ב אדר ב' תשפ"ד

בעזרת ה' יתברך - יום ג' פרשת פקודי, ב' אדר ב', שנת תשפ"ד לפרט קטן

 

לכבוד ... נרו יאיר

געב אכטונג אויף דיין שלום בית מער ווי אויף אלעם, דיין ווייב זאל דיר זיין טייער, רעד צו איר מיט דרך ארץ, רעד צו איר שיין און ווייך.

אז דו ווערסט נערוועז פון דיין ווייב - זאלסטו גיין אין וואלד און שרייען קולי קולות: "הייליגער באשעפער וואס איז מיט מיר? וואס האט פאסירט מיט מיר אז איך בין אזוי מזלזל אין די מתנה וואס דו האסט מיר געגעבן? העלף מיר איך זאל האבן שלום בית, העלף מיר איך זאל קענען פטור ווערן פון מיין פארשטינקענע גאווה".

דער אייבערשטער זאל העלפן זאלסט האבן הצלחה אין אלע ענינים.

---

בעזרת ה' יתברך - יום ג' פרשת פקודי, ב' אדר ב', שנת תשפ"ד לפרט קטן

 

לכבוד ... נרו יאיר

שטארק זיך מיט אלע דיינע כוחות, געוואוין זיך צו צו רעדן צום אייבערשטן, ווי מער מען רעדט צום אייבערשטן - אלץ מער ווערט מען צוגעקלעבט צו אים, מען ווערט א שטארקער מענטש, עס גייט מער נישט אן וואס דער זאגט און וואס יענער זאגט.

עס זאל דיר נישט אנגיין וואס מענטשן זאגן, עס זאל דיך נאר אינטערעסירן צו לעבן מיטן אייבערשטן; א שאד צו זיין אנגעהאנגען אין מענטשן, טראכטן וואס דער וועט זאגן און וואס יענער וועט זאגן, עס דארף נאר אינטערעסירן צו זיין באהאפטן צום אייבערשטן.

נעם זיך פאר אנצוטון יעדן טאג די הייליגע תפילין, בינד צו דיין האנט מיט די הייליגע תפילין און בינד צו דיין קאפ מיט די הייליגע תפילין; וועסטו זיין צוגעבינדן צום אייבערשטן.

דעם קומענדיגן ליל שישי וועט זיין די שיעור אינאיינעם מיט א מסיבה פאר הכרת הטוב און אויך א סיום ירושלמי מסכת שבת. עס איז נאכנישט צו שפעט, קענסט היינט אנהויבן לערנען יעדן טאג א בלאט בבלי, א בלאט ירושלמי און א פרק תוספתא. א טאג וואס מען לערנט די הייליגע תורה - איז א טאג, נאר מיט תורה איז די טאג א טאג, אן תורה האט מען גארנישט, אן תורה איז מען נאקעט, אן תורה איז מען ארעם.

דער אייבערשטער זאל העלפן זאלסט האבן הצלחה אין אלע ענינים.