ל ניסן תשפ"ו

בעזרת ה' יתברך - ערב שבת קודש לסדר טהרה, א' דראש חודש אייר, שנת תשפ"ו לפרט קטן

 

לכבוד ... נרו יאיר

שבת איז א צייט פון חינוך הילדים, שבת זאלסטו פארברענגען מיט דיינע קינדער; שמועס מיט זיי פון אמונה, שמועס מיט זיי פון צדיקים, באזונדער אויפן וועג צום שול און אויפן וועג אהיים; דעמאלט איז א גוטע צייט צו רעדן מיט די קינדער, און אויך ביי די סעודה זאלסטו זיין פרייליך און זיי פרייליך מאכן.

שבת אין שול זאלסטו נישט זיצן מיט חברים וואס שמועסן, דיינע קינדער זעען דאס און זיי באקומען א נישט גוטע חינוך, שפעטער ווען זיי וועלן גרויס ווערן וועלן זיי בכלל נישט קומען אין שול, זיי וועלן אלעס אפלאזן, און אפילו דו מיינסט אז דיינע קינדער זענען נאך קליין, זיי כאפן נישט, דאס איז א געלעכטער; די קינדער ווייסן אלעס און כאפן אלעס, אין א בחינה ווייסן זיי נאך מער ווי דו ווייסט אליינס, די קינדער קענען דעם טאטן בעסער ווי דער טאטע קען זיך אליינס. איך בעט דיר, שבת אין שול זאלסטו זיצן מיט דרך ארץ, שמועס נישט מיט קיינעם, זעץ זיך מער ארויף, מער פון אויבן, נישט ביים עק, אויך ביי שלש סעודות זיץ מיט די אידן וואס זיצן ביים טיש מיט שטריימל און בעקיטשע און זינגען זמירות, זיץ נישט ביים עק טיש וואו מען שמועסט, אדער גאר מיט די מתמידים וואס זאגן משניות וכו'.

יעצט זומער איז דא לאנגע פרייטאגס און לאנגע שבת נאכמיטאגס, זאלסטו זיך קובע זיין צו לערנען דיינע שיעורים, שבת איז א צייט פון לערנען תורה; לערן משניות, גמרא וכו'.

אויך זאלסטו נישט מאכן קיין שלש סעודות אין שטוב פאר חברים, עס איז נישט כדאי; סיי דו גיי נישט אין דיין חבר'ס הויז און סיי רוף נישט קיין חברים אין דיין הויז, האלט דיין הויז פריוואט.

א גוט שבת און א גוטן חודש.