איינע פון די צייטן ווען מען פלעגט פארן צום הייליגן רבי'ן איז געווען דער הייליגער יום טוב שבועות. דער רבי האט געזאגט אז ווער עס וועט קומען די דריי מאל — ראש השנה, שבת חנוכה און שבועות — וועט געראטעוועט ווערן פון עולם התוהו.
 
מוהרא"ש פלעגט זאגן אז עס איז נישט כדאי צו פארן קיין אומאן אויף שבועות, אויסער ראש השנה וואס דער רבי האט ספעציעל געבעטן מען זאל קומען צו אים קיין אומאן; אבער שבועות און חנוכה זאל מען מקיים זיין דאס קומען צום רבי'ן דורך דעם וואס מען קומט דאווענען מיט די אנשי שלומינו וואס פאלגן זיינע עצות.
 
דערפאר האבן זיך אנשי שלומינו געפירט אין אלע דורות צו קומען דאווענען יום טוב שבועות אין א בית המדרש על שם רבינו, אינאיינעם מיט אנשי שלומינו.
 
אזוי ווי אין די לעצטע עטליכע יאר, וועט דער ראש ישיבה שליט"א אויך היי יאר קומען אויף שבועות אין שטעטל. וויבאלד עס זענען דא גאר א סך תלמידים וואס ווילן קומען, זענען די חשוב'ע איינוואוינער פון קרית ברסלב פארנומען איינרישן זייערע דירות עס זאל זיין גרייט מיט גענוג בעטן און סעודות אריינצונעמען א גרויסע צאל געסט, און זיכער צו מאכן אז אלע שפירן זיך באקוועם.
 
די גבאים פון די שולן טוען זייער חלק און פלאנירן אויס פונקטליך וויאזוי דער בית המדרש זאל קענען ארייננעמען די פילע הונדערטער געסט, אז יעדער זאל האבן וואו צו זיצן און די מקואות זאלן זיין מסודר. די הנהלה פונעם בית התבשיל ארבעט העפטיג אז עס זאל גארנישט פעלן און עס זאל זיין צוגעגרייט כל מיני מטעמים פאר די סעודות יום טוב פארן גאנצן עולם.
 
אנשי שלומינו קענען שוין קוים ווארטן מיטצוהאלטן דעם שיינעם יום טוב אין שטעטל: דאס געשמאקע דאווענען, דאס זאגן תיקון ליל שבועות – דעם ערשטן און לעצטן פסוק פון יעדע סדרה אינאיינעם – און דערנאך א געשמאקע שחרית מיט אהבה רבה, הלל און אקדמות. מען קוקט ארויס צו הערן די הערליכע דרשות פון ראש ישיבה שליט"א און צו זינגען אינאיינעם ניגונים פון אמונה, ניגונים וואס עפענען אויף דאס הארץ צום אייבערשטן.
 
מען גרייט זיך צום הייליגן יום טוב פון קבלת התורה, ווען אלע וועלן פריש מקבל זיין אויף זיך צו פאלגן די צדיקים און בעטן דעם אייבערשטן מען זאל זוכה זיין צו לערנען די הייליגע תורה יעדן אייציגן טאג: חומש, משניות, גמרא, בבלי, ירושלמי, תוספתא, רמב"ם, טור, שולחן ערוך און אזוי ווייטער. יעדער וועט באנייען זיין התקרבות צום רבין פריש, אויסהערן די עצות און חיזוק פונדאסניי, אנהייבן רעדן צום אייבערשטן און זיך פרייען מיט זיין הייליגע תורה. דער יום טוב אנטשפרעכט צו איבערלאזן א טיפן רושם ביי אלעמען פאר א לאנגע צייט!



עליונים ששו ותחתונים עלזו בקבלת תורה מסיני