בעזרת ה' יתברך

יום ב' פרשת מקץ, כ"ב כסליו, שנת תשפ"ה לפרט קטן

מרת ... תחי'

איך האב ערהאלטן אייער בריוו.

די אלע מחשבות וואס דרייען זיך אין קאפ אויב די שכנים הערן אריבער און אויב איר הערט פון זיי, און די מחשבות ווערן שטערקער און שטערקער ביז מען קען שוין גארנישט טון, נאר שטיין און אויסשפיצן די אויערן אויב מען וועט הערן עפעס וכו' וכו'; די עצה פאר דעם אלעס איז שמחה, זיין פרייליך, שמחה פארטרייבט די שלעכטע מחשבות, שמחה פארברענט אלע קליפות.

די מאשין וואס מאכט א גערודער העלפט נישט ווען מען איז נישט פרייליך, ענדערש נעמט א מאשין וואס זינגט לעבעדיגע פרייליכע ניגונים, וואס דער רבי זאגט (ספר המדות אות שמחה, סימן יד): "עַל יְדֵי זֶמֶר", דורך דאנקען און לויבן דעם אייבערשטן, "תָּבוֹא לִידֵי שִׂמְחָה", וועסטו ווערן פרייליך.

ביים רבי'ן איז געווען שמחה די וויכטיגסטע זאך, ווייל ווען מען איז בשמחה האט מען אן אפענע מח און אן אפענע הארץ צו קענען דינען דעם אייבערשטן. אזוי ווי די הייליגע חכמים, איידער זיי האבן אנגעהויבן לערנען מיט די תלמידים האבן זיי געמאכט א ווערטל, "ובדחי רבנן", אזוי זענען די תלמידים פרייליך געווארן (שבת ל:), רש"י זאגט: "נפתח לבם מחמת השמחה", די מח האט זיך געעפנט פון זיין פרייליך, אויף דעם זאגט דער רבי (ספר המדות שם, סימן כא): "עַל יְדֵי שִׂמְחָה תְּפִיסַת הַמֹּחַ נִתְגַּדֵּל", דורך שמחה ווערט דער מח גרעסער, מען קומט צו מוחין דגדלות, אלע נערווען און אלע דמיונות – אנטלויפן.

דער אייבערשטער זאל העלפן איר זאלט האבן הצלחה אין אלע ענינים.