בעזרת ה' יתברך

יום ב' פרשת עקב, י"ג מנחם-אב, שנת תשפ"ו לפרט קטן

... נרו יאיר

איך האב ערהאלטן דיין בריוו.

איך פריי זיך זייער צו הערן אז דו לעבסט א חיים טובים מיט די עצות פון הייליגן רבי'ן, דיין לעבן איז א לעבעדיגע זיסע געשמאקע לעבן.

בנוגע תיקון חצות; אוודאי זאלסטו זאגן תיקון חצות, הייב אן מיט זאגן פארן גיין שלאפן. מוהרא"ש זאגט, מען זאל זיך צוגעוואוינען דאס צו זאגן איידער מען גייט שלאפן, אינאיינעם מיט קריאת שמע שעל המטה.

בנוגע די פראגע והחוט המשולש לא במהרה ינתק וכו'; וויסן זאלסטו, עס ווערט גע'פסק'נט אז דורך לערנען גמרא – תלמוד בבלי – איז מען יוצא צו לערנען מקרא, משנה און גמרא, די פוסקים זאגן (רמ"א יורה דעה סימן רמ"ו, סעיף ד), אז מיטן לערנען גמרא איז מען מקיים וואס די הייליגע חכמים זאגן (קידושין ל.): "לעולם ישלש אדם שנותיו שליש במקרא שליש במשנה שליש בתלמוד"; אזוי אויך אז דו וועסט לערנען ספר אשר בנחל קען מען זאגן אז מען איז יוצא די חוט המשולש פון לערנען לקוטי מוהר"ן, לקוטי הלכות און לקוטי תפילות, ווייל די ספר אשר בנחל איז א תמצית פון הייליגן רבינ'ס ספרים, און פון לקוטי הלכות, און איז אויך פיל מיט תפילות.

אז דו ווילסט שפירן א טעם אין לערנען – זאלסטו יעדן אינדערפרי גיין אין מקוה, און נאכן מקוה זאלסטו זאגן ברכת התורה – שטייט און מיט כוונה, און ביי די ווערטער: "והערב נא ה' אלקינו" – זאלסטו וויינען צום אייבערשטן: "מאך מיר זיס", און ביי די ווערטער: "וְנִהְיֶה אֲנַחְנוּ וְצֶאֱצָאֵינוּ, (וְצֶאֱצָאֵי צֶאֱצָאֵינוּ), וְצֶאֱצָאֵי עַמְּךָ בֵּית יִשְׂרָאֵל, כֻּלָּנוּ יוֹדְעֵי שְׁמֶךָ, וְלוֹמְדֵי תוֹרָתְךָ לִשְׁמָהּ" – זאלסטו לאזן טרערן; דאס איז די סוד פון זוכה זיין צו שפירן א טעם אין לערנען, און ביי ברכת קריאת שמע, אהבת עולם – זאלסטו מאכן א סטאנציע, נישט אפכיפערן, נאר וויינען און בעטן: "וְהָאֵר עֵינֵינוּ בְּתוֹרָתֶךָ, וְדַבֵּק לִבֵּנוּ בְמִצְוֹתֶיךָ, וְיַחֵד לְבָבֵנוּ לְאַהֲבָה וּלְיִרְאָה אֶת שְׁמֶךָ", דאס איז די סוד ווי אזוי מען איז זוכה צו טועם זיין מתיקות התורה, אויך ביי הפסקה אין כולל זאלסטו זיך ערגעץ באהאלטן מיטן אייבערשטן, און זיך מתבודד זיין.

זיי זיך מחי' מיט דיינע נקודות טובות, דאנק דעם אייבערשטן אז דו ביסט זוכה צו לערנען און צו דאווענען, פריי זיך מיט יעדע פינטעלע וואס דו טוסט.

בעזרת ה' יתברך

ערב שבת קודש פרשת עקב, י"ז מנחם-אב, שנת תשפ"ו לפרט קטן

מיין ליבער טייערער ... נרו יאיר

איך האב ערהאלטן דיין בריוו.

ערשטנס זאלסטו וויסן אז דו ביסט זייער באליבט ביים אייבערשטן, דער אייבערשטער זעט וואס טוט זיך אין הארץ, ער זעט דיין שווערע מלחמה; ווי דו שלאגסט זיך פאר דיין לעבן נישט צו נכשל ווערן אין עבירות חס ושלום, און אז עכט ווילסטו זיין ריין און הייליג; דער אייבערשטער זעט די באהאלטענע ווילן פון אידישע קינדער, ווי עכט וויל מען זיין גוט, און דאס בעטן מיר ביי תיקון חצות: "אַתָּה יוֹדֵעַ רָזֵי עוֹלָם, וְתַעֲלוּמוֹת סִתְרֵי כָּל חָי, אַתָּה חוֹפֵשׂ כָּל חַדְרֵי בָטֶן, רוֹאֶה כְלָיוֹת וְלֵב, אֵין דָּבָר נֶעְלָם מִמֶּךָּ, וְאֵין נִסְתָּר מִנֶּגֶד עֵינֶיךָ, רבונו של עולם דו זעסט דאך מיין הארץ ווי שטארק איך וויל זיין גוט, בעט איך דיר, יְהִי רָצוֹן מִלְּפָנֶיךָ, זיי מיר מוחל אויף וואס איך האב געטון וכו'".

ליבער ברודער, איך בעט דיר זייער לאז זיך נישט פונעם שטן, געדענק, די עיקר מלחמה איז דאס נישט אויפגעבן, ווייל דער יצר הרע וויל נאר דו זאלסט זיך אונטערגעבן, ער וויל דיך מאכן שפירן ווי דו ביסט א פארלוירענער, א פארפאלענער, און נאר צוליב דעם ווארפט ער אראפ דעם מענטש אין עבירות, צו קענען אויפווייזן אז מען איז דערנאך און דער מענטש זאל אויפגעבן, מען זאל שוין נישט וועלן זיין גוט, אבער געדענק, דער רבי שטייט אנטקעגן די טומאה און שרייט (לקוטי מוהר"ן חלק ב, סימן עח): "גיוואלד, זייט אייך נישט מייאש, קיין ייאוש איז גארנישט פארהאנען", אפילו מען האט געזינדיגט, אפילו מען איז געפאלן - קען מען תשובה טון, מען קען זיך צוריק קערן צום אייבערשטן.

די ערשטע זאך אין וואס דו זאלסט זיין זייער שטארק - איז התבודדות; רעד זיך אויס דיין הארץ צום אייבערשטן, זאג אים ווי שטארק דו ווילסט זיין אן ערליכער איד, גיס זיך אויס דיין צעבראכן הארץ, זאג פארן אייבערשטן: "רבונו של עולם, וואס טו איך? איך בין אריין אין א זומפ און איך ווייס נישט די וועג ארויס, איך פאל אין די עבירה פון פגם הברית, איך בין אזוי פארשמירט אין די עבירה, איך קען זיך נישט ארויסזען פון דעם, איך ווער פלוצלונג משוגע, איך פארליר מיין שכל, איך פאל אראפ אין די פגם, העלף מיר טאטע, נעם מיך ארויס פון די בלאטע", אזוי זאלסטו בעטן און לייג צו דיינע אייגענע תפילות.

לאז זיך נישט נאך, טראכט נישט די שלעכטע מחשבות וואס דער יצר הרע רעדט דיר איין, אז פון דיר וועט שוין גארנישט זיין, דו וועסט שוין נישט האבן קיין תשובה; ענדערש הער אויס דעם רבי'ן וואס זאגט דיר: "דו וועסט נאך זיין א צדיק, דו קענסט נאך פאררעכטן; טו תשובה און קער זיך צוריק צום אייבערשטן".

ליבער ברודער גלייב אז דו קענסט פאררעכטן, די הייליגע חכמים זאגן (תנא דבי אליהו רבא, פרק כב), דער אייבערשטער זאגט: "אֲפִילוּ הִגְדִּיל אָדָם מֵאָה עֲבֵירוֹת זוּ לְמַעְלָה מִזּוּ, וְעָשָׂה תְּשׁוּבָה, הֲרֵינִי עִמּוֹ בְּרַחֲמִים וָאֲקַבֵּל אֶת תְּשׁוּבָתוֹ", אפילו א מענטש האט געזינדיגט און געטון איבער הונדערט עבירות, אויב טוט ער תשובה האב איך רחמנות אויף אים און איך נעם אן זיין תשובה, "וַאֲפִלּוּ עוֹמֵד אָדָם וּמְחָרֵף כְּלַפֵּי מַעֲלָה, וְיַחֲזֹר וְיַעֲשֶׂה תְּשׁוּבָה, הַקָדוֹשׁ בָּרוּךְ הוּא מוֹחֵל לוֹ עַל כּוּלָם", און אפילו א מענטש איז אזוי ווייט אוועק געפאלן אז ער רעדט קעגן דעם אייבערשטן רחמנא לצלן, אויב טוט ער תשובה איז אים דער אייבערשטער מוחל און האט אים ליב.

אויך זאלסטו זיך קובע זיין א שיעור אין לערנען משניות און גמרא בדרך גירסא, ווייל דער אייבערשטער זאגט: "בָּנַי", מיינע קינדער, "בָּרָאתִי יֵצֶר הָרָע", איך האב באשאפן דעם יצר הרע, "בָּרָאתִי לוֹ תּוֹרָה תַּבְלִין", איך האב אבער באשאפן די תורה, וואס איז א רפואה פארן יצר הרע, "וְאִם אַתֶּם עוֹסְקִים בַּתּוֹרָה, אֵין אַתֶּם נִמְסָרִים בְּיָדוֹ", אויב לערנט איר תורה וועט איר נישט אנקומען צו דעם יצר הרע'ס הענט, "וְאִם אֵין אַתֶּם עוֹסְקִין בַּתּוֹרָה, אַתֶּם נִמְסָרִים בְּיָדוֹ", און אויב לערנט איר נישט קיין תורה וועט איר זיין אונטער אים (קידושין ל.).

