ב טבת תשפ"ו

בעזרת ה' יתברך - יום ב' פרשת ויגש, ב' טבת, זאת חנוכה, שנת תשפ"ו לפרט קטן

 

לכבוד ... נרו יאיר

היינט איז זאת חנוכה, עס שטייט פון צדיקים אז מען קען פועל'ן ישועות; זאלסטו נישט זיין קיין בטלן, זיי זיך מקבל א גוטע קבלה, זאג פארן אייבערשטן דיין קבלה און בעט אים ער זאל דיר העלפן, וועסטו זען א גרויסע נס.

שטארק זיך אין אמונה, 'זאת' איז אמונה, אזוי זאגט דער הייליגער זוהר (הקדמת תיקוני זוהר, דף יא:), דאס איז דער נאמען פון 'זאת חנוכה', חנוכה איז מען זוכה צו אמונה, מען באקומט א שטארקע אמונה צו וויסן און גלייבן אז דער אייבערשטער איז אלעס, ער פירט אלעס, ער מאכט אלעס, נישטא גארנישט אויסער אים.

איך בין געווען שבת חנוכה אין שטעטל, עס איז געווען א הערליכע שבת, א הערליכע קיבוץ מיט אנשי שלומינו; דער אייבערשטער זאל העלפן מיר זאלן זוכה זיין צו אלע תיקונים וואס דער רבי איז מתקן אין די צייטן.

---

 

בעזרת ה' יתברך - יום ב' פרשת ויגש, ב' טבת, זאת חנוכה, שנת תשפ"ו לפרט קטן

 

מרת ... תחי'

היינט איז זאת חנוכה, עס שטייט פון צדיקים אז מען קען היינט פועל'ן ישועות; זייט אייך מקבל א גוטע קבלה, זאגט פארן אייבערשטן אייער קבלה און בעט אים ער זאל אייך העלפן, וועט איר זען א גרויסע נס.

זייט אייך מקבל א גוטע זאך אין צניעות, ווייל חס ושלום אויב מען פירט זיך נישט בצניעות - פארטרייבט מען די שכינה פון שטוב. דער אייבערשטער זאגט (דברים כג, טו): "וְלֹא יִרְאֶה בְךָ עֶרְוַת דָּבָר וְשָׁב מֵאַחֲרֶיךָ", דורך פריצות, דורך זיך נישט פירן איידל, דורך גיין אנגעטון נישט איידל - פארטרייבט מען מיך; דעריבער זאלט איר זיך מקבל זיין עפעס א גוטע זאך אין צניעות, גיין אנגעטון שטרומפ וואס זעט נישט אויס ווי די פיס, גיין אנגעטון קליידער וואס איז נישט אויסגעפאסט אויפן קערפער וכו' וכו'.

 

דער אייבערשטער זאל העלפן איר זאלט האבן הצלחה אין אלע ענינים.