תוכן השאלה
לכבוד דער ראש ישיבה שליט"א,
א גרויסן יישר כח פאר אלעס, ובפרט פאר'ן מיר געבן די שיינע וועג פונעם הייליגן רבי'ן, צו האבן א וועג צו לערנען, און צו שמועסן מיט'ן אייבערשטן אלעס וואס גייט אויף מיר אריבער.
געלויבט דער אייבערשטער אז איך האב געהאט שכל און געפאלגט דעם ראש ישיבה שליט"א פאר כמעט צוויי יאר צוריק און איך האב אראפ גענומען סטאטוס פון מיין טעלעפאן. איך מוז זאגן אז איך האב נאר פארדינט מער מח און צייט פון דעם.
מיין פראבלעם איז אבער, אזוי ווי איך בין אין א ביזנעס פון קאנסטראקשן, און מענטשן פרעגן מיר כסדר פארוואס איך לייג נישט קיין סטעטוס, די קאנקורענטן האלטן אין איין לייגן סטעטוס, מאכן אסאך גערודער, און מיינע חברים טענה'ען אז מען הערט נישט גענוג פון מיר; איך שפיר אבער אז דאס גייט מיר אוועקנעמען מיין קאפ פון טראכטן פונעם אייבערשטן.
אויך איז מיר זייער שווער ווען איך דארף טוען סעילס, איך דארף צורעדן מענטשן צו קומען צו מיר, און איך פיל שלעכט ביי מיר פארוואס לויף איך אזוי נאך א מענטש? איך ווייס אליין נישט וואס די ריכטיגע וועג איז, ווייל פון די אנדערע זייט זאגט אלץ דער ראש ישיבה שליט"א מען זאל נישט זיין קיין בטלנים, מען דארף מאכן פרנסה.
וואס איז די ריכטיגע וועג? דארף מען טון ממש אלעס וואס מען קען? זיכער מאכן אז יעדער זאל רעדן פון מיר? אויב דאס איז די זאך וואס מענטשן טוען אין מיין ליין, כדי צו שלעפן קונדן? אדער זאל איך זיך נישט לאזן פארדרייען דעם קאפ מיט שטותים, און גלייבן אז פרנסה און דזשאבס קומען נאר פונעם אייבערשטן?
יישר כח פון פאראויס פאר'ן מיר ווייזן די ריכטיגע וועג, אפילו אין זאכן וואס קוקן אויס אזוי פשוט.
יישר כח
תשובה מאת הראש ישיבה שליט"א:
יום ב' פרשת ויקרא, ח' אדר ב', שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
עס פעלט נישט אויס די אלע זאכן וכו'; דו זאגסט דאך אליין אז זייט דו האסט אפגעלאזט די סאשעל מידיע - האסטו באקומען א נייעם מח, דו האסט אנגעהויבן טראכטן פונעם אייבערשטן, לעבן מיט תכלית; איז וואס זאלסטו טראכטן פון צוריק גיין צו די סאשעל מידיע.
אז מען איז פארנומען מיט די כלים רחמנא לצלן איז לא ימלט מען זאל נישט נכשל ווערן מיט ראיות אסורות, און דאס שלעפט און שלעפט ביז מען פאלט אין ניאוף רחמנא לצלן, און אזוי האט מען זיכער נישט קיין פרנסה, מען פארלירט די פרנסה. אזוי ווי עס שטייט אין הייליגן זוהר (פנחס, רמד:): "מַאן דִּמְזַלְזֵל בְּפִרוּרִין דְּנַהֲמָא, עֲנִיּוּתָא רָדִיף אֲבַּתְרֵיהּ", ווער עס ווארפט אראפ ברעקלעך פון ברויט - וועט זיין אן ארעמאן, "כָּל שֶׁכֵּן מַאן דִּמְזַלְזֵל בְּפִירוּרִין דְּמוֹחָא", איז דאך זיכער אז אויב מען איז פוגם בברית, מען איז מוציא זרע לבטלה רחמנא לצלן - פארלירט מען דאס מזל און מען ווערט אן ארעמאן.
הער אויס וואס צדיקים זאגן, הער נישט אויס די וואס רעדן אנדערש פון צדיקים; צדיקים זאגן, אז מען קוקט עבירות, מען קוקט ניאוף רחמנא לצלן - פארלירט מען די מזל, מען פארלירט די פרנסה; וויפיל מען וועט נאכלויפן די געלט - וועט מען נישט האבן קיין שפע, און אז מען פאררעכט די אויגן, מען היט די אויגן, מען צעברעכט די אויגן - קומט שפע אין צייט. מוהרא"ש זאגט אויפן פסוק (תהלים קמה, טו): "עֵינֵי כֹל אֵלֶיךָ יְשַׂבֵּרוּ, וְאַתָּה נוֹתֵן לָהֶם אֶת אָכְלָם בְּעִתּוֹ", 'יְשַׂבֵּרוּ' – קען מען ליינען מיט א שׁין 'יְשַׁבֵּרוּ', א לשון פון צעברעכן, אז מען צעברעכט די אויגן, מען קוקט נישט קיין עבירות - דעמאלט "וְאַתָּה נוֹתֵן לָהֶם אֶת אָכְלָם בְּעִתּוֹ" – געבט דער אייבערשטער עסן און שפע אין צייט.
פון עבירות קומט נישט קיין שפע, עבירות ברענגט צרות, עבירות מאכט מען זאל זיך דארפן נעבעך מוטשען; עס איז דא א דיבור פון רבי'ן: "פרנסה געבט דער אייבערשטער אומזיסט, און ארבעטן - ארבעט מען פאר די עבירות".
בלייב שטארק מיט דיינע גוטע גדרים, בזכות דעם וועסטו האבן גרויס שפע.