אז דו ביסט נעבעך אריינגעפאלן אין די ביטערע עבירה פון פגם הברית רחמנא לצלן, דו האלסט אין איין פוגם זיין - זאלסטו אנהייבן לערנען תורה, און בדרך כלל ווער עס פאלט אין די עבירה פארלירט די ריכוז, מען קען זיך נישט אזוי גוט קאנצענטרירן, מען פאלט ארויס פון פארשטיין א סוגיא וכו', און צו די אלע קומט דער רבי מיט א וואונדערליכע וועג פון קענען צוריק באקומען די מוחין, דורך אסאך זאגן די ווערטער פון תורה, און אז מען זאגט אסאך די ווערטער פון תורה - איז מען זוכה צוריק באקומען די מוחין, מען איז זוכה צו קענען פארשטיין און שפירן די זיסקייט פון די תורה, וואס נאר דאס איז די עצה פטור צו ווערן פון דעם יצר הרע וואס וויל אונז אויסרייסן פון די וועלט און פון יענע וועלט; די הייליגע תורה. די הייליגע חכמים זאגן (קידושין ל:): "אִם פָּגַע בְּךָ מְנֻוָּל זֶּה", אויב דער מנוול, דער יצר הרע - האט דיך אנגעטראפן און דו ווילסט פטור ווערן פון אים, "מָשְׁכֵהוּ לְבֵית הַמֶּדְרָשׁ", גיי אין בית המדרש דאווענען און לערנען; וועסטו פטור ווערן פון אים.

עס איז ערב שבת, איך דארף מקצר זיין.

א כתיבה וחתימה טובה.

בעזרת ה' יתברך

יום ג' פרשת שופטים, כ"ח מנחם-אב, שנת תשפ"ו לפרט קטן

... נרו יאיר

איך האב ערהאלטן דיין בריוו.

די ערשטע זאך ווען מען שיקט אריין א קינד אין חדר - דארפן די עלטערן דאנקען און לויבן דעם אייבערשטן אז מען שטייט שוין ביי די גליקליכע צייט אז מען האט א קינד, א געזונט קינד - וואס גייט שוין אין חדר לערנען די הייליגע תורה, מען דארף לויבן דעם אייבערשטן אן אויפהער.

צווייטנס דארפן די עלטערן וויסן אז צאלן שכר לימוד איז א חיוב גמור, דורך צאלן שכר לימוד איז מען מקיים די מצוה וואס ליגט אויף די טאטע פון (דברים ו, ז): "ושננתם לבניך", א טאטע דארף לערנען תורה מיט די קינדער; שכר לימוד איז נישט קיין צדקה, און מען קען דאס נישט צאלן פון מעשר געלט, און חס ושלום אז מען איז מזלזל אין דעם, מען צאלט נישט שכר לימוד - שאט דאס פאר די קינדער.

דריטנס, עס איז כדאי צו זיין פארבינדן מיטן מלמד און מנהל, ארבעטן אינאיינעם; ווייל דאס ארבעטן אינאיינעם איז א גאר גרויסע מעלה פאר די קינדער.

ועל כולם איז תפילה; בעטן דעם אייבערשטן פארן קינד אז ער זאל אויסוואקסן אן ערליכער איד, ער זאל לערנען און דאווענען, און לעבן מיט אמונה. ווייל ביי אנדערע זאכן קען מען מאכן סגולות וכו', אבער זוכה זיין צו האבן גוטע קינדער - איז דער עיקר תפילות פון עלטערן. אזוי ווי מוהרא"ש זכרונו לברכה דערציילט, אז א איד איז געקומען בעטן א ברכה פונעם הייליגן חפץ חיים זכותו יגן עלינו אויף גוטע קינדער, האט דער צדיק גענומען א תהלים וואס איז געווען אויפגעבלאזן פון נאסקייט און דאס געוויזן פאר דעם איד און אים געזאגט: "דאס איז דער תהלים פון מיין מאמע עליה השלום וואו זי פלעגט יעדן טאג וויינען צום אייבערשטן אז זי זאל זוכה זיין צו גוטע קינדער, אזוי איז מען זוכה צו גוטע קינדער".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך

יום ב' פרשת עקב, י"ג מנחם-אב, שנת תשפ"ו לפרט קטן

... נרו יאיר, לאנדאן

איך האב ערהאלטן דיין בריוו.

ערשטנס איז מיר א גרויסע פרייד צו הערן אז דו ביסט זיך מחי' מיטן רבינ'ס עצות, און מיטן רבינ'ס התחזקות, דיין לעבן האט זיך געטוישט צום גוטן, דו לעבסט מיטן אייבערשטן, און אז דו וועסט זיך שטארקן און דערהאלטן, דו וועסט פאלגן די עצות פון הייליגן רבי'ן – וועסטו ווערן א גרויסער צדיק.

אויף די ערשטע פראגע וכו'; מוהרא"ש זאגט, אויב דער מענטש לעבט מיט די מחשבה: 'אפשר איז היינט מיין לעצטע טאג?' ער גייט שלאפן מיט די מחשבה, ער געבט זיך ממש איבער פארן אייבערשטן, 'בידך אפקיד רוחי' – מעג מען זיך אויך שבת מתוודה זיין.

און בנוגע וויינען שבת; עס ווערט שוין געברענגט אין די פוסקים (מדרש אגדה, הובא בבית יוסף אורח חיים סימן רפח; טורי זהב שם, סעיף קטן ב), אז אויב עס איז א תענוג, א פארגעניגן פארן מענטש זיך אויסצואוויינען פארן אייבערשטן – מעג מען דאס טון אום שבת.

אויף די צווייטע פראגע וכו'; אוודאי מעג מען זיך מתבודד זיין במחשבה אין מקוה, נישט נאר במחשבה, נאר אויך בדיבור; איז מען איז אויסגעדרייט צום וואנט בצניעות קען מען מאכן תפילות ביי יעדע טבילה, צום ביישפיל, מען בעט: "הייליגער באשעפער, בזכות די טבילה וואס איך טובל זיך – זאל איך זוכה זיין צו היטן מיינע אויגן", און מען טינקט זיך איין; מען זאגט: "הייליגער באשעפער, אזוי ווי איך טובל זיך יעצט מיין קערפער, בעט איך דיר, טובל מיין נשמה, איך זאל ווערן ריין פאר דיר".

אויף די דריטע פראגע וכו'; אוודאי מעג מען גיין, און עס איז נישט קיין סכנה; קוק אריין אין ברטנורא (אבות ג, ד): "וְאִם הָיָה מְחַשֵּׁב בְּדִבְרֵי תּוֹרָה הָיְתָה מְשַׁמַּרְתּוֹ", אויב מען טראכט פון תורה מעג מען, ווייל די תורה וועט אים היטן; אזוי אויך אז מען איז זיך מתבודד ווערט מען איינס מיטן אייבערשטן, ווערט מען אפגעהיטן, און קוק אריין אין ספר הקדוש לקוטי מוהר"ן (חלק א, סימן נב), וואו דער הייליגער רבי טייטשט אויס די משנה אין אבות (פרק ג, משנה ד): "הַנֵּעוֹר בַּלַּיְלָה" - כפשוטו, דער וואס איז אויף ביינאכט און ער איז זיך מתבודד, ער גיסט אויס זיין הארץ פארן אייבערשטן, "וְהַמְהַלֵּךְ בַּדֶּרֶךְ יְחִידִי" – ער גייט אין א פלאץ וואס קיינער גייט נישט דארט, "וְהַמְפַנֶּה לִבּוֹ לְבַטָּלָה" – צו זוכה זיין צו קומען צו ביטול צום אייבערשטן, "הֲרֵי זֶה מִתְחַיֵּב בְּנַפְשׁוֹ" – ווערט ער נכלל אינעם אייבערשטן וואס איז חיוב המציאות, און ער ווערט אויך א מחויב המציאות מיט די גאנצע וועלט; קוק אריין אין דעם רבינ'ס ווערטער וואס וויינט אויף די טעות וואס די אפיקורסים האבן, זיי זאגן אז די וועלט איז א פאקט וואס מוז זיין, זאגט דער רבי, דאס איז ליגנט, ווייל נאר דער אייבערשטער איז מחויב המציאות, אבער אלע וועלטן וואס דער אייבערשטער האט באשאפן איז אפשרי המציאות, דער אייבערשטער וואלט זיי ווען נישט געדארפט באשאפן, און נאר דער אייבערשטער מוז זיין, און דער רבי זאגט: "מאין נמשך הטעות", פון ווי קומט צו זיי דער טעות? ווייל איינמאל דער אייבערשטער האט באשאפן נשמות ישראל, מוז שוין זיין די גאנצע וועלט וכו' וכו', און ווען דער מענטש איז זיך מתבודד – ביינאכט – בדרך יחידי, הרי זה מתחייב, ער איז גורם צו ווערן מחויב המציאות, ער און אלע וועלטן וכו', עיין שם.

לערן אסאך גמרא, לערנען מאכט נישט שלעכטע מחשבות, עס קען זיין אז ביים לערנען קומען זיי ארויס און זיי גייען אינגאנצן ארויס פונעם מענטש, אזוי ווי וואסער וואס מען לייגט אויפן פייער, עס הייבט אן קאכן און עס הייבט אן ארויסגיין שמוץ, וועט דען איינער טראכטן אז די פייער מאכט די שמוץ און דען געבן אן עצה מער נישט אויפצוקאכן וואסער? ניין, נאר וואס דען? אין די וואסער איז באהאלטן שמוץ, און אדרבה, דורך לייגן אויפן פייער – גייען זיי ארויס (עיין שיחות הר"ן, סימן עט), אזוי אויך ווען דו וועסט לערנען גמרא, משניות וכו' – וועט זיך אפשר דאכטן אז די גמרא און משניות מאכן מחשבות וכו', אבער עס איז נישט אזוי, עס איז נאר מטהר, אזוי ווי די הייליגע חכמים זאגן (ברכות כב.), אויפן פסוק (ירמיהו כג, כט): "'הֲלֹא כֹה דְבָרִי כָּאֵשׁ נְאֻם ה'', שֶׁאֵין דִּבְרֵי תוֹרָה מְקַבְּלִין טוּמְאָה".

איך שיק דיר צוריק דעם בריוו קיין לאנדאן אז דו זאלסט זיך קענען מחי' זיין, אויך קענסטו יעדע וואך אויפזוכן די קונטרס 'עצתו אמונה', לערן עס בקול, כאילו די בריוון זענען פאר דיר פערזענליך, ווייל אלע בריוון זענען פאר יעדן איינעם פערזענליך.

