגעטיילט לויט די טעג פון די וואך; זונטאג ביז שני, מאנטאג ביז שלישי, און אזוי ווייטער. אויך זאלסטו זיך מאכן א שיעור צו לערנען יעדן טאג משניות און גמרא; אפילו באופן פון זאגן די ווערטער, אן פארשטיין, ווייל דער הייליגער רבי האט געזאגט (שיחות הר"ן, סימן עו): "אין צריכין בלימוד רק האמירה לבד", מען דארף נישט ביים לערנען נאר זאגן די ווערטער, און אזוי קומט מען צו אז מען הייבט אן פארשטיין; דאס איז זייער א גוטע וועג פון לערנען פאר די אלע וואס זינדיגן אין די עבירה און פארלירן זייער מח, די פליסיגקייט פון מח טרוקנט זיך אויס און מען קען זיך נישט קאנצעטרירן, מיט האלטן דאס לערנען, און מיט די דרך הלימוד פון רבי'ן קען מען יא זוכה זיין צו באקומען מח און ווערן אן ערליכער איד, א צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת אמור, י' אייר, שנת תשפ"ו לפרט קטן

... נרו יאיר

וויסן זאלסטו, אז מען היט זיך נישט די אויגן - פארלירט מען די שלום בית; עס שטייט אין פסוק (דברים כג, טו): "וְלֹא יִרְאֶה בְךָ עֶרְוַת דָּבָר וְשָׁב מֵאַחֲרֶיךָ", אז מען קוקט ניאוף, מען איז מפקיר די אויגן - גייט די שכינה אוועק פונעם מענטש, און דאס איז די זאך וואס די ווייב פארלירט פלוצלונג די גאנצע חן; עס איז נישט די ווייב, זי איז נאר די שפיגעלע פונעם מאן.

טו תשובה און זיי זיך מקבל צו היטן די אויגן, וועט דיין ווייב צוריק באקומען איר חן אין דיינע אויגן. מוהרא"ש ברענגט בשם דער צדיק רבי מרדכי מלעכעוויטש זכותו יגן עלינו, עס שטייט (צפניה ג, כ): "בְּשׁוּבִי אֶת שְׁבוּתֵיכֶם, לְעֵינֵיכֶם", טייטשט ער, די ערשטע זאך ווען א מענטש וויל תשובה טון, זאל מען תשובה טון אויף וואס מען האט געזינדיגט מיט די אויגן, און די חן און ליבאשפט אין שטוב וועט ווערן שטערקער און בעסער; "כלה שעיניה יפות", א איד וואס די אויגן זענען אים ריין און שיין - איז דאס א סימן אז אלעס איז גוט (תענית כד.).

מאך זיך א שיעור אין משניות און גמרא, די תורה ברענגט חן, אזוי ווי חכמינו זכרונם לברכה זאגן (כתובות עז:) אויפן פסוק (משלי ה, יט): "אַיֶּלֶת אֲהָבִים וְיַעֲלַת חֵן", און זיי מתפלל, בעט אז די שכינה זאל זיך צוריק קערן אין שטוב, וועט זיין חן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת אחרי קדושים, ו' אייר, שנת תשפ"ו לפרט קטן

מרת ... תחי'

קינדער דארף מען מחנך זיין זיי זאלן רעדן איידל, און ווען מען זאגט 'מחנך זיין' מיינט דאס נישט איינמאל זאגן, דאס מיינט זאגן אן אויפהער, ביז די קינדער ווערן מחונך; מען דארף זאגן און זאגן, און אמאל זאגט מען שטרענגער, אמאל ווייכער, אמאל באלוינט מען און אמאל באשטראפט מען; אזוי ארבעט עס מיט חינוך.

ספעציעל דארף מען זייער שטארק לערנען די קינדער זיי זאלן רעדן איידל, נישט ניצן די ווערטער ווי 'גולם', 'שוטה', 'משוגע'נער' וכו', מען דערציילט פאר די קינדער מעשיות פון רעדן איידל. די הייליגע חכמים דערציילן (פסחים ג:), מען האט געהערט א כהן רעדט נישט איידל, האט מען פארשטאנען אז עפעס איז מיט זיין יחוס, מען האט בודק געווען און מען האט געזען אז ער איז נישט קיין כשר'ער כהן, און א צווייטע מעשה, אז דער הייליגער רבי יוחנן האט געהערט ווי צוויי פון זיינע תלמידים שמועסן, איינער האט גערעדט זייער איידל, האט ער געזאגט: "איך בין זיכער אז ער וועט אויסוואקסן א דיין", נאך א מעשה, רב האט געהערט ווי איינער פון די תלמידים רעדן נישט אזוי איידל, ער האט געזאגט: "איך בין אזוי אויסגעמוטשעט ווי אן אויסגעמוטשעטע דבר אחר", און רב האט נישט גערעדט מיט אים פאר גאנצע דרייסיג טעג; מען דארף מחנך זיין קינדער צו רעדן איידל און הייליג, און זיכער נישט רעדן מיאוס'ע ווערטער, ווייל נאר אז מען רעדט איידל - איז מען הייליג, און דאס איז די שפראך לשון הקודש; נישטא קיין מיאוס'ע ווערטער אין די שפראך, אלעס איז זייער איידל און הייליג.

