תוכן השאלה
לכבוד דער ראש ישיבה שליט"א,
איך האב געזען אויף די נוסח פון די מצבה פון הרה"ק רבי ישעי'לע קערעסטירער זי"ע שטייט דארט די ווערטער "לא כעס מעולם", ער האט זיך קיינמאל נישט אויפגערעגט.
איך וואונדער זיך ווי אזוי ער האט באוויזן אזא געוואלדיגע זאך? א צדיק וואס האט אנגעפירט אזא ברייטע אונטערנעמונג, ער האט יעדן טאג געהאט צו טון מיט אלע סארטן מענטשן און ארעמעלייט, זיי געגעבן צו עסן און טרונקען און צו שלאפן, זאל זיך קיינמאל נישט אויפרעגן?
קען א געווענליכער מענטש אויך אנקומען צו זיין אזוי רואיג אז גארנישט זאל אים וויי טון? און גארנישט זאל אים אויפרעגן?
יישר כח
תשובה מאת הראש ישיבה שליט"א:
יום ה' פרשת תצוה, ו' אדר, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
נישטא קיין עצה ווי אזוי מען קען אויסרייסן די שלעכטע מדה פון כעס, נאר דורך תפילה; בעטן יעדן טאג דעם אייבערשטן מען זאל געראטעוועט ווערן פון די שלעכטע מידה, נאר מיט תפילה קען מען דאס אויסרייסן פון זיך, און מיט תפילה קען יעדער איינער זוכה זיין צו ווערן א גרויסער צדיק.
דא האסטו א קליינע תפילה געבויט אויף די תפילה פון לקוטי תפילות (אות רסא, רסב). זאג די תפילה יעדן טאג, און אפילו אפאר מאל א טאג, דאס וועט דיר העלפן זאלסט קענען צוקומען צו אויסרייסן די מדה פון כעס, צו זיין פרייליך און צו זיין ארום גענומען מיטן אייבערשטן:
"הייליגער באשעפער העלף מיר, ראטעווע מיך פון כעס און פון זיין אנגעצויגן. היט מיך מיט דיין גרויס רחמנות אז אפילו אויב חס ושלום איך וועל צוקומען צו עפעס א כעס, זאל איך נישט אריינפאלן אין אכזריות, איך זאל דאס שנעל און גרינג קענען איבערדרייען אויף רחמנות. העלף מיך איך זאל רחמנות האבן אויף אלע וועמען איך האב אויף זיי כעס, איך זאל חס ושלום קיינעם נישט טון קיין שום שלעכטס, עס זאל נישט זיין אין מיר 'לא יהיה בי אל זר, ולא אשתחוה לאל נכר', וואס די פסוק גייט ארויף אויף דער וואס איז בכעס, ווייל כעס איז אזוי ווי מען דינט עבודה זרה.
הייליגער באשעפער דו ווייסט ווי שווער עס איז מיר צו פטור ווערן פון די שלעכטע מדה פון כעס, און ווי שווער עס איז מיר אויסצורייסן די אנגעצויגנקייט און די נישט גוטע גוסטע וואס כאפט מיר אן, ווייל ווען עס הויבט אן ברענען אין מיר חס ושלום די כעס - פארליר איך זיך אזוי שטארק, איך ווער ממש ווי א מענטש אן שכל און איך קען זיך דעמאלט נישט קאנטראלירן, דעריבער בעט איך דיר הייליגער באשעפער, האב רחמנות אויף מיר; היט מיך, ראטעווע מיך און העלף מיר איך זאל קענען צעברעכן און אויסרייסן די שלעכטע מידה פון כעס. איך זאל זיין צו יעדן איינעם גוט, איך זאל האבן געדולד צו יעדן איינעם און קענען ליידן יעדן איינעם, פון יעצט ביז אייביג, אמן סלה".
דער אייבערשטער זאל העלפן זאלסט האבן הצלחה אין אלע ענינים.