בעזרת ה' יתברך

יום ד' פרשת ואתחנן, ח' מנחם-אב, שנת תשפ"ו לפרט קטן

מרת ... תחי'

איך האב ערהאלטן אייער בריוו.

עס איז גאר א גרויסע מצוה וואס ענק טוען, זייט ממשיך מיט די גרויסע מצוה.

דער עיקר זאלן ענק רעדן פון אמונה, ווייל אמונה היילט די נפש, אמונה היילט אלעס, אזוי ווי דער הייליגער רבי זאגט (לקוטי מוהר"ן חלק ב, סימן ה): "הָעִקָּר הוּא הָאֱמוּנָה, וְצָרִיךְ כָּל אֶחָד לְחַפֵּשׂ אֶת עַצְמוֹ וּלְחַזֵּק אֶת עַצְמוֹ בֶּאֱמוּנָה", דער עיקר אויף וואס א מענטש דארף ארבעטן צוצוקומען - איז אמונה, "כִּי יֵשׁ סוֹבְלֵי חֳלָאִים, שֶׁיֵּשׁ לָהֶם מַכּוֹת מֻפְלָאוֹת, וְהֵם סוֹבְלִים הֶחֳלָאִים רַק בִּשְׁבִיל נְפִילַת הָאֱמוּנָה", ווייל עס זענען דא זייער אסאך מענטשן וואס האבן מחלות, און זיי ליידן פון דעם נאר ווייל זיי האבן נישט קיין אמונה; דער רבי רעדט פון גייסטישע קרענק, 'יסורי הנפש' וואס מענטשן ליידן זיך נעבעך צאם. דער רבי זאגט: "כִּי עַל יְדֵי נְפִילַת הָאֱמוּנָה", ווען א מענטש האט נישט קיין אמונה, "בָּאִים מַכּוֹת מֻפְלָאוֹת", ליידט ער נעבעך פון די מחלות וואס קומט פון חסרון אמונה, "שֶׁאֵין מוֹעִיל לָהֶם לֹא רְפוּאוֹת, וְלֹא תְּפִלָּה, וְלֹא זְכוּת אָבוֹת", און דאן העלפט אים נישט קיין רפואות, עס העלפט נישט קיין תפילה און אויך נישט זכות אבות. דאס גייט ארויף אויף די יסורים וואס מענטשן מאכן נעבעך מיט פון אלע סארט יסורי הנפש; עס פייניגט זיי פון אינעווייניג - יעדער מיט זיינע שלעכטע מחשבות, און די איינציגסטע רפואה אויף דעם איז אמונה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת ואתחנן, ח' מנחם-אב, שנת תשפ"ו לפרט קטן

מרת ... תחי'

איך האב ערהאלטן אייער בריוו.

איר זעט נישט מיט אייערע אויגן ווי דער סמ"ך מ"ם האט געטראפן א וועג צו צעברעכן אייער שטוב? איר זעט נישט מיט אייערע אויגן ווי איר ווערט פארנארט אין זיין נעץ? איר זאגט אליינס אז דאס מאכט איר זאלט אראפקוקן אויף אים און עס נעמט אוועק די ליבשאפט צווישן ענק.

וויסן זאלט איר, אזוי ווי ביימער און גראז קענען נישט וואקסן נאר אז מען באוואסערט זיי, אזוי קען א מענטש נישט וואקסן נאר אז מען האלט פון אים, און ביז וויפיל מען האלט אז ער קען אנקומען - ביז אהין קען ער אנקומען; ביי קינדער איז דאס געוואנדן לויט די עלטערן און לויט זיין מלמד, און שפעטער נאך די חתונה איז דאס געוואנדן אין די ווייב; אז די ווייב שעצט אים - קען ער וואקסן, און אז אין איר הארץ האלט זי נישט פון אים - קען ער נישט וואקסן, און אזוי דערציילן אונז די הייליגע חכמים (בראשית רבה יז, ז): "מַעֲשֶׂה בְּחָסִיד אֶחָד", עס איז געווען א מעשה מיט אן ערליכער איד וואס האט חתונה געהאט צו אן ערליכע פרוי, נאכדעם וואס עס זענען אריבער לאנגע יארן וואס זיי האבן נישט געהאט קיין קינדער, האבן זיי זיך גע'גט, און דער ערליכער איד האט חתונה געהאט מיט א שלעכטע פרוי און זי האט אים געמאכט פאר א רשע, און די ערליכע פרוי האט חתונה געהאט מיט א רשע, און זי האט אים געמאכט פאר א גרויסער צדיק, פירט אויס דער מדרש: "הֱוֵי שֶׁהַכֹּל מִן הָאִשָּׁה", זעט מען פון דעם אז אלעס איז געוואנדן אין די פרוי; אויב די פרוי קוקט גוט אויף איר מאן - ווערט ער א צדיק, און אז די פרוי האלט נישט פונעם מאן - זי קוקט אים אראפ - פאלט ער נעבעך אראפ.

זוכט אין אייער מאן נאר דאס גוטס, א פרוי האט די כוחות צו זען נאר דאס גוטס, חכמינו זכרונם לברכה זאגן (נדה מה:): "מְלַמֵּד שֶׁנָתַן הַקָּדוֹשׁ בָּרוּךְ הוּא בִּינָה יְתֵירָה בָּאִשָּׁה יוֹתֵר מִבָּאִישׁ", דער אייבערשטער האט געגעבן פאר א פרוי מער חכמה ווי פארן מאן; א פרוי האט א ספעציעלע שכל און פארשטאנד צו קענען טרעפן דאס גוטס אינעם מאן און אין די קינדער, און אז זי ניצט דאס אויס איז זי זוכה צו בויען איר שטוב, עס ווערט מקוים ביי איר (משלי לא, ל-לא): "אִשָּׁה יִרְאַת ה' הִיא תִתְהַלָּל, תְּנוּ לָהּ מִפְּרִי יָדֶיהָ וִיהַלְלוּהָ בַשְּׁעָרִים מַעֲשֶׂיהָ".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת ואתחנן, ח' מנחם-אב, שנת תשפ"ו לפרט קטן

מרת ... תחי'

איך האב ערהאלטן אייער בריוו.

איך בין אזוי פרייליך צו הערן די פרייליכע זאך, אז איר האט זיך אפגעשוירן די האר צוויי וואכן נאך אייער חתונה און עס געטון מיט גרויס שמחה, און איך שיק ענק א ברכה: "יהי רצון עס זאל זיין די ווילן פונעם אייבערשטן אז ענק זאלן זוכה זיין שתשרה שכינה בביתכם, די שכינה זאל רוען אין ענקער שטוב, און ענק זאלן זוכה זיין צו בנים ובני בנים עוסקים בתורה ובמצוות, צו פרנסה און צו הצלחה", בזכות וואס איר האט זיך אפגעשוירן, איר האט געטון וואס מוהרא"ש זכותו יגן עלינו האט אונז געלערנט, און וואס די אלע הייליגע צדיקים האבן אונז געלערנט.

שעמט זיך נישט מיט די הייליגע זאך, דערציילט פאר אלע חבר'טעס אז איר זענט אפגעשוירן, זאלן זיי זיך שעמען; די וואס גייען מיט די אייגענע האר - די דארפן זיך שעמען, ווייל דער הייליגער זוהר זאגט (נשא קכה:): 'תּוּנְבָא לֵיתֵי' א קללה זאל קומען, 'עַל הַהוּא בַּר נָשׁ' אויף דעם מענטש, 'דְּשָׁבַק לְאִנְתְּתֵיהּ' וואס לאזט זיין ווייב, 'דְּתִתְחַזֵי מִשַׂעֲרָא דְּרֵישָׁה לְבַר' אז איר האר פון קאפ זאל זיך ארויסזען. 'וְדָא הוּא חַד מֵאִינּוּן צְנִיעוּתָא דְּבֵיתָה', דאס איז פון די יסודות פון א אידישע שטוב, אז מען זאל נישט זען די האר פון די פרוי. 'וְאִתְּתָא דַּאֲפִּיקַת מִשַׂעֲרָא דְּרֵישָׁה לְבַר' און א פרוי וואס גייט מיט אויפגעדעקטע האר, 'לְאִתְתַּקְּנָא בֵּיהּ' זיך שיין צו מאכן, 'גָּרִים מִסְכְּנוּתָא לְבֵיתָא' איז זי גורם אז עס זאל זיין ארימקייט אין שטוב, 'וְגָרִים לִבְנָהָא דְּלָא יִתְחַשְּׁבוּן בְּדָרָא' און זי איז גורם אז אירע קינדער וועלן נישט מצליח זיין און זיי וועלן נישט זיין חשוב, 'וְגָרִים מִלָּה אַחֲרָא דְּשַׁרְיָא בְּבֵיתָא' אזוי אויך איז זי גורם אז דער סמ"ך מ"ם און די נישט גוטע זאלן זיך געפינען אין איר שטוב. 'מַאן גָּרִים דָּא' ווער איז דאס אלעס גורם? 'הַהוּא שַׂעֲרָא דְּאִתְחֲזֵי מֵרֵישָׁהּ לְבַר' די פרוי וואס איר האר זעט זיך ארויס.

ביי אונז אין אמעריקע זענען אלע פרויען פון די היימישע חסידי'שע קהילות אפגעשוירן, ביי ענק אין ארץ ישראל איז דא א גרויסע צעמישעניש, מען פארדרייט דארט די מוחות, אז מען זאל ענדערש גיין מיט האר ווי א שייטל, די צדיקים פונעם פריערדיגן דור האבן אנדערש געזאגט: "ענדערש גיין א שייטל און זיך אפשערן, ווי איידער גיין מיט צען טיכלעך און גיין מיט די אייגענע האר".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת ואתחנן, ח' מנחם-אב, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

זיי מיר מוחל אויף וואס איך גיי דיר זאגן, איך געדענק דיך נאך פון אלס בחור ווען דו ביסט געווען נישט א שברי כלי, נאר שברי שברים; איך געדענק וואס פאר א מחשבות דו האסט געהאט, פון אנטלויפן וכו', און פון וועלן ענדיגן די לעבן השם ישמרינו; עס איז נישט ריכטיג צו ווארפן די שולד אויף די ווייב, דאס איז דיינע עבירות וואס לויפן דיך נאך, די חטאות נעורים און חטאת זקנים, פון זינדיגן אין פגם הברית, הוצאת זרע לבטלה רחמנא לצלן; דאס איז די גורם פאר די יסורים וואס דו גייסט אריבער, ווייל אלע צרות און יסורים וואס מען ליידט אין לעבן - קומט פון פוגם זיין בברית, פון זיך נישט היטן די אויגן, פון קוקן עבירות רחמנא לצלן ביז מען פאלט אין פגם הברית, הוצאת זרע לבטלה רחמנא לצלן, מען באשאפט דורכדעם קליפות ומשחיתים וואס פייניגן א גאנץ לעבן. אזוי ווי דער הייליגער רבי זאגט (ספר המדות אות נאוף, סימן כו): "עַל יְדֵי הוֹצָאַת זֶרַע לְבַטָּלָה בּוֹרֵא קְלִפּוֹת הַמִּתְלַבְּשִׁים בִּבְנֵי אָדָם מִתְנַגְּדִים וְחוֹלְקִים עָלָיו, וְעוֹשִׂין לוֹ יִסּוּרִין", דורך די עבירה פון פגם הברית, הוצאת זרע לבטלה רחמנא לצלן - באשאפט מען קליפות, און די קליפות גייען אריין אין מענטשן וואס קריגן זיך מיט אים און טוען אים אפ שרעקליכע יסורים.

