א גאר געשמאקער און דערהויבענער שבת החודש איז אריבער אין שטעטל צוזאמען מיטן ראש ישיבה. כאטש עס איז נישט מעגליך אלעס אראפ צו שרייבן, וועלן מיר זיך בבחינת "אביסל איז אויך גוט", זיך מצמצם זיין צו אראפשרייבן עטליכע שיינע נקודות פונעם הערליכן שבת, וואס איז געווען מלא וגדוש, מען האט כסדר געהערט פון ראש ישיבה דיבורים נפלאים, וואס מ'קען נוצן טאג טעגליך פארן לעבן זיך צו מחזק זיין און לעבן א געשמאקע לעבן מיטן אייבערשטן.
 
דער ראש ישיבה איז איינגעשטאנען אויף שבת ביי זיין איידעם הר"ר נתנאל פארקאש שליט"א און געדאוונט אין בית המדרש אויף די ירושלים גאס.
 
פרייטאג צונאכטס איז געווען דער בעל תפלה מו"ה יודל טירנויער הי"ו וואס האט אראפ געלייגט א געשמאקן קבלת שבת מיט'ן ברסלב'ן נוסח. אינדערפרי נאכן מקוה אין בית המדרש עצתו אמונה האט דער ראש ישיבה ארומגערעדט איבער דעם, אז ער האט זיך דערמאנט פונעם קבלת שבת וואס ער האט געדאוונט אמאל ביי מוהרא"ש זי"ע אין בארא פארק אום חודש כסליו תש"ע, ווען מוהרא"ש האט אים צוגעשיקט צו קבלת שבת, מוהרא"ש האט זיך נאכדעם אויסגעדרוקט אז ער האט נאכנישט געהערט אזא שיינע דאווענען.
 
ביי דעם שמועס האט אויך אסאך גערעדט איבער "חומרות אום פסח", דער ראש ישיבה האט גערעדט איבער דעם פארוואס ביים פריערדיגן דור איז געווען אזוי שטארק צו מאכן אלעס אליין אום פסח, אבער היינט זעט מען דאס נישט אזוי שטארק; דאס איז ווייל זיי זענען געווען געוואוינט פונדערהייים אליין צו צושטעלן עסן, עס זענען נישט געווען קיין פארטיגע פראדוקטן אזוי ווי היינט.  דער עיקר - האט דער ראש ישיבה געזאגט - אז די חומרות זאלן נישט אוועקנעמען די שמחת יום טוב. מען קען און מען זאל אנהאלטן אלע חומרות וואס מען האט געזען אינדערהיים, אבער מען דארף עס טון אָן נערוועזקייט און אנגעצויגנקייט. אזוי האט זיך פארצויגן א גאר שיינע לאנגע שמועס, מען קען הערן פונעם שמועס אויך אויף קול ברסלב ביי די "שבתים אפטיילונג."
 
דער ראש ישיבה איז צוגעגאנגען צו שחרית, און אראפגעלייגט א דאווענען מיט ווארעמקייט און הארץ, דער ראש ישיבה איז אויך געווען דער בעל קורא, נאכ'ן ליינען האט דער "חזק חזק" גאר שטארק אפגעדינערט, אלע זענען געווען גאר פרייליך אז זיי האבן זוכה געווען צו מסיים זיין גאנץ ספר שמות. אויף מוסף האט מען געהאט די זכיה צו האבן דעם ראש ישיבה אלס בעל תפלה, און די קינדער מיט אלע מתפללים האבן שיין מיטגעזינגען ביי יוצרות.
 
ביי סיפורי מעשיות האט דער ראש ישיבה גערעדט א שיינע שמועס, דער ראש ישיבה האט געזאגט אז מען זאל אלץ געדענקען פארוואס מען איז אנגעקומען אין היכל הקודש בכלל, אזוי ווען עס מאכט זיך א חלישת הדעת, זאל מען נישט אוועקלויפן צוליב דעם, נאר זיך דערמאנען פארוואס מען איז דא, וואס מען באקומט פונעם רבי'ן. דער ראש ישיבה האט דערנאך פארציילט באריכות די גאנצע מעשה פון משה חינקעס, ווי רבי נתן האט געזאגט פאר דעם גביר משה חינקעס היתכן ער קריגט ווען א דאנק אים האט ער זוכה געווען צו האבן א קינד.
 
אויך די וועטער האט ברוך השם גאר שיין מיטגעשפילט, עס איז געווען געשמאק ווארעם, און עס האט זיך געשפירט ווי חול המועד פסח, מען האט געשמאק פארברענגט אין הויף צווישן די גראז און ביימער ארום דעם בית המדרש, עס איז געווען שיין צו זען במשך נאכמיטאג ווי די אינגעלייט, בחורים און קינדער זענען געזיצן און געלערנט זייערע שיעורים.
 
ביי שלש סעודות האט דער ראש ישיבה גערעדט פון די רש"י די וואך, אז דער אייבערשטער האט געזאגט פאר משה "מאך מיט די הענט כאילו דו מאכסט די משכן, און איך וועל עס אויפבויען", דאס גייט ארויף אויף אונז, אז א מענטש דארף נאר מאכן אביסל מיט די הענט און דער אייבערשטער וועט שוין ברענגען פרנסה. דו דארפסט נישט שווער ארבעטן, טו אביסל. הייב אן מאכן פסח'דיג און דער אייבערשטער וועט העלפן עס וועט פארן די ארבעט געשמאק. 
 
מוצאי שבת איז מען אריבער וואונטשן א גוטע וואך, און ווער עס האט געהאט א שאלה צו פרעגן האט דעמאלט געהאט די געלעגנהייט, מוצאי שבת האט מען זיך געזעגנט פונעם שבת מיט געשמאקע געפילן און מיט דעם זיך געמאכט גרייט צו אויפנעמען דעם פסח וואס קומט אט אט צו גיין.