אייער מאן זאלט איר נישט מחנך זיין, אייער מאן זאלט איר מכבד זיין, און אז ער טוט נישט ריכטיג, ער שרייט אויף די קינדער לשונות וכו' - זאלט איר נישט זיין קיין נאר און גיסן אויל צום פייער, אים מער אויפרעגן; א מאן איז מען מכבד, נישט מחנך, א מאן בויט מען אויף.

דער אייבערשטער זאל העלפן איר זאלט האבן הצלחה אין אלע ענינים.

וואס איז בכלל די פראגע? אודאי פארן דורך די ריינע וועג.

דער עיקר מיט גוטע חברים, מיט יראת שמים, מיט תמימות.

יא.

בעזרת ה' יתברך

יום ב' פרשת צו, ה' ניסן, שנת תשפ"ו לפרט קטן

... נרו יאיר

וואויל איז דיר אז דו ביסט מחנך דיינע קינדער, עס שטייט (משלי כט, יז): "יַסֵּר בִּנְךָ", שטראף דיין זון, "וִינִיחֶךָ", וועט ער דיר ברענגען נחת, "וְיִתֵּן מַעֲדַנִּים לְנַפְשֶׁךָ", ער וועט דיך פרייליך מאכן, ער וועט זיך אויפירן גוט.

אז מען זאגט פארן קינד צו גיין שלאפן און ער הייבט אן וויינען, אדער ער בעט א נאש און די עלטערן פארשטייען אים נישט צו געבן און דער קינד הייבט אן פארפירן - טאר מען נישט ווערן דערשראקן און פארלוירן, מען בלייבט שטארק מיט וואס מען האט געזאגט. מען לערנט אויס צו פאלגן ביז די קינדער ווערן מחונך צו פאלגן און צו וויסן אז נישט אלעס וואס מען וויל - באקומט מען.

העיקר איז תפילה, בעט יעדן טאג דעם אייבערשטן פאר אלע קינדער זיי זאלן אויסוואקסן ערליך, הייליג און געזונט. מען האט געפרעגט דעם הייליגן חתם סופר זכותו יגן עלינו ווי אזוי ער האט זוכה געווען צו אזעלכע גוטע קינדער, האט דער הייליגער חתם סופר געענטפערט: "יעדע נאכט בשעת איך האב געזאגט תיקון חצות האב איך אנגעפילט א כוס מיט טרערן, איך האב געבעטן פאר גוטע קינדער"; דאס איז דער וועג ווי אזוי מען איז זוכה צו ערליכע דורות.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך

יום א' פרשת כי תבוא לאומאן, י"ב אלול, שנת תשפ"ד לפרט קטן

... תחי'

איך האב ערהאלטן אייער בריוו.

פרויען זענען פטור פון דאווענען שחרית מנחה מעריב. א פרוי איז נאר מחויב צו זאגן אינדערפרי ברכות השחר, און זי דארף אכטונג געבן צו בענטשן ברכת המזון אין א סידור, ליינען קריאת שמע שעל המיטה פארן גיין שלאפן און זיך מתבודד זיין צום הייליגן באשעפער, וואס אן דעם איז נישט דא קיין לעבן. אזוי ווי דער רבי זאגט (לקוטי מוהר"ן חלק א', סימן ט), אויפן פסוק (תהלים מב, ט): "תְּפִלָּה לְאֵל חַיָּי", אז די גאנצע לעבן פונעם מענטש דארף זיין תפילה.

פרויען וואס האבן צייט, זיי האבן שוין נישט קיין קליינע קינדער אין שטוב און מען וויל דאווענען די תפילות הקבועות, אזוי אויך מיידלעך - זאלן זיי דאווענען, ווייל די תפילות פון פרויען איז זייער חשוב אויבן אין הימל.

תיקון הכללי איז פאר יעדן איינעם; פאר מענער, פרויען, אינגלעך און מיידלעך, עס איז מסוגל פאר אלע ישועות און פאר אלע רפואות; וואויל איז דעם וואס זאגט יעדן טאג די צען קאפיטלעך תהילים.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט
געבענטשט יאר.