עס איז זייער גרינג צו ווארפן די שולד אויף א צווייטן, טאטע מאמע זענען שולדיג, משפחה איז שולדיג, דער איז שולדיג, יענער איז שולדיג וכו' וכו'; ליבער ברודער, פארוואס פרעגן עצות פונעם טעלעפאן? פארוואס נישט נעמען די עצה פון צדיק, די עצה פון תשובה און תפילה; טו תשובה און בעט דעם אייבערשטן די שכינה זאל ריען צווישן ענק, איך בין זיכער אז אויב דו וועסט תשובה טון, דו וועסט מער נישט פוגם זיין, און אז דו וועסט בעטן דעם אייבערשטן ער זאל רחמנות האבן אויף דיר - וועט דיין ווייב נישט זיין 'כנגדו', זי וועט דיר זיין 'עוזרתו'.

דא האסטו א שיינע תפילה:

"הייליגער באשעפער זיי מיר מוחל אויף וואס איך האב געזינדיגט, איך האב חרטה אויף אלע מיינע שלעכטע מעשים, און איך נעם זיך פאר, איך זאג צו אז איך גיי מער נישט זינדיגן, ואני מאמין באמונה שלימה אז דאס וואס גייט אריבער אויף מיר פון מיין ווייב וכו' וכו' - איז צוליב מיינע עוונות ופשעים, חטאתי לפניך איך האב געזינדיגט פאר דיר, און דעריבער גייט אויף מיר איבער די יסורים. ווייל דו האסט מגלה געווען דורך די הייליגע צדיקים, דער הייליגער בעל שם טוב זכותו יגן עלינו, אז ווען א מענטש איז פוגם במחשבה, ער טראכט שלעכטע זאכן - ליידט ער נאכדעם צרות פון זיינע קינדער, און ווען מען איז פוגם בדיבור, מען רעדט זאכן וואס מען טאר נישט - ליידט מען צרות פון די ווייב, און ווען מען איז פוגם במעשה, מען זינדיגט מיט עבירות - ליידט מען יסורים פון מענטשן.

על כן באתי לפניך ה' אלוקי, איך האב חרטה אויף וואס איך האב געטון, איך וויל זיך אומקערן צו דיר. איך טו תשובה, איך גיי שוין זיין וואויל. איך בעט דיר אייבערשטער, העלף מיר איך זאל נישט ווערן ברוגז אויף מיין ווייב, איך זאל איר נישט פיינט האבן, איך זאל איר ווייטער ליב האבן, איך זאל געדענקן אז דאס איז נישט זי, זי וויל זיין גוט צו מיר, זי וויל זיין איינס מיט מיר, איך דארף מתקן זיין וואס איך האב פוגם געווען. אזוי ווי די הייליגע חכמים זכרונם לברכה זאגן (יבמות סג.) אויפן פסוק (בראשית ב, יח): "אֶעֱשֶׂה לּוֹ עֵזֶר כְּנֶגְדּוֹ", 'זָכָה' - דער וואס פירט זיך ווי אזוי מען דארף, 'עוֹזַרְתּוֹ' - ווערט זי אן עזר, זי העלפט אים, זי איז מיט אים, זי ווערט איינס מיט אים, 'לֹא זָכָה' - אז מען איז נישט זוכה, 'כְּנֶגְדּוֹ' - ווערט זי א פיינט.

העלף מיר אייבערשטער איך זאל געדענקען אז אלעס ביסטו, נישטא גארנישט אויסער דו; מיין ווייב, מיינע קינדער, מיין פרנסה - אלעס ביסטו אליינס. העלף מיר איך זאל נישט פרעגן מיינע שאלות פון די נייע טעכנעלאגיע 'עי איי', איך זאל פרעגן מיינע שאלות פון צדיקים וואס נעמען זייערע תשובות פון די הייליגע תורה, און וואס זענען זיך מוסר נפש פאר כלל ישראל אריינצושיינען די אמונה אין נשמות ישראל, אנא השם, רחם עלי, איך בעט דיר אייבערשטער, האב רחמנות אויף מיר, געב מיר שלום בית, געב מיר נחת פון מיינע קינדער, געב מיר פרנסה בשפע, בזכות די צדיקים וואס האבן זיך מוסר נפש געווען פאר דיינעט וועגן, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ, ה' צוּרִי וְגוֹאֲלִי".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת ראה, כ"ג מנחם-אב, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

וואויל איז דיר אז דו לערנסט דעם ספר אשר בנחל, מוהרא"ש דערציילט, מען האט אמאל אויסגעלויבט פארן הייליגן רבי נתן דעם ספר 'שני לוחות הברית' פונעם של"ה הקדוש זכותו יגן עלינו, אז דאס איז ממש א "כל בו", ווייל עס פארמאגט אין זיך אלעס: דרוש; חסידות וכו'; האט זיך רבי נתן אויסגעדריקט אויף זיינע ספרים 'ליקוטי הלכות': "מיינע ספרים איז דעם אייבערשטנ'ס גן עדן", ווייל ווען מען לערנט ליקוטי הלכות ווערט מען אזוי מחוזק, מען שפירט זיך ווי אין גן עדן; און מוהרא"ש האט אויסגעפירט: "דער ספר אשר בנחל איז דער אייבערשטער אליינס", ווייל מען קען נישט טרעפן נאך א ספר וואס זאל זיין אזא שטיק געטליכקייט אזוי ווי דער ספר; וואו מען עפנט נאר אויף דעם ספר, יעדע איינציגסטע בריוו - זעט מען די לויטערע ריינע אמונה און מען הייבט אן בענקען צום אייבערשטן.

זיי ממשיך מיטן לערנען די בריוון, עס איז נישט קיין חילוק וועלכע בענדער אשר בנחל, לערן די בענדער וואס רעדט צו דיין הארץ און צו דיין נשמה, ווייל די בריוון זענען א סך הכל פון אלע ספרים פון הייליגן רבי'ן און פון מוהרנ"ת, מיטן לערנען אשר בנחל וועסטו ווערן א בעל תשובה, ווייל דער רבי האט געזאגט (חיי מוהר"ן, סימן שמט): "שֶׁיְּכוֹלִין לִהְיוֹת נַעֲשֶׂה בַּעַל תְּשׁוּבָה גָּמוּר עַל יְדֵי לִמּוּד הַסֵּפֶר שֶׁלּוֹ", מען קען ווערן אן אמת'ער בעל תשובה אז מען לערנט זיין ספר ליקוטי מוהר"ן, "וְאָמַר, שֶׁמִּי שֶׁיֵּשֵׁב וְיַעֲסֹק בִּסְפָרָיו רַק בְּלִי קִנְטוּר וְנִצָּחוֹן, וְיִסְתַּכֵּל בּוֹ בֶּאֱמֶת, אָז בְּוַדַּאי יִהְיוּ נִבְקָעִין אֶצְלוֹ כָּל גִּידֵי קַשְׁיוּת לְבָבוֹ, ואמר בזו הלשון: "סע וועט אים אלע אדערן טרענען", און ווער עס וועט לערנען זיין ספר מיט אן אמת, וועט זיך אים עפענען אלע פארשטאפטע אָדערן און ער וועט ווערן אן ערליכער איד, נאך האט דער רבי געזאגט (שם, סימן שנח): "מיט יעדע שיחה וואס איך שמועס מיט ענק קען מען זיין אן ערליכער איד, און נישט סתם אן ערליכער איד נאר אן ערליכע איד אזוי ווי איך מיין אן ערליכער איד"; און רבי נתן זאגט (שם): "וְגַם אֲפִלּוּ עַכְשָׁו כְּשֶׁלּוֹמְדִין דְּבָרָיו הַקְּדוֹשִׁים יֵשׁ לָהֶם גַּם כֵּן כֹּחַ גָּדוֹל לְעוֹרֵר לְהַשֵּׁם יִתְבָּרַךְ לִזְכּוֹת לְדַרְכֵי ה' בֶּאֱמֶת, לְמִי שֶׁיָּשִׂים לִבּוֹ הֵיטֵב לִדְבָרָיו וּלְשִׂיחוֹתָיו הַקְּדוֹשִׁים הַנֶּאֱמָרִים בְּזֶה הַסֵּפֶר, וּבִשְׁאָר סְפָרָיו הַקְּדוֹשִׁים", דעם רבינ'ס ספרים פארמאגן א מורא'דיגן כח צו מעורר זיין א מענטש צו דינען דעם אייבערשטן, אין יעדע שמועס פון רבי'ן ליגן געוואלדיגע עצות און הדרכה פארן לעבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת ראה, כ"ג מנחם-אב, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

דו קענסט אנטון ווייסע זאקן לכבוד שבת אפילו ווען דיין טאטע גייט נישט אזוי, היינט איז דאס א חסידי'שער לבוש, אלע חסידי'שע אידן גייען מיט ווייסע זאקן שבת, עס וועט נישט זיין קיין פגם אין כיבוד אב ואם אז דו וועסט אנטון חסידי'שע קליידער, ווייל דער גרעסטער כיבוד אב ואם איז ווען עלטערן זעען ווי די קינדער פירן זיך אויף ערליך, אזוי ווי די הייליגע חכמים זאגן (יומא פו.) אויפן פסוק (דברים ו, ה): "וְאָהַבְתָּ אֵת ה' אֱלֹקֶיךָ" - זאלסט זען עס זאל ארויסקומען א קידוש השם דורך דיר, און דער אייבערשטער זאל באליבט ווערן דורך דיר, ווייל ווען א מענטש איז איידל און צניעות'דיג און פירט זיך ווי עס דארף צו זיין, וואס זאגן מענטשן? "אַשְׁרֵי אָבִיו שֶׁלִּמְּדוֹ תּוֹרָה", וואויל זענען זיינע עלטערן וואס האבן אים געלערנט תורה; "אַשְׁרֵי רַבּוֹ שֶׁלִּמְּדוֹ תּוֹרָה", וואויל איז פאר זיין רבי וואס האט אים געלערנט תורה; "אוֹי לָהֶם לַבְּרִיוֹת שֶׁלֹא לָמְדוּ תּוֹרָה", וויי איז פאר די מענטשן וואס לערנען נישט קיין תורה, ווען איינער פירט זיך אויף ערליך זאגן די מענטשן: "קוקט אן דעם מענטש, וויבאלד ער לערנט תורה פירט ער זיך אויף אזוי ערליך", אויף אים זאגט דער פסוק (ישעיהו מט, ג): "וַיֹּאמֶר לִי עַבְדִּי אָתָּה, יִשְׂרָאֵל אֲשֶׁר בְּךָ אֶתְפָּאָר", דער אייבערשטער בארימט זיך מיט אזא איינעם.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה.

