כט טבת תשפ"ד

בעזרת ה' יתברך

יום ד' פרשת וארא, שובבי"ם, כ"ט טבת, שנת תשפ"ד לפרט קטן

 

לכבוד ... נרו יאיר

אז דו זוכסט תיקונים פאר דיינע חטאות נעורים - זאלסטו לערן אסאך בלעטער גמרא. מוהרא"ש זכרונו לברכה דערציילט פון הרב הקדוש רבי בנציון מבאבוב זכותו יגן עלינו, בעל מחבר ספר "קדושת ציון", אמאל זענען צו אים געקומען בחורים און געבעטן ער זאל זיי געבן א תיקון פאר זייערע עבירות, זיי האבן אים דערציילט אלע זייערע חטאות נעורים וואס זיי האבן געטון און געבעטן א תיקון, האט ער זיי געזאגט זיי זאלן לערנען יעדן טאג א בלאט גמרא, האבן אים די בחורים געזאגט אז דאס איז זיי זייער שווער, האט דער באבוב'ער רב זיי געזאגט: "ענק ווילן די סארט תיקונים פון זיך פייניגן, פאסטן, אדער גולגול שלג וכדומה? פארוואס זאלט איר נישט נעמען די הייליגסטע תיקון - לערנען די הייליגע גמרא?"

איך וויל דיך לאדענען צו מיין שמחה; מיין זונ'ס חתונה אם ירצה ה' קומענדיגע וואך זונטאג. דער אייבערשטער זאל העלפן זאלסט אויך זוכה זיין צו חתונה מאכן די קינדער יונג, אוועק ווארפן די חכמות המדומות, טון וואס איז ריכטיג, טון וואס איז גוט פאר די קינדער.

דער אייבערשטער זאל העלפן זאלסט האבן הצלחה אין אלע ענינים.

---

בעזרת ה' יתברך - יום ד' פרשת וארא, שובבי"ם, כ"ט טבת, שנת תשפ"ד לפרט קטן

לכבוד ... נרו יאיר

היינט ערב ראש חודש איז א צייט פון תשובה, פון תיקון המעשים, מען זאגט יום כיפור קטן; דער עיקר דארף מען אפשווייגן אויף אלע בזיונות, דאס איז גרעסער פון פאסטן. דער רבי זאגט (לקוטי מוהר"ן חלק א', סימן ו): "וְעִקַּר הַתְּשׁוּבָה כְּשֶׁיִּשְׁמַע בִּזְיוֹנוֹ, יִדֹּם וְיִשְׁתֹּק", אז מען הערט א בזיון און מען שווייגט, מען ענטפערט נישט - דאס איז דער עיקר תשובה.

שטארק זיך צו זיין פרייליך, פריי זיך מיט 'שלא עשני גוי, א גוי בין איך נישט', וואס זאל נאר זיין האבן מיר א הייליגע אידישע נשמה; מיט דעם קען מען זיך זייער פרייען, און אז מען איז פרייליך - גייען אוועק אלע פראבלעמען, אלע קרענק, פיזישע און גייסטישע. אזוי ווי דער הייליגער רבי זאגט (שם חלק ב', סימן כד): "כָּל הַחוֹלַאַת הַבָּאִין עַל הָאָדָם", אלע מחלות און אלע קרענק, "כֻּלָּם בָּאִין רַק מִקִּלְקוּל הַשִּׂמְחָה", קומען צום מענטש ווייל מען איז נישט פרייליך, מען איז דערביטערט און דיפרעסט, "גַם חַכְמֵי הָרוֹפְאִים אָמְרוּ", אפילו די דאקטוירים זאגן, "שֶׁכָּל הַמַּחֲלוֹת וְהַחֳלָאִים רָעִים בָּאִים רַק מַחֲמַת חִסָּרוֹן הַשִּׂמְחָה", אז אלע מחלות קומען פון דיפרעסיע, ווייל מען איז נישט פרייליך.

דער אייבערשטער זאל העלפן זאלסט האבן הצלחה אין אלע ענינים.