תוכן השאלה
לכבוד דער ראש ישיבה שליט"א,
א גרויסן יישר כח פאר די הערליכע שיעורים און חיזוק; ווי אזוי וואלט איך אויסגעזען אן דעם הייליגן רבי'ן? איך גיי יעצט בעזרת ה' ענדיגן תהלים נאכאמאל, אלעס א דאנק די שיעורים.
איך האב א פראבלעם וואס שטערט מיר זייער, די לעצטע צוויי יאר האב איך א פראבלעם מיט מיין הויט אויפ'ן פנים און איך קען זיך נישט אן עצה געבן. איך בין געגאנגען צו א הויט דאקטער, ער האט געזאגט עס איז פאנגוס און מיר געגעבן זאכן ארויפצולייגן פאר א קורצע צייט, אבער עס האט נאר געהאלפן אביסל, נאר ווי לאנג איך האב זיי גענוצט. איך האב פרובירט נאטירליכע מיטלען, זיי האבן מיר געזאגט מער נישט צו עסן צוקער און אזוי וועט עס אוועקצוגיין, איך האב עס פרובירט פאר איבער א חודש צייט און עס האט אביסל געהאלפן אבער עס איז געווען צו שווער צו טון פאר מער צייט.
נאכדעם האב איך פרובירט צו מאכן התבודדות אויף דעם פאר פערציג טעג, צוליב דעם וואס רבי נתן האט געזאגט "בחנוני נא בזאת", אז מען בעט דעם אייבערשטן פאר פערציג טעג אויף א זאך וועט מען געהאלפן ווערן, אבער דאס האט אויך נישט געהאלפן. עס האט מיר געהאלפן אין לעבן אבער נישט פאר די הויט פראבלעם. איך האב אויך פרובירט די איבערגעבליבענע אויל פון הדלקת הנירות פון שבת אבער עס האט אויך נישט געהאלפן.
אפשר קען דער ראש ישיבה שליט"א מיר געבן א תורה'דיגע וועג זיך צו היילן ווי שנעלער?
יישר כח
תשובה מאת הראש ישיבה שליט"א:
בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן
מרת ... תחי'
איך האב ערהאלטן אייער בריוו.
יעצט וועט איר נעמען די וואונדערליכע סגולה פון 'תודה והודאה', דאנקען און לויבן דעם אייבערשטן; דאנקט און לויבט דעם אייבערשטן יעדן טאג, דאנקט אים אויף די חסדים וואס ער טוט מיט אייך, רעכנט אויס אלע ניסים - וועט איר זען וואונדערליכע ניסים.
ווען א איד דאנקט דעם אייבערשטן - עפנט זיך אויף די הימל, און וואס מען בעט - באקומט מען; עס קומען ישועות למעלה מדרך הטבע.
דער היילגער רבי האט געזאגט, ווען א איד בעט דעם אייבערשטן קוקט מען אויב ער דאנקט אויך; אז מען דאנקט דעם אייבערטן און נאכדעם בעט מען - העלפט דער אייבערשטער.
דער אייבערשטער זאל העלפן איר זאלט זיין געזונט און שטארק מיט געזונטע הויט.