בעזרת ה' יתברך

יום ד' פרשת ואתחנן, ח' מנחם-אב, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

מאך זיך נישט טאמעוואטע וועלכע טעלעפאן עס איז ענדערש צו קויפן פאר דיין ווייב; אודאי די מערסטע כשר'ע און די מערסטע פשוט'ע, וואס איז בכלל די שאלה...

די נסיונות ווערן שטערקער און שטערקער, מען ווייסט נישט וואס די מארגן וועט ברענגען, מיר דארפן רחמי שמים אויף אונזערע קינדער; דארף מען אוועק שטיין פון די גאס דאס מערסטע וואס איז מעגליך, און קויפן די טעלעפאן וואס די רבנים זאגן, אז מען קען האבן די טעלעפאן וואס האט נישט קיין וועג צו זען און הערן קיין שלעכטס.

דאס ווייסטו אז אפילו ביי די אומות העולם איז געווארן א רעש און א טומל, די אמעריקאנע רעגירונג וויל אוועק שטעלן תקנות אז די יוגנט זאל נישט האבן מער קיין צוטריט צו טעכנעלאגיע, אפילו זיי זאגן אז עס איז עק וועלט, נישט אז מיר דארפן ראיות פון זיי, נישט אז מיר קוקן אויף זיי; איז ווי קען מען זיך מאכן טעמאוואטע...

בעט דעם אייבערשטן דו זאלסט האבן אן ערליכע שטוב, דו, דיין ווייב, דיינע קינדער זאלן זיין אפגעהיטן פון די גרויסע נסיונות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת בהעלותך (שלח בא"י), י"ט סיון, שנת תשפ"ו לפרט קטן

... נרו יאיר

איך האב ערהאלטן דיין בריוו.

וואויל איז דיר אז דו ביסט מקפיד אויף אנגרייטן נעגל וואסער איידער דו גייסט שלאפן, אז אינדעפרי זאלסטו זיך קענען הייליגן מיט אפגיסן נעגל וואסער, און זייער גוט טוסטו אז דו ביסט מחזק אין שטוב דיין ווייב זי זאל זיך אויך וואשן ביים בעט נעגל וואסער, וואס דאס איז א יסוד היסודות אין א אידישע שטוב.

מוהרא"ש זאגט אז דער הייליגער רבי ר' זושא פון האניפאלי זכותו יגן עלינו האט מקבל געווען פון זיין רבי דער הייליגער מגיד פון מעזריטש זכותו יגן עלינו וואס ער האט דאס מקבל געווען פון הייליגן בעל שם טוב זכותו יגן עלינו אז מען טאר נישט אראפטרעטן פון בעט בעפאר מען גיסט זיך אפ נעגל וואסער, און ווער עס גייט אראפ פון בעט אן נעגל וואסער אויף אים איז געזאגט געווארן דעם פסוק (תהלים לו, ה): "יִתְיַצֵּב עַל דֶּרֶךְ לֹא טוֹב, רָע לֹא יִמְאָס", דאס שלעכטס וועט אים נאכלויפן א גאנצן טאג.

זיי מחזק דיין ווייב זי זאל זיין שטארק מיט נעגל וואסער, אזוי וועט איר זוכה זיין צו ערליכע קינדער. מוהרא"ש דערציילט, אמאל איז א פרוי געקומען צום גרויסן גאון דער סטייפלער זכותו יגן עלינו, זי האט געוויינט אז אירע קינדער פאלן אוועק פון אידישקייט, און ממש יעצט האט איר זון זיך אפגעשניטן די פיאות רחמנא לצלן, האט דער סטייפלער גאון איר געפרעגט: "איר גיסט זיך אפ נעגל וואסער אינדערפרי?" די פרוי איז רויט געווארן פאר בושה און מודה געווען אז זי גיסט זיך נישט אפ קיין נעגל וואסער, האט דער סטייפלער גאון איר געזאגט: "וואס ווילט איר פון מיר? אז מען גיסט נישט אפ נעגל וואסער בלייבט די טומאה אויף די הענט; וואס מען כאפט אן ווערט טמא, ממילא איז די גאנצע שטוב פול מיט א רוח טומאה רחמנא לצלן, וואס קען איך אייך טון אז איר אליינס האט גורם געווען די צרות?" זעט מען וואס פאסירט ווען מען גיסט זיך נישט אפ נעגל וואסער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת נשא ב' (בהעלותך בא"י), י"ב סיון, שנת תשפ"ו לפרט קטן

... נרו יאיר

ערשטנס מוז איך דיר זאגן אז איך בין זייער איבערגענומען פון דיר ווי דו שטארקסט זיך, און אפילו עס גייט אריבער אויף דיר אזויפיל שוועריקייטן - ביסטו ווייטער שטארק אין עבודת השם, דו לערנסט, דו דאווענסט און דו דערהאלטסט זיך.

ביי דיין פאל, אזא מעשה וואס דו גייסט אריבער – זאלסטו ענדערש בלייבן אין ישיבה אין ארץ ישראל, ווייל ווי אזוי וועסטו זיך קענען שטארקן ביי דיין מאמע אין שטוב ווען די מצב איז אזוי? ווי אזוי וועסטו קענען זיין אין א שטוב מיט אפענע אינטערנעט אן קיין פילטער? מען קען אלעס פארלירן; ענדערש בלייב אין ישיבה. זע צו האבן גוטע חברים, חברים וואס האבן תמימות, חברים וואס מאכן נישט קיין ליצנות פון ערליכע זאכן, פון הייליגע זאכן.

דער פסוק זאגט (משלי ג, לד): "אִם לַלֵּצִים", אויב א מענטש דרייט זיך מיט לצים - "הוּא יָלִיץ", וועט ער אויך ווערן א לץ, "וְלַעֲנָוִים", און אז מען דרייט זיך מיט ערליכע אידן, מען חבר'ט זיך מיט גוטע חברים, חברים וואס האבן אמונת חכמים, חברים וואס דרייען זיך ביי ערליכע אידן - "יִתֶּן חֵן", וועט מען אויך ווערן אן ערליכער איד און געפינען חן אינעם אייבערשטנ'ס אויגן.

נאר איין זאך, דראפע זיך און דערהאלט זיך, און אפילו עס איז דיר גאר ביטער - זאלסטו נישט אויפגעבן, נאר זיך דראפען און דערהאלטן, און גלייבן אז ביים סוף וועט דיר גוט ווערן.

דו ווייסט די מעשה מיט מוהרנ"ת, איידער ער איז מקורב געווארן צום הייליגן רבי'ן איז ער געווען ביי גרויסע צדיקים; ער איז געווען ביים הייליגן רבי ר' ברוך'ל ממעזיבוזש זכותו יגן עלינו, אויך איז ער געפארן צום הייליגן רבי ר' זושא מהאניפאלי זכותו יגן עלינו, ער איז געפארן צום צדיק הרב הקדוש רבי מרדכי מקרעמניץ זכותו יגן עלינו, צו הרב הקדוש רבי שלום מפראביטש זכותו יגן עלינו און צו הרב הקדוש רבי אברהם דוב מחמעלניק זכותו יגן עלינו; אלע צדיקים האבן אים זייער מקרב געווען, און זיך מיט אים משעשע געווען, אבער ער האט אלץ געשפירט עפעס א חסרון, ער האט געשפירט ווי עפעס פעלט אים, ביז אמאל האט ער זיך גע'חלומ'ט ווי עס שטייט א גרויסע לייטער, און ווי ער הייבט אן ארויפצוקריכן און ער פאלט אראפ, ער קריכט נאכאמאל ארויף און ער פאלט נאכאמאל צוריק, אזוי איז געווען יעדעס מאל, און יעדעס מאל וואס ער איז ארויף העכער איז ער געפאלן שטערקער, ביז ער איז שוין ארויף אלע טרעפ ביז אויבן, דעמאלט איז ער אראפגעפאלן און ער האט זיך מער נישט געקענט אויפשטעלן, פלוצלונג זעט ער א מענטש זאגט אים די ווערטער: "דראפע דיר און האלט זיך, שטארק דיך מיט אלע דיינע כוחות", און שפעטער ווען ער איז אנגעקומען צום רבי'ן האט ער געזען אז דער מענטש וועם ער האט געזען אין חלום ווי ער זאגט אים: "דראפע דיר און האלט זיך" - איז דער הייליגער רבי.

עס וועט נישט לאנג נעמען ביז דו וועסט טרעפן א גוטע שידוך און אויפשטעלן א שיינע שטוב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת נשא ב' (בהעלותך בא"י), י"א סיון, שנת תשפ"ו לפרט קטן

מרת ... תחי'

איך האב ערהאלטן אייער בריוו.

