ד ניסן תשפ"ה

בעזרת ה' יתברך - יום ד' פרשת ויקרא, ד' ניסן, שנת תשפ"ה לפרט קטן

 

לכבוד ... נרו יאיר

דער הייליגער קדושת לוי זכותו יגן עלינו האט אונז אנטפלעקט וואס טוט זיך אפ מיטן אנגרייטן דעם יום טוב פסח, אז די זעלבע מלאכים וואס ווערן באשאפן ביים שופר בלאזן ראש השנה - ווערן באשאפן ביים רייניגן די שטוב פון חמץ און ביים אריינברענגען דעם יום טוב פסח. אלע שטייען מיט א שטארקע געפיל ראש השנה ביי די תקיעות, מען איז דארט מיטן גאנצן הארץ, אן קיין פיינטשאפט; אזוי דארפן מיר זיין ביים אויסרוימען די חמץ, דאס טון מיטן גאנצן הארץ און געפיל, מיט שמחה, אן קיין פיינטשאפט, אן קיין קרעכצן.

פארגעס נישט פון די באהאלטענע חמץ וואס ליגט טיף טיף באהאלטן אין הארץ, אין מח, די קשיות און טענות אויפן אייבערשטן און אויף צדיקים. יעצט ביים אויסרוימען די חמץ, ביים כשר'ן, ביים גיסן די הייסע וואסער - זאלסטו בעטן דעם אייבערשטן: "הייליגער באשעפער כשר מיין הארץ, כשר מיין מח, איך זאל נישט האבן קיין קשיות אויף דיר, איך זאל נישט זיין מיט טענות אויף דיר, איך זאל גלייבן באמונה שלימה מיט מיין גאנצע הארץ אז דו מאכסט נישט קיין שלעכטס, אלעס איז גוט, כל מה דעביד רחמנא לטב עביד, אלעס טוסטו נאר פאר גוט, הייליגער באשעפער איך וויל ארויסנעמען די זויערקייט פון מיר, איך וויל שוין ווערן ערליך און פרייליך".

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.