כא תשרי תשפ"ד

בעזרת ה' יתברך - ערב שבת קודש, הושענא רבה, כ"א תשרי, שנת תשפ"ד לפרט קטן

 

לכבוד ... נרו יאיר

היינט נאכט, ליל שמיני עצרת - טאנצט מען מיט די תורה, מען טאנצט און מען שפרינגט אז מיר האבן א באשעפער און מיר האבן א תורה; עס ווערן באשאפן אזויפיל מלאכים פון יעדע טאנץ, און אז מען שוויצט - איז דאס אויך א גרויסער תיקון.

אנשי שלומינו פירן זיך, ווען מען טאנצט מיט די תורה, מען האט די ספר תורה אין האנט - צו שווערן אז גלייך ווען מען וועט אוועק גיין פון דער וועלט זאל מען גיין צום הייליגן רבינ'ס היכל פאר א תיקון. די זאך האט מען געהערט פון הייליגן רבי'ן (עיין ספר פעולת הצדיק, סימן תתמה), ער האט געזאגט פאר איינעם ער זאל שווערן בנקיטת חפץ אז גלייך ווען ער גייט אוועק פון דער וועלט זאל ער קומען צו אים און ער וועט אים מתקן זיין.

מוהרא"ש זאגט, מה דאך מען קען פועל'ן אז מען זאל נישט פארפאלן ווערן אויף יענע וועלט, קען מען דאך זיכער פועל'ן אז אויף די וועלט זאל מען נישט פארפאלן ווערן, מען זאל בלייבן צוגעקניפט און צוגעבינדן צום רבי'ן; אוי ווי מען דארף אויף דעם בעטן, אוי ווי מען דארף אויף דעם ניסים, אז מען זאל בלייבן מקושר צום רבי'ן מיט די דורות.

מארגן שמיני עצרת בעט מען אויף רעגן. זיי נישט קיין בטלן, דעק זיך איבער מיטן טלית און וויין צום אייבערשטן אויף פרנסה; ווען מען בעט: "בעבורו אל תמנע מים", בזכות אברהם אבינו, יצחק און יעקב, בזכות משה רבינו און אהרן הכהן, "בצדקו" אין זייערע זכותים, "חן חשרת מים", זאלסטו רחמנות האבן אויף אונז און געבן פרנסה.

ביי אונז מאכט מען נישט שמחת תורה קיין שום מאדנע זאכן, מען פירט זיך מיט דרך ארץ, מען מאכט נישט קיין חוזק פון דאס דאווענען.

א פרייליכן שבת ויום טוב.

---

בעזרת ה' יתברך - ערב שבת קודש, הושענא רבה, כ"א תשרי, שנת תשפ"ד לפרט קטן

 

לכבוד ... נרו יאיר

היינט איז הושענא רבה, היינט טיילט מען אויס די צעטלעך; וויין צום אייבערשטן: "הייליגער באשעפער געב מיר א גוטע צעטל, הייליגער באשעפער, אויב חס ושלום עס איז מיר אנגעשריבן א נישט גוטע צעטל בעט איך דיר רבונו של עולם, צערייס די צעטל און שרייב מיר א גוטע קוויטל".

לאז נישט אריבער דעם טאג מיט גארנישט, בעט זיך אויס, רייס איין פאר דיר און פאר עם ישראל.

א גוט קוויטל.