עס איז אזוי ווייטאגליך צו הערן די סארט מעשיות, ווי עלטערן קלאפן זייערע אייגענע קינדער מיט שרעקליכע ווערטער וואס מען קען עס נישט פארהיילן, די ווערטער שעדיגן די קינדער און עס באגלייט זיי און עס מאכט זיי שלעכט השם ישמרינו; זייט מחזק די תלמידה זי זאל זיך שטארקן, זי זאל טראכטן נאר פונעם אייבערשטן, און ווען זי דארף טון כיבוד אב ואם זאל זי טראכטן: 'איך טו עס פארן אייבערשטן וואס האט געזאגט מען זאל מכבד זיין טאטע מאמע'; דאס וועט איר העלפן קענען טון די מצוה, זי וועט נישט שוואך ווערן פון נאכגיין אירע געפילן וכו'.

די ווערטער וואס זי זאגט, אז דאס רעדן צום אייבערשטן דערהאלט איר - דאס דארף זיין א שטארקע חיזוק פאר אייך, און פאר אלע וואס זענען עוסק מיט קינדער, מען זאלן רעדן אסאך צו די קינדער פון התבודדות, און פון דעם אז דער אייבערשטער האט זייער ליב א איד, און אז קיינער וויל נישט האבן מיט דיר, די וועלט האט דיך אויסגעשלאסן, די משפחה האט דיך פארטריבן, די חברים האבן דיך באגראבן, און דיינע אייגענע ברידער און שוועסטער ווילן מיט דיר נישט האבן - איז דער אייבערשטער נאכאלץ מיט דיר, ער האט דיך ווייטער ליב, ער איז מיט דיר, ביי דיר, און נעבן דיר; רעד צו אים, בעט אים יעדע זאך, און דערצייל אים יעדע זאך; און דאס איז געווען פון וואס מוהרא"ש האט צו אונז גערעדט אלע יארן און געשריבן אלע יארן, מוהרא"ש האט אריינגעלייגט אין אונז אזא שטארקע אמונה אז מיר זענען געווארן אזוי זיכער מיט זיך, זיך נישט לאזן צעברעכן פון קיינעם, און אפילו מלאכים וועלן מיר מחליש דעת זיין, און די צדיקים וועלן מיך פארטרייבן - זאל מען וויסן אז דער איבערשטער איז מיט מיר, דעם אייבערשטן האב איך, און מוהרא"ש האט דערציילט די שרעקעדיגע חלום וואס דער הייליגער רבי האט דערציילט (חיי מוהר"ן, סימן צא), ווי אלע האבן אים אפגעלאזט, קיינער האט נישט געוואלט רעדן מיט אים, ער האט געדארפט אנטלויפן צו א צווייטע לאנד, און אויך אין יענע פרעמדע לאנד האט דער רבי געזען ווי ער דארף זיך באהאלטן, ער האט זיך באהאלטן אין וואלד.

אזוי זיצנדיג אין וואלד קומט צו צו אים אן עלטערער איד און הייבט אים אן געבן מוסר: "היתכן, דו שעמסט זיך נישט? אזוי פירסטו זיך אויף?! שעמסט זיך נישט פון דיינע זיידעס, רבי נחמן הורודענקער און פון דער הייליגער בעל שם טוב זכותו יגן עלינו? שעמסט זיך נישט פון תורת משה רבינו און פון די הייליגע אבות אברהם יצחק יעקב?! וואס מיינסטו, דו וועסט דען קענען בלייבן דא אין וואלד איינער אליין? דיין געלט וועט זיך ענדיגן און דו ביסט שוין שוואך"; דער עלטערער איד האט נישט אויפגעהערט צו באזידלען דעם רבי'ן, ער האט געזאגט פארן רבי'ן: "דו וועסט פון דא אויך מוזן אנטלויפן, און דארט וואו דו וועסט אנטלויפן וועסטו אויך נישט האבן קיין מנוחה, דו וועסט זיך דארט אויך מוזן באהאלטן פון די גרויסע עבירות וואס דו האסט געטון", האט אים דער רבי געזאגט: "אויב אזוי, וועל איך כאטשיג האבן יענע וועלט", זאגט די נשמה: דו מיינסט דו וועסט האבן יענע וועלט? "אֲפִילּוּ בְּגֵּיהִנּוֹם לֹא יִהְיֶה לְךָ מָקוֹם לְהִטָּמֵן שָׁם כִּי עָשִׂיתָ חֵטְא כָּזֶה", אפילו אין גיהנום וועסטו זיך מוזן פארשטעקן פאר אזעלכע הארבע עבירות, זאגט אים דער רבי: "לֶךְ לְךָ", גיי דיר אוועק, גיי דיר אוועק, איך האב געמיינט דו וועסט מיך טרייסטן, איך האב געקלערט דו וועסט רעדן צו מיין הארץ, יעצט אז דו מאכסט מיר יסורים, גיי גיי גיי; דאס איז דער לימוד וואס דער הייליגער רבי לערנט אונז: 'איך זאל זיך פון קיינעם נישט לאזן צעברעכן', און דאס דארפן מיר אריינלייגן אין די תלמידים ותלמידות.

דער אייבערשטער זאל העלפן איר זאלט האבן הצלחה אין אלע ענינים.

דער ראש ישיבה ענטפערט:

אויב מען וויל פאר זיך א וואקאציע - גייט מען, אויב איז דאס נישט קיין וואקאציע, נאר מען גייט צוליב משפחה - איז ענדערש בלייבן אין שטוב מיט די אייגענע משפחה.

א יונג קינד דארף זיך אויסגעבן; שפילן, שפרינגען און טאנצן.

עס פעלט נישט אויס צו טון אזויפיל פאר פרנסה, ענדערש אין די שעה זאלסטו זאגן אביסל תהלים און זיך אביסל מתבודד זיין.

בעזרת ה' יתברך

יום ג' פרשת בהעלותך (שלח בא"י), י"ז סיון, שנת תשפ"ו לפרט קטן

... נרו יאיר

דאס וואס האט פאסירט מיט דיר, מען האט אפגעלאזט די שידוך א חודש פאר די חתונה - איז זייער זייער א ווייטאגליכע מעשה, די ווייטאג איז א שרעקליכע ווייטאג, עס קען צערודערן דעם מענטש השם ישמרינו, ווייל מען האט זיך שוין געפרייט אז מען גייט חתונה האבן, די געפילן זענען געווען אזוי שטארק, מען האט ארויסגעקוקט אויף די שענסטע צייט וואס מען האט אין לעבן - און פלוצלונג בום... א קראך... א באמבע... אלעס אויס... די צער איז זייער שטארק.

דאך בעט איך דיר מיין ליבער ברודער, הארציגער חבר: "דראפע זיך און דערהאלט זיך"; חזר די אמונה, חזר זיך אז אלעס וואס פאסירט - קומט פונעם אייבערשטן, און אז עס קומט פונעם אייבערשטן - קען דאס נישט זיין שלעכט, ווייל פונעם אייבערשטן - גייט נישט ארויס קיין שלעכטס, און אז מיר פארשטייען דאס נישט - איז דאס נאכאלץ זיכער פאר אונזער טובה, און מיר קענען נישט פארשטיין דרכי המקום.

די שידוך וואס מען האט אפגעלאזט - איז אויך געווען דיין שידוך, און דאס וועט ברענגען נענטער דיין שידוך; אזוי האט דער הייליגער רבי מגלה געווען ווען דעם רבינ'ס ווייב איז נפטר געווארן. דער רבי געווען אין ראדוויל, דער רבי האט זייער שטארק געוואלט חתונה האבן, ער האט נישט געוואלט זיין אן א ווייב, דעמאלט זענען געקומען אסאך פרויען, זיי האבן זיך געוואלט משדך זיין מיט אים, האט דער רבי געזאגט (חיי מוהר"ן, סימן תקצה), אלע וואס זענען געקומען צו פארן זענען זיינע שידוכים, און אזוי איז ביי יעדן מענטש, מען האט כמה וכמה זיווגים, די שידוכים וואס מען רעדט איז אויך א בחינה פון שידוך, אפילו עס ווערט נישט אויסגעפירט, אפילו ווען מענטשן שמועסן ביי זיך אין שטוב, עס פאלט זיי ביי אז דער בחור וואלט גוט געווען פאר די מיידל - איז דאס א שידוך, אפילו ווען דער שידוך זאל זיך נישט אנהייבן און נישט ענדיגן - איז דאס אויך א בחינה פון א שידוך, "וְלִפְעָמִים נוֹסְעִים לַעֲשׂוֹת הַשִּׁדּוּךְ וּבְעֵת הַגְּמָר נִפְרָדִים מֵאֵיזֶה סִבָּה, וְלִפְעָמִים נִגְמָר הַשִּׁדּוּךְ וְאַחַר כָּךְ מַפְסִיקִים הַקֶּשֶׁר שֶׁל תְּנָאִים, וְלִפְעָמִים בָּאִין לִידֵי נִשּׂוּאִין וְאַחַר כָּךְ בְּסָמוּךְ נַעֲשֶׂה גֵּט בֵּינֵיהֶם. וְלִפְעָמִים אֵינוֹ נַעֲשֶׂה הַגֵּט עַד אַחַר אֵיזֶה זְמַן וְכַיּוֹצֵא בָּזֶה כַּמָּה בְּחִינוֹת שֶׁיֵּשׁ בְּעִנְיְנֵי הַשִּׁדּוּכִים וְהַזִּוּוּגִים שֶׁאֵינָם נִגְמָרִים אַחַר כָּךְ, אֲבָל כֻּלָּם הֵם בְּחִינַת זִוּוּגִים שֶׁלּוֹ. כִּי כָּל אֶחָד יֵשׁ לוֹ כַּמָּה זִוּוּגִים, רַק שֶׁאֵצֶל זֶה נִגְמָר אֵיזֶה זִוּוּג שֶׁלּוֹ עַל יְדֵי אֵיזֶה דִּבּוּר בְּעָלְמָא שֶׁמְּדַבְּרִים מִזֶּה הַשִּׁדּוּךְ, וְלִפְעָמִים עַל יְדֵי אֵיזֶה דִּבּוּר יוֹתֵר אוֹ עַל יְדֵי אֵיזֶה הִתְקַשְּׁרוּת אוֹ נְסִיעָה אוֹ עֻבְדָּא בִּשְׁבִיל הַשִּׁדּוּךְ לְפִי שָׁעָה וְכוּ' כַּנַּ"ל"; זעט מען פון דעם אז יעדע זאך וואס מען טוט פאר א בחור און פאר א מיידל כדי זיי זאלן טרעפן זייער שידוך - אפילו עס ווערט נישט - איז אויך עפעס, ווייל עס ווערט נענטער זייער ריכטיגער שידוך, עיין שם.

אז זי האט דיר געקענט טון אזא זאך, זאלסטו זיך פרייען אז דו האסט נישט חתונה געהאט מיט דיר, ווייל אז זי איז אזא מענטש וואס קען טון אזוינס - דארפסטו איר נישט האבן; מוהרא"ש האט אונז געלערנט א כלל אין לעבן, 'אז איינער דארף מיך נישט דארף איך יענעם טויזנט מאל נישט'.

נעם זיך צאם, הייב אן צוריק מיט דיין עבודת השם, גיי דאווענען דריי מאל א טאג די דריי תפילות מיט מנין, הייב אן צוריק לערנען דיינע שיעורים און נעם אראפ יעדן טאג אביסל צייט פאר התבודדות; גיי אין א שטילע פלאץ, דארט זאלסטו זיך מתבודד זיין, שמועס אויס דיין הארץ פארן אייבערשטן, דערצייל דעם אייבערשטן די גאנצע פרשה, ווי פרייליך דו ביסט געווען אז דו גייסט שוין כמעט חתונה האבן און פלוצלונג איז אלעס פארשוואונדן געווארן; בעט אים ער זאל דיר געבן כח זיך צו קענען דערהאלטן, און בעט אים דו זאלסט בקרוב טרעפן דיין שידוך.

ביטע מיר שרייבן ווען דו ווערסט א חתן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת שלח (קרח בא"י), כ"ו סיון, שנת תשפ"ו לפרט קטן

... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

דו פרעגסט, דער רבי זאגט (ספר המדות אות יראה חלק א, סימן לא): "לְיִרְאָה תֵּלֵךְ לַמִּקְוֶה", דורך מקוה באקומט מען יראת שמים, איז וואס זאגט דער רבי (שם, סימן לז): "גַּם שַׁ"י [שְׁלשׁ מֵאוֹת וָעֶשֶׂר] טְבִילוֹת מְסֻגָּלִין לְיִרְאָה", זיך טובל'ן דריי הונדערט און צען מאל - איז מסוגל פאר יראת שמים; אמער, ביים גיין אין מקוה איז מען שוין זוכה צו יראה?!

וויסן זאלסטו, אין יראת שמים איז דא אסאך מדריגות, עס איז נישט פשט אז איינמאל מען האט יראת שמים איז מען שוין גוט, מען דארף אלץ שטרעבן צו באקומען מער און מער יראה פונעם אייבערשטן; מוהרא"ש דערציילט, ווען דער הייליגער רבי זכותו יגן עלינו פון סאטמער איז געווען אין ארץ ישראל, אין טבריה, ביים קבר פונעם הייליגן רמב"ם, האט ער דערציילט א פחד פון א מעשה, אז דער הייליגער ישמח משה זכותו יגן עלינו האט אמאל זייער געבעטן דעם אייבערשטן אז ער וויל זוכה זיין צוצוקומען צו די מדריגה, מורא האבן פונעם אייבערשטן אזוי ווי די אבות הקדושים האבן מורא געהאט, און מען האט אים מודיע געווען פון הימל אז עס איז נישט שייך, ער וועט דאס נישט קענען אויסהאלטן. האט דער הייליגער ישמח משה געבעטן, אפשר קען ער באקומען די יראה וואס די תנאים האבן געהאט, האט מען אים אויך מודיע געווען פון הימל אז ער וועט דאס נישט קענען אויסהאלטן, האט ער געבעטן אלץ לויט די שפעטערע דורות, ביז ווען ער האט געבעטן דעם רמב"ם'ס יראה, האט מען אים דאס געגעבן, און דער הייליגער ישמח משה האט דאס נישט געקענט אויסהאלטן, ער האט אוועק גע'חלש'ט; זעט מען פון דעם אז אין יראת שמים קען מען אלץ זוכה זיין צו מער און מער, דאס גייט העכער און העכער.

העיקר זאלסטו גיין אין מקוה יעדן טאג, און ווען דו טובל'סט זיך זאלסטו אינזין האבן שם א-ק-י-ק במילוי ההין: אל"ף ה"ה יו"ד ה"ה, וואס באטרעפט קנ"א (151), אזוי ווי מקו"ה (151), און האב אינזין: 'אֶקֱיֶ"ק, אֲנָא זָמִין לְמֵהֱוֵי' (לקוטי מוהר"ן חלק א, סימן ו), איך וויל זיין גוט, איך וויל זיין ערליך און הייליג; זאג פארן באשעפער אז דו גייסט שוין זיין אן ערליכער איד, היטן די אויגן, היטן די מחשבה, היטן דעם דיבור, און אזוי ווייטער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת שלח (קרח בא"י), כ"ד סיון, שנת תשפ"ו לפרט קטן

...

ליין קריאת שמע שעל המיטה, גיי נישט אין בעט איידער דו ליינסט קריאת שמע, און אז דו קענסט ליינען קריאת שמע של אריז"ל, זאגן די וידוי, אשמנו בגדנו וכו' - דארפסטו מער נישט מורא האבן, ווייל רבי נתן זאגט (לקוטי הלכות קריאת שמע שעל המטה, הלכה ב), אז ווען א מענטש ליינט קריאת שמע ביינאכט פאר ער גייט שלאפן און ער איז זיך מתוודה – "אֵינוֹ זָז מִשָׁם עַד שֶׁמוֹחֲלִין לּוֹ", איז מען אים מוחל אויף אלע זיינע עבירות, און מען דארף נישט מורא האבן.

אז דו האסט מורא פון שטארבן זאלסטו טראכטן פון תחיית המתים, דער הייליגער רבי זאגט (ספר המדות אות אמונה חלק ב', סימן יז): "מִי שֶׁאֵינוֹ יָכוֹל לִישֹׁן, יַעֲלֶה עַל מַחֲשַׁבְתּוֹ אֱמוּנַת תְּחִיַּת הַמֵּתִים", ווער עס קען נישט איינשלאפן זאל טראכטן פון תחיית המתים; לכאורה, וואס העלפט תחיית המתים פאר איינעם וואס קען נישט איינשלאפן? נאר געווענליך ווען מען וויל איינשלאפן, הייבט מען אן טראכטן אלע שרעקעדיגע זאכן, עס הייבן אן קומען דמיונות: 'וואס וועט זיין?' 'אפשר גיי איך שטארבן וכו' וכו'?' אויף דעם זאגט דער רבי, טראכט פון תחיית המתים; דאס הייסט, ביים סוף וועט זיין גוט, אפילו מען גייט שטארבן, גייט מען אויפשטיין תחיית המתים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת שלח (קרח בא"י), כ"ו סיון, שנת תשפ"ו לפרט קטן

מרת ... תחי', תלמידת בית פיגא

איך האב ערהאלטן אייער בריוו.

פארוואס ליינט איר נייעס? דאס איז די שכר פון ליינען נייעס, מען לעבט אין פחד, מען לעבט מיט מורא, ביז מען דארף נעמען מעדעצין.

ליינט נישט קיין נייעס און הערט נישט קיין נייעס – וועט איר לעבן א רואיגע זיסע לעבן, איר וועט הנאה האבן פון די שיינע וועלט וואס דער אייבערשטער האט באשאפן, איר וועט האבן שטארקע נערווען מיט א שטארקע מח; א רחמנות אויף די וואס לעבן מיט די נייעס, מען רודפ'ט זיך, אזוי ווי דער הייליגער מנחת אלעזר זכותו יגן עלינו זאגט (ספר חיים ושלום, פרשת בחוקותי), אויפן פסוק (ויקרא כו, לו): "וְרָדַף אֹתָם קוֹל עָלֶה נִדָּף", א בלעטל, דאס מיינט מען דעם צייטונג בלעטל – וועט ענק רודפ'ן.

א בית פיגא תלמידה נעמט נישט אין האנט די זאכן, און הערט נישט די זאכן.

בעזרת ה' יתברך

יום ה' פרשת בהעלותך (שלח בא"י), י"ט סיון, שנת תשפ"ו לפרט קטן

... נרו יאיר

איך האב ערהאלטן דיין בריוו.

דאס בעסטע וואלט געווען אז דו זאלסט דאס דורכשמועסן פערזענליך מיט דיין רבי, דיין מורה דרך, און ער וועט דיך העלפן מיט דעם.

דער עיקר זאלסטו נישט אויפהערן דאנקען דעם אייבערשטן אז דו האסט זוכה געווען צו חתונה מאכן דיינע קינדער, אין איין יאר האסטו חתונה געמאכט צוויי קינדער; דאס איז דאך די גרעסטע רייכטום.

דאנק און לויב דעם אייבערשטן; ווי מער מען דאנקט דעם אייבערשטן - אלץ מער עפנט זיך אין הימל א טיר פאר ישועות. דער הייליגער רבי נתן זאגט, ווען מען דאנקט און מען לויבט דעם אייבערשטן זאגט דער אייבערשטער כביכול אין הימל פאר די מלאכים: "קוקט דעם מענטש, ער דאנקט מיר און ער לויבט מיר, איך וועל אים געבן אזויפיל גוטס, אסאך מער וויפיל ער האט, אסאך מער וויפיל עס קומט אים, ער זאל מיר נאך מער דאנקען", און אזוי זאגט דער הייליגער רבי ר' אלימלך זכותו יגן עלינו, אז ווען א מענטש דאנקט דעם אייבערשטן אויף די חסדים, ער דערציילט פאר יעדן איינעם די ניסים וואס דער אייבערשטער טוט מיט אים - וועט אים דער אייבערשטער מאכן נאך ניסים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת בהעלותך (שלח בא"י), י"ט סיון, שנת תשפ"ו לפרט קטן

... נרו יאיר

איך האב ערהאלטן דיין בריוו.

