תוכן השאלה
לכבוד דער ראש ישיבה שליט"א,
איך פאר אריין יעדן טאג קיין ירושלים און די באס איז נישט אזוי ריין, אסאך מאל זיצן פרויען אויף די ערשטע פלעצער, ואני אנה אני בא. עס איז פול מיט מיידלעך און ווייבלעך און איך דארף לוחם זיין יעדע מינוט נישט צו קוקן, און איך שפיר ווי איך געב שוין אויף, איך קען נישט מער.
קען איך זיך בכלל קריגן מיט'ן יצר הרע? ער איז דאך א מלאך און איך בין נאר א קליין מענטשעלע, און איך שפיר ווי מיינע כוחות קומען צו א סוף.
וויל איך בעטן אויב דער ראש ישיבה שליט"א קען מיר מחזק מיט שמירת עיניים, אדער רעדן פון דעם נאך א שיעור און נאך א שיעור, ווייל אז נישט וועט זיך די מלחמה זיך ענדיגן נישט גוט, מיט'ן נישט גוטן געווינער.
יישר כח
תשובה מאת הראש ישיבה שליט"א:
יום ד' פרשת נשא, ח' סיון, אסרו חג, שנת תשפ"ה לפרט קטן
... נרו יאיר
נעם זיך מיט א זעקל ספרים; א תהלים, א משניות וכדומה און זיי פארנומען אויפן וועג מיט לערנען דיינע שיעורים כסדרן.
אויך זאלסטו זיך מתבודד זיין, פארמאך זיך די אויגן און שריי צום אייבערשטן בקול דממה דקה: "הייליגער באשעפער איך ווער פארברענט, ראטעווע מיך, העלף מיר איך זאל קענען היטן מיינע אויגן, איך זאל קענען היטן מיינע מחשבות", מען קען זיצן אינמיטן א פולע באס מיט מענטשן און זיך מתבודד זיין כאילו מען געפינט זיך אין פעלד צווישן ביימער און גראז.
אמאל אויפן וועג אהיים פון רבינ'ס ראש השנה אין עירפארט זאגט מיר מוהרא"ש: "מען קען זיך דא צווישן די הונדערטער מענטשן מתבודד זיין", מוהרא"ש פרעגט מיר: "וואס דארפסטו? א וואלד? חיות? דא האסטו א וואלד מיט חיות; וואס זענען דען די אלע אויב נישט חיות? דער רבי זאגט (לקוטי מוהר"ן חלק ב', סימן ז), א מענטש אן דעת איז קיין מענטש נישט, ער איז א חיה", און איך געב א קוק ווי מוהרא"ש זעצט זיך אוועק, פארמאכט זיך די אויגן און הויבט זיך אן מתבודד זיין כאילו ער געפינט זיך אין פעלד; אזוי זאלסטו טון, פארמאך זיך די אויגן און שריי: "הייליגער באשעפער איך ווער פארברענט, איך קען נישט אליינס, ראטעווע מיך, איך זאל קענען היטן מיינע אויגן".
דער אייבערשטער זאל העלפן זאלסט האבן הצלחה אין אלע ענינים.