תוכן השאלה
לכבוד דער ראש ישיבה שליט"א,
לעצטנס איז מיר זייער שווער מיט געלט, איך קען ממש נישט דעקן דעם חודש, און יעצט האב איך אויך געהאט עקסידענט, איך האב אריינגעקראכט אין א צווייטער קאר, איך שפיר אז דער אייבערשטער וויל עפעס פון מיר.
וואס קען איך טון? וואס דארף איך פאררעכטן?
יישר כח
תשובה מאת הראש ישיבה שליט"א:
יום ה' פרשת שופטים, א' דראש חודש אלול, שנת תשפ"ו לפרט קטן
... נרו יאיר
דער הייליגער רבי זאגט (ספר המדות אות ממון חלק א', סימן צז): "מי שאין לו פרנסה", ווער עס האט נישט קיין פרנסה, "יעסוק בתורה", זאל לערנען תורה, "ואחר כך יתפלל על פרנסה", און נאכדעם זאל ער דאווענען אויף פרנסה, "בוודאי יתקבל תפילתו", וועט זיכער ווערן אנגענומען זיינע תפילות; אזוי זאלסטו טון, זיי זיך קובע צו לערנען מקרא, משנה, גמרא והלכה, און נאכדעם זאלסטו זיך מתבודד זיין און בעטן דעם אייבערשטן ער זאל דיר מאכן א נס און געבן גרויס שפע, פרנסה בריווח.
נאך א סגולה פאר פרנסה בריווח, צו זאגן יעדן טאג די צען קאפיטלעך תהילים, דעם "תיקון הכללי" [קאפיטל טז, לב, מא, מב, נט, עז, צ, קה, קלז, קנ], ווייל דער רבי זאגט (לקוטי מוהר"ן חלק א, סימן כט), אז זאגן דעם "תיקון הכללי" איז א סגולה אויף פרנסה.
נאך א סגולה איז דא פון הייליגן רבי'ן, צו זיין פרייליך אז מען איז א איד און נישט קיין גוי. דער רבי זאגט (ספר המדות שם, סימן מז): "השמחה תמידית מסוגל להצלחה", זיין פרייליך איז מסוגל פאר הצלחה, און פארקערט, (שם, סימן פט): "העצבות", זיין דערביטערט, "מפסיד הפרנסה", מאכט שאדן די פרנסה.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
א גוטן חודש.