דער הייליגער רמב"ם פסק'נט (פרק א מהלכות תשובה, הלכה א), אויב מען האט עובר געווען אויף איינע פון די מצוות פון די הייליגע תורה, סיי בשוגג סיי במזיד; ווען מען טוט תשובה - דארף מען זיך מתודה זיין צום אייבערשטן, דערציילן דעם אייבערשטן וואס מען האט געטון מען זאל זאגן: "אָנָּא הַשֵּׁם, חָטָאתִי עָוִיתִי פָּשַׁעְתִּי לְפָנֶיךָ, וְעָשִֹיתִי כָּך וָכָךְ, וַהֲרֵי נִחַמְתִּי וּבוֹשְׁתִּי בְּמַעֲשַׂי, וּלְעוֹלָם אֵינִי חוֹזֵר לְדָבָר זֶה", איך בעט דיר אייבערשטער, איך האב געזינדיגט פאר דיר, איך האב געטון די און די עבירה, (אויסשמועסן וואס מען האט געטון), און איך האב חרטה אויף וואס איך האב געטון, איך שעם זיך מיט מיינע מעשים וואס איך האב געטון, איך נעם זיך פאר אז איך גיי עס מער קיינמאל נישט טון; דאס איז וידוי, און דער רמב"ם פירט אויס: "וְכָל הַמַּרְבֶּה לְהִתְוַדּוֹת וּמַאֲרִיךְ בְּעִנְיָן זֶה", ווער עס פארמערט זיך מתודה צו זיין פארן אייבערשטן – "הֲרֵי זֶה מְשֻׁבָּח", דער איז געלויבט.

דערצייל אלעס פארן אייבערשטן, נישטא קיין גרעסערע זאך ווי ווען מען קומט צום אייבערשטן און מען באהאלט גארנישט, מען קומט מיט אן אמת, מען דערציילט אלעס. חכמינו זכרונם לברכה זאגן (תורת כהנים בחוקותי, פרק ח): "מִיָּד שֶׁהֵם מִתְוַדִּים עַל עֲוֹנוֹתֵיהֶם, מִיָּד אֲנִי חוֹזֵר וּמְרַחֵם עֲלֵיהֶם", גלייך ווען א מענטש איז זיך מתודה פארן אייבערשטן, האט דער אייבערשטער רחמנות אויף אים און נעמט אים צוריק צו אים.

שטארק זיך מיט די עצה פון רבי'ן פון גיין התבודדות, הייב אן מיט דאנקען דעם אייבערשטן, שפעטער זאלסטו זיך מתודה זיין, דערצייל אלעס, אזוי וועלן די עבירות ארויסגיין פון דיינע ביינער. די הייליגע חכמים זאגן (תנא דבי אליהו רבה, ד), "אָמַר הַקָּדוֹשׁ בָּרוּךְ הוּא", דער אייבערשטער זאגט: "אִם אָדָם עוֹבֵר עֲבֵירָה לְפָנַי, אִם חוֹזֵר וְעוֹשֶׂה תְּשׁוּבָה", אויב א מענטש האט געזינדיגט, אויב האט ער חרטה אויף וואס ער האט געטון און ער טוט תשובה - "הֲרֵי אֲנִי עִמּוֹ בְּרַחֲמִים וַאֲנִי מְקַבֵּל אֶת תְּשׁוּבָתוֹ", נעם איך אים צוריק, איך נעם אן זיין תשובה, "וְאֵין אֲנִי זוֹכֵר לוֹ אֲפִילוּ מִקְצָת עֲוֹנוֹתָיו", און איך וועל נישט דערמאנען קיין איין עבירה; נאך זאגט דער אייבערשטער (שם, פרק ו): "בָּנַי, אֲנִי אָמַרְתִּי לָכֶם אֵין חֶפְצִי אֶלָּא בְּרָכָה וּבְמִי שֶׁאֵין בּוֹ עֲבֵרוֹת", איך האב ענק געזאגט איך וויל נאר די מענטשן וואס האבן נישט געזינדיגט, "וְחָזַרְתִּי בּוֹ בִּדְבָרַי", יעצט צי איך צוריק, "אֲפִלּוּ יַעֲשֶׂה אָדָם מֵאָה עֲבֵרוֹת זוֹ לְמַעְלָה מִזּוֹ", אפילו א מענטש וועט טון הונדערט עבירות איינס נאכן צווייטן, "וְיַחֲזֹר וְיַעֲשֶׂה תְּשׁוּבָה", אויב וועט ער חרטה האבן, ער וועט תשובה טון, "וְיַשְׁפִּיל אֶת עַצְמוֹ לָאָרֶץ, וְיִרְאֶה אֶת עַצְמוֹ כְּאִלּוּ הוּא חֶצְיוֹ זַכַּאי וְחֶצְיוֹ חַיָּב, וְיִרְאֶה אֶת עַצְמוֹ כְּאִלּוּ חַיָּב בְּאָשָׁם תָּלוּי בְּכָל יוֹם", ער וועט שטענדיג טראכטן 'איך דארף נאך תשובה טון' - "הֲרֵינִי עִמּוֹ בְּרַחֲמִים וּמְקַבְּלוֹ בִּתְשׁוּבָה", וועל איך זיך פירן מיט אים מיט רחמנות, איך וועל אננעמען זיין תשובה, "וְאֶתֵּן לוֹ בָּנִים שֶׁל בַּעֲלֵי קוֹמָה וְעוֹסְקֵי בַּתּוֹרָה וּמְקַיְּמֵי מִצְוֹת", און איך וועל אים געבן קינדער צדיקים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת בהעלותך (שלח בא"י), י"ט סיון, שנת תשפ"ו לפרט קטן

מרת ... תחי'

איך האב ערהאלטן אייער בריוו.

יעדע זאך האט זיין צייט, א אידישע מאמע וואס געבט צו זייגן און איז פארפארעט מיט די פיצלעך קינדער - דארף האבן כח און מח, און עס איז נישט שייך צו זיין פארנומען מיט די זאכן; אפילו פון דאווענען - וואס איז אזוי הייליג און אזוי גרויס, די וועלט שטייט אויף דאווענען - זענען פרויען מיט קליינע קינדער פטור, ווייל די מח און די כח דארף מען פאר די פיצלעך, איז דאך זיכער אז יעצט איז נישט קיין צייט פאר די זאכן, פון ווייניג עסן וכו' וכו'.

מען דארף זיך בעיקר פארלייגן אויף זיין פרייליך, זיין אין א גוטע גיסטע, דער הייליגער רבי האט אונז זייער אנגעזאגט מיר זאלן זיין פרייליך, מיר זאלן זיך פארלייגן צו זיין פרייליך, און אפילו זיך מאכן פרייליך; ווייל דאס איז די טריק ווי אזוי מען איז מצליח, דער הייליגער רבי זאגט (ספר המדות אות שמחה חלק ב', סימן א): "מִי שֶּׁהוּא שָׂמֵחַ תָּמִיד, עַל יְדֵי זֶּה הוּא מַצְלִיחַ", ווער עס איז פרייליך איז מצליח.

דער אייבערשטער זאל העלפן איר זאלט האבן הצלחה אין אלע ענינים.

 בעזרת ה' יתברך

יום ה' פרשת בהעלותך (שלח בא"י), י"ט סיון, שנת תשפ"ו לפרט קטן

... נרו יאיר

הדבר הראשון פארליר זיך נישט, דער אייבערשטער וועט דיך נישט פארלאזן, דו וועסט נאך ארויס גיין פון אלע דיינע חובות, דו דארפסט זיך נאר דערהאלטן, נישט אויפגעבן, נישט לאזן די עצבות ומרה שחורה דיך פארכאפן.

די וועג פאר הצלחה אין פרנסה איז צו זיין פרייליך, מוהרא"ש זאגט נאך פון צדיקים, עס שטייט אין פסוק (דברים טז, טו): "וְהָיִיתָ אַךְ שָׂמֵחַ", און דו זאלסט זיין נאר פרייליך; די סופי תיבות פון וְהָיִיתָ' אַךְ' שָׂמֵחַ' איז דער שם "חַתָּ"ךְ", די שם פון פרנסה; ווייל שמחה איז מסוגל פאר פרנסה.

לאז דיך נישט צעברעכן פון קיין שום זאך, און לאז נישט די עצבות ומרה שחורה דיך איבערנעמען, ווייל דיין הצלחה איז געוואנדן אין דיר, אין דיין מצב רוח; אויב דו ביסט פרייליך וועסטו זייער מצליח זיין, און חס ושלום אז דו וועסט לאז די עצבות ומרה שחורה ביי דיר - וועסטו אלעס פארלירן חס ושלום, ווייל דער הייליגער רבי זאגט (ספר המדות אות שמחה חלק ב, סימן א): "מִי שֶׁהוּא שָׂמֵחַ תָּמִיד, עַל יְדֵי זֶה הוּא מַצְלִיחַ", דער וואס איז שטענדיג פרייליך איז שטענדיג מצליח.

עס איז נישט גרינג צו זיין פרייליך, עס איז גאר א שווערע עבודה. מוהרא"ש זאגט, עס איז גרינגער צו פאסטן און טון סיגופים - ווי זיין פרייליך; ווייל די נאטור איז - צו זיין טרויעריג, אויף יעדן מענטש גייט אריבער שוועריקייטן אין לעבן, און דאס שלעפט אים אראפ אין דאגות און אין מרה שחורה. אזוי ווי דער הייליגער רבי זאגט (לקוטי מוהר"ן חלק ב, סימן כד): "כִּי טֶבַע הָאָדָם לִמְשֹׁךְ עַצְמוֹ לְמָרָה שְׁחֹרָה וְעַצְבוּת מֵחֲמַת פִּגְעֵי וּמִקְרֵי הַזְּמַן, וְכָל אָדָם מָלֵא יִסּוּרִים", יעדער איינער האט זיך זיינע שוועריקייטן אין לעבן וואס מאכט אים דערביטערט און צוגעלייגט, "עַל כֵּן צָרִיךְ לְהַכְרִיחַ אֶת עַצְמוֹ בְּכֹחַ גָּדוֹל לִהְיוֹת בְּשִׂמְחָה תָּמִיד, וּלְשַׂמֵּחַ אֶת עַצְמוֹ בְּכָל אֲשֶׁר יוּכַל וַאֲפִילּוּ בְּמִלֵּי דִּשְׁטוּתָא", און מען דארף פרובירן מיט אלע כוחות צו זיין פרייליך; מען דארף זיך פרייליך מאכן מיט וואס מען קען - אפילו מיט נארישקייטן.

דער אייבערשטער זאל העלפן זאלסט האבן הצלחה אין אלע ענינים.