ב אדר תשפ"ו

בעזרת ה' יתברך - יום ה' פרשת תרומה, ב' אדר, שנת תשפ"ו לפרט קטן

 

לכבוד ... נרו יאיר

יעצט ווען עס גייט איבער אויף דיר חלישת הדעת און בלבולים וכו' וכו', און דו דערהאלסט זיך, דאס איז א גרויסע חידוש, יעצט שיינסטו און לייכסט אין אלע עולמות, דיקא יעצט ווען עס איז חושך אפילה, אלעס איז טונקל, אלעס איז קאלט, אויסגעלאשן וכו', און דו גייסט אן מיט עבודת השם, יעצט שאקלסטו אלע הימלען.

דו ווייסט אז מוהרנ"ת האט געזען איינער פון די תלמידים ווי עס ברענט אין אים עבודת השם וכו', האט אים מוהרנ"ת געזאגט: "יעצט האב איך נאכנישט הנאה פון דיין עבודת השם יתברך, נאר דעמאלט ווען איך וועל דיך זען אין א קטנות הדעת און דו וועסט ווייטער דינען דעם אייבערשטן, ווען דו וועסט אראפפאלן און דו וועסט ווייטער טון וואס מען דארף טון – דעמאלט וועל איך הנאה האבן".

עס איז מיר אויסגעקומען צו רעדן מיט אנשי שלומינו, מיר האבן זיך מחזק געווען מיט דעם אז מיר זענען ברסלב'ע חסידים דארפן מיר קענען אנגיין אין די טרוקענע טעג, אין די קאלטע טעג, אין די טעג וואס מען זעט נישט, ווען מען שפירט נישט און ווען מען פאלט השם ישמרינו, דארף מען זיך אנהאלטן אין רבי'ן, אפיר זוכן די גוטע נקודות, ארויסכאפן אפאר טרוקענע דיבורים, נישט ווארטן צו האבן די הארץ... נאר טון לעובדא ולמעשה.

דראפע זיך און דערהאלט זיך.

דער אייבערשטער זאל העלפן זאלסט האבן הצלחה אין אלע ענינים.