בעזרת ה' יתברך

יום א' פרשת צו, ד' ניסן, שנת תשפ"ו לפרט קטן

... נרו יאיר

איך האב ערהאלטן דיין בריוו.

נעמען א קינד קיין אומאן צום רבינ'ס ציון פאר די זיבן יאר - האט נישט צוטון אויב דער קינד וועט זאגן די צען קאפיטלעך תהילים; דאס ברענגען די קינדער איידער די זיבן יאר - דאס אליינס איז זייער א גרויסע זאך. דער רבי האט צוגעזאגט (חיי מוהר"ן, סימן תקיז): "אֲנִי בָּטוּחַ בְּהַשֵּׁם יִתְבָּרַךְ, שֶׁכָּל תִּינוֹק שֶׁיָּבוֹא לְפָנַי קוֹדֶם שֶׁיַּגִּיעַ לְבֶּן שֶׁבַע שָׁנִים, בְּוַדַּאי יִהְיֶה נָקִי מִן הַחֵטְא עַד יוֹם חֲתֻנָּתוֹ", איך זאג צו פאר יעדן קינד וואס וועט קומען צו מיר פאר די זיבן יאר - וועט גיין צו זיין חתונה מיט א ריינע העמד; דאס האט נישט מיט זאגן די תיקון הכללי.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך

יום ד' פרשת צו, ז' ניסן, שנת תשפ"ו לפרט קטן

... נרו יאיר

איך האב ערהאלטן דיין בריוו.

ערשטנס וויל איך דיך מחזק זיין דו זאלסט זיך זייער זייער שטארקן מיט דיין הייליגע ארבעט פון זיין א מלמד, חכמינו זכרונם לברכה זאגן (בבא בתרא ח:): אויפן פסוק (דניאל יב, ג): "'וּמַצְדִּיקֵי הָרַבִּים כַּכּוֹכָבִים לְעוֹלָם וָעֶד', אֵלוּ מְלַמְּדֵי תִּינוֹקוֹת", א מלמד וואס לערנט תורה מיט אידישע קינדער איז צוגעגליכן צו די שטערנס פון די וועלט, אזוי ווי עס איז נישט מעגליך אפצוציילן די שטערנס פון די וועלט - אזוי קען מען נישט אפציילן די גרויסע זכותים וואס א מלמד האט.

בנוגע מאכן א סדר מיט די בעלי תפילה; פון איין זייט דארף מען טאקע שטעלן די קינדער וואס זענען פאסיג און פעאיג צו זיין בעלי תפילה זיי זאלן זיין די בעלי תפילה, און פון די אנדערע זייט דארף מען יא מאכן אלע קינדער אן אויסנאם זאלן באקומען די געפיל אז זיי זענען און זיי קענען, און נישט חס ושלום נעמען פון דעם א באווייז אז 'מיר טויגן נישט, והא ראי' אז מיר זענען נישט קיין חזנים ובעלי תפילה'.

ריכטיג איז אז מען זאל איינטיילן די כיתה, געבן פאר אלעמען צו זיין בעלי תפילה, מען קען איינטיילן דאס דאווענען אין צוויי אדער מער, און די שטיקלעך וואס עס פארלאנגט זיך העכערע בעלי תפילה, קלארערע בעלי תפילה - געבט מען זיי, און די אנדערע געבט מען פאר די אנדערע, אזוי ווי אין שול; פסוקי דזמרא איז געאייגנט פאר מערערע מענטשן, אנדערש ווי שחרית.

בוי אויף די קינדער, געב זיי אלע פאסטענעס, טייל איין די כיתה אז יעדער זאל האבן א זאך, און געב אלעמען אסאך גוטע ווערטער. דער הייליגער רבי זאגט (לקוטי מוהר"ן חלק א, סימן רב): "כָּל מִי שֶׁשִּׂכְלוֹ קָטָן בְּיוֹתֵר, צָרִיך לַחֲלֹק לוֹ כָּבוֹד בְּיוֹתֵר", ווער עס האט ווייניג שכל דארף אסאך כבוד; דאס גייט אן ביי אלע קינדער, קינדער דארפן אסאך כבוד ווייל זייער פארשטאנד איז נאך קליין, בפרט קינדער וואס קומען פון שטיבער וואס מען געבט זיי בכלל נישט קיין גוטע ווערטער - דארפן דאס זייער אסאך. דעריבער, א קלוגע מלמד און טיטשער - וועט הייבן די קינדער און שטענדיג געבן קאמפלימענטן, סיי ברבים און אויך פריוואט.

