תוכן השאלה
לכבוד דער ראש ישיבה שליט"א,
יישר כח פאר די שיעורים און פאר די עצתו אמונה.
איך האב געוואלט פרעגן, עס שטייט אין ספר המדות (אות יראה, סימן לא) "ליראה תלך למקוה", און נאכדעם, אין סימן לז שטייט, אז ש"י טבילות איז מסוגל פאר יראה; עס שטייט שוין פארדעם אז מקוה איז מסוגל ליראה, וואס דארף נאכדעם שטיין אז ש"י טבילות איז אויך מסוגל פאר יראה?
יישר כח
תשובה מאת הראש ישיבה שליט"א:
יום ה' פרשת שלח (קרח בא"י), כ"ו סיון, שנת תשפ"ו לפרט קטן
... נרו יאיר, תלמיד ישיבת היכל הקודש ירושלים
איך האב ערהאלטן דיין בריוו.
דו פרעגסט, דער רבי זאגט (ספר המדות אות יראה חלק א, סימן לא): "לְיִרְאָה תֵּלֵךְ לַמִּקְוֶה", דורך מקוה באקומט מען יראת שמים, איז וואס זאגט דער רבי (שם, סימן לז): "גַּם שַׁ"י [שְׁלשׁ מֵאוֹת וָעֶשֶׂר] טְבִילוֹת מְסֻגָּלִין לְיִרְאָה", זיך טובל'ן דריי הונדערט און צען מאל - איז מסוגל פאר יראת שמים; אמער, ביים גיין אין מקוה איז מען שוין זוכה צו יראה?!
וויסן זאלסטו, אין יראת שמים איז דא אסאך מדריגות, עס איז נישט פשט אז איינמאל מען האט יראת שמים איז מען שוין גוט, מען דארף אלץ שטרעבן צו באקומען מער און מער יראה פונעם אייבערשטן; מוהרא"ש דערציילט, ווען דער הייליגער רבי זכותו יגן עלינו פון סאטמער איז געווען אין ארץ ישראל, אין טבריה, ביים קבר פונעם הייליגן רמב"ם, האט ער דערציילט א פחד פון א מעשה, אז דער הייליגער ישמח משה זכותו יגן עלינו האט אמאל זייער געבעטן דעם אייבערשטן אז ער וויל זוכה זיין צוצוקומען צו די מדריגה, מורא האבן פונעם אייבערשטן אזוי ווי די אבות הקדושים האבן מורא געהאט, און מען האט אים מודיע געווען פון הימל אז עס איז נישט שייך, ער וועט דאס נישט קענען אויסהאלטן. האט דער הייליגער ישמח משה געבעטן, אפשר קען ער באקומען די יראה וואס די תנאים האבן געהאט, האט מען אים אויך מודיע געווען פון הימל אז ער וועט דאס נישט קענען אויסהאלטן, האט ער געבעטן אלץ לויט די שפעטערע דורות, ביז ווען ער האט געבעטן דעם רמב"ם'ס יראה, האט מען אים דאס געגעבן, און דער הייליגער ישמח משה האט דאס נישט געקענט אויסהאלטן, ער האט אוועק גע'חלש'ט; זעט מען פון דעם אז אין יראת שמים קען מען אלץ זוכה זיין צו מער און מער, דאס גייט העכער און העכער.
העיקר זאלסטו גיין אין מקוה יעדן טאג, און ווען דו טובל'סט זיך זאלסטו אינזין האבן שם א-ק-י-ק במילוי ההין: אל"ף ה"ה יו"ד ה"ה, וואס באטרעפט קנ"א (151), אזוי ווי מקו"ה (151), און האב אינזין: 'אֶקֱיֶ"ק, אֲנָא זָמִין לְמֵהֱוֵי' (לקוטי מוהר"ן חלק א, סימן ו), איך וויל זיין גוט, איך וויל זיין ערליך און הייליג; זאג פארן באשעפער אז דו גייסט שוין זיין אן ערליכער איד, היטן די אויגן, היטן די מחשבה, היטן דעם דיבור, און אזוי ווייטער.
דער אייבערשטער זאל העלפן זאלסט האבן הצלחה אין אלע ענינים.