תוכן השאלה
לכבוד דער ראש ישיבה שליט"א,
ווען מען לערנט די הייליגע ספרים "אשר בנחל", "עצתו אמונה", "פעולת הצדיק", קונטרסים פון מוהרא"ש, אדער אזעלכע סארט ספרים, איז דא אן ענין ארויסצוזאגן די ווערטער וואס מען לערנט, אדער איז גענוג צו ליינען מיט די אויגן?
יישר כח
תשובה מאת הראש ישיבה שליט"א:
יום א' פרשת דברים, ב' מנחם-אב, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
ווען מען לערנט און מען זאגט ארויס די ווערטער - גייט עס אריין שטערקער אינעם מענטש, מען געדענקט דאס לערנען. אזוי ווי חכמינו זכרונם לברכה דערציילן (עירובין נד.), דער הייליגער תנא רבי אליעזר האט געהאט א תלמיד וואס פלעגט נישט ארויסזאגן די ווערטער ביים לערנען, און נאך אפאר יאר האט ער פארגעסן וואס ער האט געלערנט, און די גמרא זאגט דארט אז דאס ארויסזאגן די ווערטער ביים לערנען - איז מסוגל אויף צו געדענקען.
דער אייבערשטער זאל העלפן זאלסט האבן הצלחה אין אלע ענינים.