יח אלול תשפ"ג

בעזרת ה' יתברך

יום ב' פרשת נצבים וילך, י"ח אלול, שנת תשפ"ג לפרט קטן

 

לכבוד ... נרו יאיר

מיר קומען שוין נענטער צום גרויסן יום הדין ראש השנה; ביי אחינו בני ישראל מעדות המזרח זאגט מען שוין א גאנצע חודש סליחות, ביי אונז הויבט מען אן קומענדיגע וואך מוצאי שבת. יעצט זאגן מיר א קליינעם סליחות, לדוד ה' אורי וישעי.

איך האף דו וועסט צעברעכן דיינע מניעות און קומען צום רבי'ן אויף ראש השנה. מאך זיך א חשבון, די אלע מענטשן פון וועם דו האסט מורא, קיינער פון זיי קענען דיך נישט העלפן און אויך נישט שלעכטס טון, איז וואס האסטו צו קוקן אויף בערל, שמערל, חצקל, גרונם; טו וואס איז גוט פאר דיין נשמה, פאר דיין עתיד, פאר דיין נצחיות; כאפ דיין טלית און תפילין און קום צום רבי'ן זאל דיך מתקן זיין.

רבי נתן האט געזאגט: "דאנקען גאט אז נאך ראש השנה איז יום כיפור, בעט מען זיך איבער און מען איז זיך מוחל איינער דעם צווייטן".

ברודער, גיי התבודדות און באניי זיך מיטן סדר דרך הלימוד (המבואר בשיחות הר"ן, סימן עו), מאך זיך א ציל צו ענדיגן כל התורה כולה, פאלג די עצות פון רבי'ן, וועט דיר גוט זיין בזה ובבא. דער רבי האט געזאגט (חיי מוהר"ן, סימן שנד): "אויף צוויי כיתות מענטשן האב איך גרויס רחמנות, אויף די מענטשן וואס זענען נישט מקורב געווארן צו מיר און אויף די מענטשן וואס האבן יא געוויסט פון מיר אבער האבן מיך נישט געפאלגט, ווייל איך ווייס אז עס וועט קומען א צייט ווען מען וועט ליגן מיט די פיס צום טיר, דעמאלט וועט דער מענטש גרויס חרטה האבן פארוואס ער איז נישט מקורב געווארן צו מיר און פארוואס ער האט מיך נישט געפאלגט, ווייל אויב וואלט ער געווען מקורב צו מיר און מיך געפאלגט, וואלט נישט געווען קיין דרגא אויף דער וועלט וואס ער וואלט נישט צוגעקומען דערצו, אבער דעמאלט וועט שוין גארנישט נוצן, עס וועט שוין זיין צו שפעט".

דער אייבערשטער זאל העלפן זאלסט האבן הצלחה אין אלע ענינים.

 

א כתיבה וחתימה טובה, א גוט געבענטשט יאר.

---

בעזרת ה' יתברך - יום ב' פרשת נצבים וילך, י"ח אלול, שנת תשפ"ג לפרט קטן

 

לכבוד ... נרו יאיר

חסדי השם מיר פארן שוין אט אט צום הייליגן רבי'ן קיין אומאן אויף ראש השנה; וויסן זאלסטו, כדי אנצוקומען צום רבינ'ס ציון - איז דער עיקר דאס בענקען און גליסטן, בענקען און האפן - נאר אזוי קומט מען אן, און נאר אזוי איז מען זוכה צו מקבל זיין די תיקונים.

געוואוין זיך צו צו זאגן יעדן טאג נאך שחרית די תיקון הכללי, און אז דו קענסט גיין אין א ליידיגע פלאץ זיך גוט אויסקרעכצן, זיך גוט אויסשרייען, א פלאץ וואו קיינער וועט נישט הערן דיינע קולות - שריי זיבעציג מאל, ע' קלין: "רבונו של עולם העלף מיר, רבונו של עולם האב אויף מיר רחמנות, רבונו של עולם נעם מיך ארויס פון שאול תחתית, רבונו של עולם זיי מיר מוחל אויף מיינע חטאים, עוונות ופשעים, איך טו תשובה מיט אן אמת"; אזוי זאלסטו שרייען זיבעציג מאל בקולי קולות - וועסטו זוכה זיין צו ווערן א נייער מענטש.

נאכדעם דורכן טאג זאלסטו נאר זיין פרייליך, טון וואס דו האסט צו טון, דאווענען און לערנען.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט