בעזרת ה' יתברך

ערב שבת קודש פרשת וישב, מברכין החודש, כ"ב כסליו, שנת תשפ"ו לפרט קטן

... נרו יאיר

עס איז א גרויסע זאך דער מאן זאל אפברענען די לעכט. חכמינו זכרונם לברכה זאגן (שבת כג:): "אמר רב הונא, הרגיל בנר הויין ליה בנים תלמידי חכמים", און דער רבי זאגט (ספר המדות אות בנים חלק א', סימן נד), אז דאס מיינט מען סיי שבת לעכט און סיי חנוכה לעכט; אז דאס איז מסוגל פאר קינדער תלמידי חכמים.

די וועלט פרעגט, דאס איז דאך א זאך וואס יעדער טוט, דאס איז נישט עפעס א זייטיגע סגולה וואס נאר א טייל טוען, אין אלע אידישע שטיבער צינדט מען שבת לעכט און חנוכה לעכט, און מען זעט נישט אז אלע זאלן זוכה זיין צו קינדער תלמידי חכמים?! נאר וואס דען, עס ווענדט זיך ווי אזוי מען טוט די מצוה; אז מען טוט די מצוה מיט ליבשאפט און שמחה, מען גרייט דאס אן מיט א חשיבות און מען בעט דעם אייבערשטן ביים אנגרייטן די לעכט אז מען זאל זוכה זיין צו קינדער תלמידי חכמים - איז מען זוכה צו דעם.

קענסט לייגן די ווייסע טישטוך און אנגרייטן די לעכט דאנערשטאג נאכט לכבוד שבת, אלעס וואס מען דארף טון פרייטאג לכבוד שבת, זאגן שוין די פוסקים אז אויב עס איז גרינגער פארן מענטש, עס מאכט מער סדר - קען מען עס שוין טון דאנערשטאג און זאגן אז מען טוט דאס לכבוד שבת. קוק אין משנה ברורה סימן רנ (סעיף קטן ב): "ומסתברא דבימים הקצרים כל מה שיכול להקדים ההכנה ביום ה' עדיף", אין די ווינטער שבתים ווען ערב שבת איז זייער קורץ קען מען שוין אלעס טון דאנערשטאג, און ער זאגט: "וטוב שיאמר על כל דבר שקונה זהו לכבוד שבת כי הדבור הוא פועל הרבה בקדושה", מען זאל אויף אלעס זאגן אז מען טוט דאס לכבוד שבת, אזוי קומט אריין די קדושה אין די זאך.

עס איז זייער א גרויסע זאך דער מאן זאל אפברענען די לעכט לכבוד שבת, עס שטייט פון צדיקים אז דאס איז מתקן אויך די שווערע פגמים, די פגמי הברית.

דער אייבערשטער זאל העלפן זאלסט האבן הצלחה אין אלע ענינים.