תוכן השאלה
לכבוד דער ראש ישיבה שליט"א,
עס טוט מיר וויי אז איך רעג זיך אויף אינדערהיים. איך וויל זייער שטארק זיין דרך ארצ'דיג פאר מיין טאטע מאמע, אבער זייער אסאך מאל טרעף איך זיך בלאזן און שרייען, אויך ווער איך זייער אויפגערעגט אויף מיינע געשוויסטער און איך קען אפילו צומאל שלאגן, אבער נאכדעם האב איך אזוי שטארק חרטה פארוואס איך האב געשלאגן מיין טייערע ברודער אדער שוועסטער, פארוואס איך האבן געשריגן אויף מיין טייערע מאמע.
איך גיי אין בעט און איך קען זיך נישט מוחל זיין, אבער עס העלפט נישט, ווייל א טאג שפעטער פאסירט נאכאמאל די זעלבע זאך; איך דארף אן עצה ווי אזוי זיך באהערשן פון כעס.
יישר כח
תשובה מאת הראש ישיבה שליט"א:
יום ד' פרשת פקודי, כ"ו אדר, שנת תשפ"ה לפרט קטן
... תחי'
איך האב ערהאלטן אייער בריוו.
זאגט די שיינע תפילה צום באשעפער יעדן טאג, וועט איר ווערן געראטעוועט פון כעס.
"הייליגער באשעפער העלף מיר, ראטעווע מיך פון כעס און פון זיין אנגעצויגן, היט מיך און ראטעווע מיך אז איך זאל נישט ווערן מער בכעס און זיכער נישט אויף מיינע טייערע עלטערן, איך זאל מכבד זיין מיין טאטע און מיין מאמע, און זיי קיינמאל חס ושלום נישט שלאגן.
רבונו של עולם איך בעט דיר זייער, היט מיך פון אריינפאלן אין א כעס חס ושלום, און אויב איך וועל יא באקומען א כעס זאל איך נישט אריינפאלן אין אכזריות, איך זאל דאס שנעל און גרינג קענען איבערדרייען אויף רחמנות, איך זאל קיינעם נישט שלאגן און קיינעם נישט פארשעמען. העלף מיר איך זאל לעבן מיט אמונה, איך זאל שטענדיג וויסן און געדענקען אז דו ביסט אין מיר, מיט מיר און נעבן מיר, און אלעס קומט נאר פון דיר, איך זאל נישט קיינעם באשולדיגן, און אויף קיינעם נישט האבן קיין טענות, און זיכער נישט אויף מיינע עלטערן.
הייליגער באשעפער דו ווייסט ווי שווער עס איז מיר צו פטור ווערן פון די שלעכטע מדה פון כעס, און ווי שווער עס איז מיר אויסצורייסן די אנגעצויגנקייט און די נישט גוטע גיסטע וואס כאפט מיך אן, ווייל ווען עס הויבט אן ברענען אין מיר חס ושלום די כעס - פארליר איך זיך אזוי שטארק, איך ווער ממש ווי א מענטש אן שכל און איך קען זיך דעמאלט נישט קאנטראלירן, דעריבער בעט איך דיר הייליגער באשעפער, האב רחמנות אויף מיר, היט מיך, ראטעווע מיך און העלף מיר איך זאל קענען צעברעכן און אויסרייסן די שלעכטע מידה פון כעס. איך זאל זיין צו יעדן איינעם גוט, איך זאל האבן געדולד צו יעדן איינעם און קענען ליידן יעדן איינעם, פון יעצט ביז אייביג, אמן סלה".
דער אייבערשטער זאל העלפן איר זאלט האבן הצלחה אין אלע ענינים.