עס איז א געוואלדיגע שמחה אין די טעג, ווען פילע אנשי שלומינו האבן נארוואס געענדיגט בויען זייערע הערליכע פראכטפולע הייזער. אין פילע שטובער זענען אין די טעג געפראוועט געווארן דער סיום פון ששה סדרי תוספתא מיט׳ן סדר פון די קהלה, און מיט דעם זוכה געווען צו ענדיגן א "בי״ת נצחי", א פראכטפולע געביידע לנצח נצחים. א דירה אין וועלכע זיי וועלן קענען וואוינען און זיך באשיצן מיט הרחבת הדעת און שלוות הנפש אויף דער וועלט און אויף יענער וועלט. אנשי שלומינו הייבן תיכף אן דעם נייעם מחזור, דעם 25׳סטן מחזור פון תוספתא יומי פון ברכות פרק א׳.
דער סדר פון לימוד תוספתא גייט שוין אן פאר צענדליגע יארן. אין צוגאב צום דף בבלי און דף ירושלמי האט מוהרא״ש זי״ע צוגעלייגט אום יום טוב שבועות תשנ״ח, דעם טאג פון קבלת התורה, אז מען זאל אויך לערנען יעדן טאג א פרק תוספתא, און מיט דעם בויעט מען זיך אויף א גאנצע פולקאמע בנין - בבלי, ירושלמי און תוספתא, ראשי תיבות "בי״ת".
שפעטער האט דער ראש ישיבה שליט״א צוגעלייגט נאך לימודים וואס פילע אנשי שלומינו לערנען יעדן טאג, ווי אנגעצייכנט אינעם "לוח ברסלב": א פרק רמב״ם און א קאפיטל פון נ״ך יעדן טאג.
בגשמיות פארשטייט יעדער אז מען זוכט דאס בעסטע. יעדער וויל האבן א באקוועמע, גרויסע דירה פאר זיך און פאר די משפחה. חז"ל זאגן טאקע "דירה נאה מרחיב דעתו של אדם". אויב אזוי, ווי פיל מער דארף א מענטש טראכטן וועגן זיין דירה אויף יענע וועלט – א הויז וואס בלייבט אויף אייביג. און דאס קען מען באקומען דורכן לערנען יעדן טאג די לימודים בבלי, ירושלמי און תוספתא. יעדן טאג וואס גייט דורך לייגט מען צו א פרישע שטיין אין דעם אייביגן הויז.
ליידער זעט מען מענטשן וואס גייען דורך זיבעציג יאר און האבן קיינמאל נישט זוכה געווען צו פארענדיגן אפילו איינמאל בבלי, ירושלמי און תוספתא. דאס איז א גרויסער רחמנות אויף דער נשמה. דערפאר דארף א מענטש האבן שכל און אריינכאפן יעדן טאג כאטש אביסל: א דף בבלי, א דף ירושלמי, און א פרק תוספתא. דאס איז די שפייז פאר די נשמה וואס מען נעמט מיט אויף יענע וועלט.
אבער אויך אויף דער וועלט זעט מען גרויסע ישועות. פילע אנשי שלומינו דערציילן אז זייט זיי האבן זיך מקבל געווען צו לערנען דעם סדר הלימוד, האבן זיי זוכה געווען צו הרחבת הדעת, רואיגקייט, און אפילו פשוט צו שיינע, ערליכע הייזער בגשמיות אויפן עולם הזה.
דער הייליגער רבי האט אונז געגעבן דעם סדר דרך הלימוד – א וועג וואס איז פראקטיש און צוגעפאסט פאר יעדן איד, אין יעדע צייט און אין יעדן מצב. אפילו מען פארשטייט נישט, אפילו מען געדענקט נישט – בלויז זאגן די ווערטער פון די הייליגע תורה אליין האט א גרויסן כח. מען קען טראכטן אז דאס איז מאדנע, זאגן די ווערטער? דאס איז נאר ביז מען פרובירט עס. אלע וואס האבן עס אנגענומען בתמימות ובפשיטות זאגן עדות אויף די זיסקייט וואס מען שפירט אין די הייליגע תורה. טעמו וראו כי טוב ה׳. מען איז זוכה צו לערנען גאר אסאך די הייליגע תורה, און מען קען איבערקומען פילע שוועריקייטן וואס דער יצר הרע שטעלט אונטער אז מען זאל נישט לערנען יעדן טאג כאטש אביסל תורה.
דער נייער מחזור אין תוספתא האט געברענגט א פרישן חשק אין די לימודים. יעדע וואך קומט ארויס דער קונטרס "בי״ת נצחי" מיט די לימודים פאר די גאנצע וואך, גרייט צו מיטנעמען וואו מען גייט נאר, אז קיינער זאל נישט פארפאסן אפילו איין טאג אן תורה.
גדול יהיה כבוד הבי"ת הזה!