תוכן השאלה
לכבוד דער ראש ישיבה שליט"א,
איך האב געוואלט זיך באדאנקען פאר אלעס וואס דער ראש ישיבה שליט"א טוט פאר מיר, דער ראש ישיבה שליט"א געבט אוועק יעדן טאג א שעה מיר צו געבן א שיעור, און אפאר שעה, איך ווייס אפילו נישט וויפיל, מיר צו שרייבן בריוו. איך שפיר אז דער ראש ישיבה שליט"א רעדט נאר צו מיר, ווייל דער ראש ישיבה שליט"א רעדט אלעמאל וואס איך דארף הערן, יישר כח.
היות איך האב אנגעהויבן פאלגן וואס דער ראש ישיבה שליט"א זאגט, האב איך אויך אנגעהויבן מעביר סדרה זיין, און אויך צו לערנען חומש רש"י, וויל איך וויסן וואס איך זאל טון ווען איך קום אן צו די דקדוק רש"י'ס, זאל איך עס אויך זאגן אדער עס אויסלאזן? ווייל דער רבי האט דאך געזאגט אז היינט דארף מען נישט קיין דקדוק
יישר כח
תשובה מאת הראש ישיבה שליט"א:
יום ה' פרשת ויגש, ב' טבת, זאת חנוכה, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
לערנען חומש רש"י איז מסוגל פאר יראת שמים, לערנען חומש רש"י ברענגט א שטארקע אמונה. עס איז ידוע ביי סאטמערע חסידים אז דער הייליגער קדושת יום טוב זכותו יגן עלינו האט געשיקט זיינע צוויי קינדער דער הייליגער עצי חיים און דעם סאטמער רבי זכותם יגן עלינו ווען זיי זענען נאך געווען גאר קליין, אז זיי זאלן גיין נעמען א ברכה פון דעם הייליגן צדיק רבי מרדכי'לע מנאדבורנא זכותו יגן עלינו. רבי מרדכי'לע האט זיי געבענטשט און זיי געזאגט די ווערטער: "קינדערלעך, פילעוועט זיך אין חומש רש"י (לערנט אסאך חומש רש"י), ווייל איך האב געקענט גרויסע גאונים וואס האבן נישט געוואוסט וואו דער אייבערשטער וואוינט ווייל זיי האבן נישט געלערנט חומש רש"י.
יעדע אות פון רש"י איז געשריבן מיט רוח הקודש, מוהרא"ש זאגט נאך פון פריערדיגע צדיקים (עיין ספר נחל קדומים פרשת וירא, אות ד), אויף יעדע טראפ טינט האט רש"י געציילט שבעה נקיים; איז ווען עס קומט צו די דקדוקי רש"י וואס דער רבי זאגט (שיחות הר"ן, סימן רלה), עס פעלט נישט אויס צו לערנען דקדוק - קענסטו גורס זיין די רש"י, ווייל אפילו זאגן די ווערטער פון רש"י איז מטהר ומזכך את הנפש.
דער אייבערשטער זאל העלפן זאלסט האבן הצלחה אין אלע ענינים.
א פרייליכן חנוכה.