ג טבת תשפ"ו

בעזרת ה' יתברך - יום ג' פרשת ויגש, ד' טבת, שנת תשפ"ו לפרט קטן

לכבוד ... נרו יאיר

שטארק זיך צו גיין אין שול דאווענען די דריי תפילות מיט מנין, די דריי תפילות איז אזוי הייליג, עס האלט דעם מענטש אין פארעם נישט צו פארקריכן.

דער רבי זאגט (לקוטי מוהר"ן חלק ב, סימן ח), די דריי תפילות ווערן אנגערופן מחנה ישראל, און דאס איז פשט וואס חכמינו זכרונם לברכה זאגן (ברכות נד:) עוג מלך הבשן האט געזאגט: "מַחֲנֵה יִשְׂרָאֵל כַּמָה הַוֵי, תְּלָתָא פַּרְסֵי", פרסי איז א לשון פון דאווענען די דריי תפילות, דאס איז מחנה ישראל, און ער איז געגאנגען און אויסגעריסן א בארג פון דריי פרסה, ער האט דאס געוואלט ווארפן אויף די אידן; עוג מלך הבשן איז דער יצר הרע וואס ער האט פיינט דעם איד, ער וויל הרג'ענען דעם איד, אים אוועק נעמען פון אייבערשטן, ווי אזוי? דורכדעם וואס ער וועט אים אוועק נעמען פון דאווענען די דריי תפילות, אזוי וועט ער אים אוועק נעמען פון מחנה ישראל.

אויך זאלסטו גיין אין מקוה, זיי נישט מוותר קיין איין טאג אויף מקוה; הייב אן דיין טאג מיט מקוה, דאס וועט דיך מאכן ניי געבוירן. דער הייליגער רבי נתן זכרונו לברכה, (קומענדיגע וואך דינסטאג, עשרה בטבת - איז זיין יארצייט) האט געזאגט: "ווער עס וועט גיין אין מקוה - וועט אלעס פאררעכטן".

עס איז געווען צוויי וואכן פאר זיין הסתלקות, שבת חנוכה, האט מען געשמועסט אז די דאך פון די מקוה איז איינגעפאלן און מען וועט נישט קענען גיין אין מקוה, שפעטער האט מען געזאגט אז די מקוה איז גוט, נאר ביי די פארצומער איז איינגעפאלן די דאך, און רבי נתן איז געגאנגען אין מקוה. ווען ער איז צוריק געקומען האט ער אנגעהויבן זיך גרייטן צום דאווענען, ער האט געזאגט די ברכות און נאכדעם האט ער אנגעהויבן דאנקען דעם אייבערשטן הויך אויף דעם וואס ער האט זוכה געווען צו גיין אין מקוה, ער האט געזאגט: "איך בין געווען גרייט צו גיין אין טייך בוג, אונטער די אייז", עס איז געווען יענעם ווינטער שרעקליך קאלט, די טייך בוג איז שוין געווען געפרוירן, רבי נתן האט געוויזן ווי ער וואלט ווען אריינגעשפרינגען אין טייך, און יעצט דארפן מיר לויבן דעם אייבערשטן אז מיר האבן געקענט גיין אין א ווארעמע מקוה. און עס האט זיך געמאכט דעמאלט א שיינע שמועס פון דאס גרויסקייט פון גיין אין מקוה.

רבי נתן האט דעמאלט געזאגט, מען זעט ביי די מעשה ווען מען איז געקומען דערציילן פאר עזרא הסופר אז אידישע קינדער פאלן נעבעך אין עבירות, מען האט חתונה מיט גוי'אישע פרויען, האט עזרא זיך גענומען שרייען קולי קולות (עזרא ט, ו): "בֹּשְׁתִּי וְנִכְלַמְתִּי לְהָרִים אֱלֹקַי פָּנַי אֵלֶיךָ", איך שעם זיך פון דיר אייבערשטער, איך שעם זיך אויפצוהייבן מיין קאפ, און נאכדעם שטייט: "וַיַּעַן שְׁכַנְיָה בֶן יְחִיאֵל וְכוּ', אֲנַחְנוּ מָעַלְנוּ" וְכוּ', וְעַתָּה יֵשׁ מִקְוֶה לְיִשְׂרָאֵל", עס איז דא א וועג דאס צו פאררעכטן, און די פסוק כאפט אן א לשון פון מקוה, צו ווייזן און צו לערנען אז דורך מקוה קען מען אלעס פאררעכטן, אפילו די ערגסטע עבירות.

דער אייבערשטער זאל העלפן זאלסט האבן הצלחה אין אלע ענינים.