ה אדר א' תשפ"ד

בעזרת ה' יתברך - יום ד' פרשת תרומה, שובבי"ם, ה' אדר א', שנת תשפ"ד לפרט קטן

 

לכבוד ... נרו יאיר

די גרעסטע צדקה איז געבן א שמייכל פאר א צווייטן, א גוט ווארט; "א גוט מארגן", "א גוטע נאכט", מיט א שמייכל קען מען מחי' מתים זיין; מענטשן גייען ארום דערביטערט, דערשלאגן, און ווען מען ווייזט א שמייכל, מען פארגינט א גוט ווארט - איז מען זיי ממש מחי'.

עס קאסט נישט קיין געלט, עס איז אומזיסט און עס איז די גרעסטע צדקה. מוהרא"ש זאגט, געבן א שמייכל, געבן א גוט ווארט פאר א צווייטן - איז ווערד טויזנט מאל מער ווי צדקה פון געלט, ווייל אז מען געבט געלט - נאך א טאג נוצט זיך אויס דאס געלט, אבער ווען מען בלאזט אריין א חיות אין א צווייטן - געבט מען יענעם לעבן.

החכם עיניו בראשו זיך גרייטן צו קענען זיין ביים הייליגן רבי'ן אין אומאן אינאיינעם מיט חבורת היכל הקודש. עס קומען צו פרישע מקורבים, פרישע תלמידים, און ווי עס זעט אויס וועלן מיר נישט קענען אוועקלייגן קיין פלעצער פאר די וואס האבן שוין א זכות פון די פריערדיגע יארן. איז גוט זאלסט שוין נעמען א פלאץ פאר דיר, און אויב דו ברענגסט דיינע קינדער - איז גאר וויכטיג צו זיין אין א ריינע אפגעהיטענע פלאץ; איז זיכער כדאי שוין צו נעמען פלעצער צו קענען זיין מיט דיינע קינדער אינאיינעם ביים הייליגן רבי'ן.

מיטן אייבערשטנ'ס הילף, דעם שבת וועל איך זיין אין וויליאמסבורג.

דער אייבערשטער זאל העלפן זאלסט האבן הצלחה אין אלע ענינים.

---

בעזרת ה' יתברך

יום ד' פרשת תרומה, שובבי"ם, ה' אדר א', שנת תשפ"ד לפרט קטן

לכבוד ... נרו יאיר

די גרעסטע צדקה איז העלפן דרוקן דעם רבינ'ס ספרים און דאס פארשפרייט פאר אלעמען. בפרט ווער עס האט פוגם געווען בברית, אין הוצאת זרע לבטלה רחמנא לצלן, אדער געפאלן אין ניאוף, מיט נשג"ז, רחמנא לצלן רחמנא לישזבן - איז זיין תיקון צו דרוקן די ספרים און דאס פארשפרייטן, אזוי וועט ער פאררעכטן וואס ער האט פוגם געווען.

עס איז דא אסאך ספרים, אסאך גוטע זאכן, אבער פון איין זאך רעדט קיינער נישט; קיינער רעדט נישט צו די בחורים און אינגעלייט וואס זענען געפאלן אין פגם הברית, די וואס זענען נעבעך אריינגעפאלן אין די נעץ פונעם שטן, זיי ליגן אין די טומאה פון ניאוף, זיי גייען ארום זייער פארלוירן, זייער צעבראכן, זיי טראכטן מחשבות פון זיך נעמען דאס לעבן, און נאר די ספרים און קונטרסים פון מוהרא"ש רעדט צו זיי, איז זיי מחזק און ווייזט זיי די וועג צוריק צו קומען צום אייבערשטן.

געב דיין צדקה צו דרוקן די ספרים פון רבי'ן, בפרט די ליכטיגע זיסע קונטרסים פון מוהרא"ש און די הייליגע בריוו פון אשר בנחל, וואס איז מחי' ומחזק אלפים ורבבות; וועסטו אלעס מתקן זיין.

מארגן וועט זיין די ליל שישי שיעור אין ישיבה.

דער אייבערשטער זאל העלפן זאלסט האבן הצלחה אין אלע ענינים.

~~~

בעזרת ה' יתברך

יום ד' פרשת תרומה, שובבי"ם, ה' אדר א', שנת תשפ"ד לפרט קטן

לכבוד מיינע טייערע תלמידים, אנשי שלומינו שיחיו, תושבי קרית ברסלב ליבערטי

היינט נאכט איז דא אן אסיפת הורים פאר אלע עלטערן וואס שיקן די קינדער אין חדר, עס איז זייער וויכטיג צו האבן א שייכות מיט די מלמדים פון די קינדער, און נאך מער וויכטיג איז - האבן א שייכות מיטן מנהל.

ובכן וויל איך בעטן אלע עלטערן וואס שיקן ביי אונז אין חדר זאלן קומען צו די אסיפה, אלע זאלן קומען צייטליך, זיך טרעפן מיטן מלמד און אויך מיטן מנהל. זאג אלעס וואס ליגט דיר אויפן הארץ; אז דו טראכסט מיר מאכן נישט עפעס אדער דו זעסט עפעס וואס שמעקט נישט גוט - זאלסטו אלעס אויסשמועסן, מיר ווילן וויסן יעדע זאך וואס שטערט, מיר זענען דא צו ארבעטן אינאיינעם פאר די הצלחה פון די קינדער.

דער אייבערשטער זאל העלפן איר זאלט האבן הצלחה אין אלע ענינים.