אין די לעצטע וואכן זענען געווען פילע אנטוויקלונגען אין אמעריקע בנוגע אימיגראציע, צום ערשט האט זיך די רעגירונג גענומען זייער שטרענג, די אייס אגענטור לויפט ארום אין די שטעט און נעמט אויף פילע פארברעכערישע באנדעס פון אימיגראנטן, א טייל פון זיי האט מען אפגעשיקט צום לאנד "על סאלוואדאר" וואס פארמאגט די שטרענגסטע תפיסה אין דער וועלט. דער תפיסה איז געמאכט פאר די ערגסטע פון די ערגסטע פארברעכער רוצחים און אכזרים, וואס זענען פאראורטיילט געווארן אן איין וועג טיקעט צום טורמע, און עס האט נישט אפיציעל קיין לעבעדיגע וועג ארויס.
 
פילע אימיגראנטן וואס זענען אומלעגאל אין אמעריקע האבן שטארק מורא פאר זייער צושטאנד אין אמעריקע, און פארשטייט זיך, די אומלעגאלע אימיגראציע איז דראסטיש געפאלן צו איבער נייציג פראצענט נידעריגער. די אימיגראנטן וואס האבן אזוי שווער געארבעט אריבערצוגיין הונדערטער מיילן פון אויסמאטערנדע וועגן, צאלנדיג זייער אפגעשפארטע גרייצער פאר די שווערצער, ווערן יעצט פון איין מינוט אויפן צווייטן צוריק געשיקט צו זייער היימלאנד, ווי זיי דארפן זיך ווידער ספראווען מיט די פילע שוועריקייטן דארט, ווי ארעמקייט, קרענק, און קרימינאלע באנדעס וואס קאנטראלירן דארט.
 
אסאך מענטשן טראכטן אז נאר זיי מאכן מיט, נאר זיי האבן פראבלעמען, פאר יעדעם גייט אלעס גוט, יעדער קומט, יעדער גייט, נאר ביי מיר גייט אלעס פארקערט ווי איך וויל, אבער דער אמת איז אז יעדער מאכט מיט, און יעדער האט שוועריקייטן, און עס איז אזא גרויסע רחמנות אויף א מענטש נאכדעם וואס ער האט מיטגעמאכט די זיבעציג יאר, ער קומט שוין ארויף אויף יענער וועלט זאגט מען אים, גיי צוריק, האסט נישט אויפגעטון וואס דו האסט געדארפט, און דו דארפסט נאכאמאל איבערגיין כיתה א', דורכגיין די שווערע בחורישע יארן, זוכן א שידוך, ברענגען פרנסה. 
 
פון די אנדערע זייט האט אמעריקע אנאנסירט א נייע וועג אריין, מען רופט עס די "גאלד קארד", פאר פינף מיליאן דאלער, קען מען קויפן לעגאלע בירגערשאפט קיין אמעריקע, און ווערן א פערמענאנטע רעזידענט מיט אלע רעכטן. עס זענען באריכטע געווארן אז בערך טויזענט אזעלכע קארטלעך זענען שוין פארקויפט אין די לעצטע וואכן, אריינברענגענדיג פינף ביליאן דאלער פאר אמעריקע. פארשטייט זיך עס זענען דא וואס ברענגען ארויס אז דאס וועט אריינברענגען שפע קיין אמעריקע, מענטשן וואס וועלן עפענען ביזנעסער און געבן דזשאבס פאר אמעריקאנער, פון די אנדערע זייט זאגן קריטיקירער אז דאס בעפארצוגט געלט איבער ווירדן, און נישט דאס איז וואס דארף אויסמאכן וועמען אריינצונעמען קיין אמעריקע.
 
פאר אונז אבער איז דאס גוטע נייעס, ווייל מיר קענען באקומען א גאלד קארד אויך אָן געלט. מיר האבן פראטעקציע, דער הייליגער רבי האט אונז געגעבן א גאלד קארד וואס הייסט "תיקון הכללי", דער וואס זאגט די צען קאפיטלעך תהלים - ט"ז, ל"ב, מ"א, מ"ב, נ"ט, ע"ז, צ, ק"ה, קל"ז, ק"נ, דער פאררעכט אלעס. ווען ער קומט ארויף אויף יענער וועלט הייסט מען אים נישט צוריק קומען. די גרויסקייט פון די צען קאפיטלעך זענען אזוי גרויס, אז כאטש דער רבי האט זיך אמאל אויסגעדרוקט, אז ווען א מענטש קומט ארויף אויף יענער וועלט זאל ער זיך עקשנ'ען, און זאגן אז יעבור עלי מה, מען זאל נעמען אלעס אבער נישט צוריק קומען, האט דער הייליגער רבי נתן געזאגט דערויף, אז אויב מען זאגט אים אין הימל אז אויב ער קומט צוריק וועט ער קענען זאגן נאך א תיקון הכללי, לוינט זיך אלעס.
 
בפרט אויב מען קען זיך אריבערכאפן צום הייליגן ציון פון רבי'ן, גיין אין מקוה, געבן א פרוטה לצדקה, איז נישט דא קיין גרעסערס פון דעם, דער רבי האט צוגעזאגט אז נאכדעם זאגט אז די צען קאפיטלעך, אויסער וואס עס איז מסוגל צו פרנסה, צו רפואות, איז עס א תיקון אויף אלעם. אבער מיר דארפן בעטן דעם אייבערשטן מיר זאלן עס טאקע טון, ווייל דער רבי האט געזאגט, אז אפילו עס איז אזוי גרינג, אבער וויבאלד עס איז אזא גרויסע זאך, איז דא דערויף א גרויסע יצר הרע.