ו תשרי תשפ"ד

בעזרת ה' יתברך - יום ה' פרשת האזינו ב', ו' תשרי, שנת תשפ"ד לפרט קטן

לכבוד ... נרו יאיר

געב אכטונג אין שטוב עס זאל נישט זיין קיין קריגערייען. זיי מכבד דיין ווייב, געב אכטונג אויף איר כבוד. נעם די זאך זייער ערנסט, ווייל אלע צרות וואס קומט אויפן מענטש - איז נאר ווייל ער איז מזלזל אין זיין ווייב, ער טוט איר וויי.

היינט נאכט וועט זיין די וועכנטליכער ליל שישי שיעור אין ישיבה. איך האף דו וועסט קומען, עס איז וויכטיג צו קומען זיך אויפוועקן און אויפפרישן מיט די רבינ'ס עצות, עס איז נישט גענוג אז מען האט דאס געהערט נעכטן, יעדן טאג דארף מען פון פריש חיזוק. ווייל חכמינו זכרונם לברכה זאגן (קידושין ל:): "יצרו של אדם מתגבר עליו בכל יום ומבקש המיתו", יעדן טאג קומט דער יצר הרע און וויל הרג'ענען דעם מענטש, ער וויל אים אראפווארפן אין עבירות, "ואלמלא הקדוש ברוך הוא עוזרו אין יכול לו", און ווען נישט וואס דער אייבערשטער העלפט אים - וואלט ער נישט געקענט בייקומען די שווערע נסיונות.

דער אייבערשטער זאל העלפן זאלסט האבן הצלחה אין אלע ענינים.

א גמר חתימה טובה.