תוכן השאלה
לכבוד דער ראש ישיבה שליט"א,
מיינע עלטערן האבן מיר געפרעגט איבער א שידוך וואס מען האט אנגעטראגן פאר מיין שוועסטער, איך האב זיי נישט געקענט, אבער הערנדיג אז זיי זענען קומען פון א פלאץ מיט אביסל אן אנדערע מענטאליטעיט פון אונז, האט מיר עס שטארק נישט געשמעקט. דאך האבן מיינע עלטערן געטון דעם שידוך; מיין שאלה איז אויב יעצט מעג איך זאגן פאר מיינע עלטערן אלע מיינע חששות וואס איך טראכט איבער דעם שידוך.
יישר כח
תשובה מאת הראש ישיבה שליט"א:
יום ד' פרשת חיי שרה, כ"א מרחשון, שנת תשפ"ו לפרט קטן
לכבוד ... נרו יאיר
איך האב ערהאלטן דיין בריוו.
אז מען האלט שוין נאכן מאכן די שידוך זאלסטו חס ושלום נישט רעדן קיין איבריגע רייד, זאלסט נאר רעדן שיינע זאכן, נאר מרבה זיין שלום.
בכלל איז א גרויסע אחריות אפצורעדן א שידוך, עס שטייט פון צדיקים אז ווער עס העלפט מאכן שידוכים - טוט דעם ווילן פונעם אייבערשטן. ווייל חכמינו זכרונם לברכה זאגן (בראשית רבה סח, ד), א מטרונה האט געפרעגט רבי יוסי בר חלפתא, ווי לאנג האט גענומען פארן אייבערשטן צו באשאפן די וועלט? האט ער געענפערט זעקס טעג, פרעגט זי אים: "מַה הוּא עוֹשֶׂה מֵאוֹתָהּ שָׁעָה וְעַד עַכְשָׁו", וואס טוט דער אייבערשטער פון דעמאלט ביז יעצט? האט ער איר געזאגט: "הַקָּדוֹשׁ בָּרוּךְ הוּא יוֹשֵׁב וּמְזַוֵּג זִוּוּגִים", דער אייבערשטער מאכט שידוכים, און ווער עס העלפט מאכן שידוכים טוט דעם ווילן פונעם אייבערשטן.
דער אייבערשטער זאל העלפן זאלסט האבן הצלחה אין אלע ענינים.