קארג נישט קיין גוטע ווערטער, זע עס זאל זיך גיסן פאר אלע תלמידים גוטע ווערטער מיט ווארעמקייט און ליבשאפט; מוסר ווערטער און קריטיק ווערטער זאלסטו קארגן, און נאר ממש בלית ברירה, נאכן גוט דורכטראכטן - זאגט מען אמאל מוסר וכו', אבער גוטע ווערטער פאר קינדער - דארף מען געבן וואס מער.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך

יום ד' פרשת צו, ז' ניסן, שנת תשפ"ו לפרט קטן

מרת ... תחי'

פון די ווערטער פון די בריוו זעט אויס ווי זי איז נישט קיין גרויסע חכמה און נישט קיין קליינע נאר, עס זעט אויס פון די בריוו אז זי איז א נארישע פרוי.

מאכט זיך נישט צוטון פון וואס זי זאגט, זוכט נישט צו רעדן מיט איר, דאס מיינט נישט צו זאגן מאכן א מחלוקת, אפהאקן מיט איר, נאר רעדט נישט מיט איר קיין סאך; אז זי רופט אייך דארפט איר נישט אויפהייבן די טעלעפאן, און אז מען טרעפט זיך ביי שמחות באגריסט מען זיך און דאס איז גענוג.

געבט זיך גאר אכטונג אז אייער שלום בית זאל אייך נישט צעפאלן, מיינט נישט אז ביי א צווייטן גלאנצט מער ווי ביי אייך, וואס זעט אויס פון אינדרויסן גלאנצעדיג מיינט נישט אז עס איז טאקע אזוי.

זוכט אייך אין די משפחה איידעלע שוועגערינס מיט וועם צו מאכן קשר, נעמט אייך חבר'טעס וואס רעדן נישט פון 'מיין מאן', 'דיין מאן', 'יענעמ'ס מאן'; די וואס רעדן פון פון 'מיין מאן', 'דיין מאן', 'יענעמ'ס מאן' זענען נישט איידעלע, די זענען חולי נפש, עס איז נישט כדאי צו האבן די סארט פריינד.

נאכאמאל, לאזט אפ די שוועגערין, איר זעט אליינס אז יעדע מאל איר ענדיגט רעדן מיט איר קוקט איר אראפ אייער מאן; וואס זוכט איר זיך צרות, לאזט אפ, זוכט אייך איידעלע שוועגערינס.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך

יום ד' פרשת צו, ז' ניסן, שנת תשפ"ו לפרט קטן

... נרו יאיר

איך האב ערהאלטן דיין בריוו.

נוץ די עצה פון תפילה, געב אוועק יעדן טאג פופצן - צוואנציג מינוט צו בעטן דעם אייבערשטן נאר אויף דעם; אז דו וועסט אזוי טון טאג נאך טאג - וועסטו זען נאך א קורצע צייט א ישועה.

וויסן זאלסטו, וואלט דאס געווען דיינע אייגענע קינדער - וואלסטו געדארפט מחנך זיין און זיין גאר שטרענג צו פארלאנגען דרך ארץ וכו', אבער אין דיין פאל אז דו ביסט נישט דער טאטע, דו ביסט דער שטיף טאטע - וועסטו נישט אויפטון, און אויך וועט עס שאטן פאר די שלום בית.

נאך אן עצה איז דא, אויב דו וועסט אנהייבן זייער שטארק ליב האבן איר קינד, נישט נאר געזאגט, נאר טאקע ליב האבן, דורך איר דן זיין לכף זכות, זיך אריינלייגן אין איר מצב, די רחמנות פון קינדער וואס זעען ווי זייער לעבן פאלט זיי צאם, ווי זייערע עלטערן קריגן זיך, ווי די עלטערן צעטיילן זיך, ווי דאס צעשטורעמט זייערע געפילן, זייער מח וכו'; דאס קען מען נישט פארשטיין, דער וואס קומט פון א געזונטע שטוב מיט געזונטע עלטערן איז נישט מעגליך זאל פארשטיין די צער, די ווייטאג, די יסורים, די פחדים - וואס די קינדער גייען אריבער ווען די עלטערן קריגן זיך און צעטיילן זיך; אז דו וועסט איר דן זיין לכף זכות, דו וועסט קוקן אויף די קינד מיט רחמנות - וועט די קינד זיך טוישן, די קינד וועט ווערן רואיג, די קינד וועט אנהייבן זיך פירן מיט דרך ארץ.

העיקר איז נאכאמאל און נאכאמאל תפילה, תפילה, תפילה, זיך נישט מייאש זיין פון תפילה. גיי אין א ווינקל, גיי און שמועס דאס אויס מיטן אייבערשטן, דערצייל אים ווי דאס שעדיגט ענקער שלום בית וכו' וכו'; וועסטו זען גרויסע ניסים.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.