ב ניסן תשפ"ה

בעזרת ה' יתברך - יום ב' פרשת ויקרא, ב' ניסן, שנת תשפ"ה לפרט קטן

 

לכבוד ... נרו יאיר

יעצט ווען דו מאכסט דיינע פלענער אויף יום טוב פסח, געדענק אז פסח עסט מען נאר אין שטוב, אדער ביי די עלטערן אדער ביי זיידעס, מען מישט זיך נישט פסח מיט קיינעם, און מען גייט נישט אין האטעלס וכו'.

לויף נישט אוועק פון פסח'דיג מאכן, לויף נישט אוועק פון אויסרוימען די חמץ, היינטיגע צייטן איז עס נישט שווער, אמאל האט מען געניצט די חמץ'דיגע כלים פאר פסח, האט מען דאס געדארפט אויסקראצן און אויסרייבן און כשר'ן, דאס איז א שווערע ארבעט. היינט האט יעדער פסח'דיגע כלים, איז דאס איינרישן דעם יום טוב נישט אזוי שווער.

לויף נישט אוועק פון שטוב, בלייב אין שטוב אויף יום טוב, אדער ביי דיינע עלטערן אדער ווייב'ס עלטערן, און בעט דעם אייבערשטן דו זאלסט זוכה זיין צו א פרייליכע יום טוב און צו די הייליגקייט פון יום טוב; ווי מער מען בעט אויף שפירן א טעם אין די מצוות, שפירן די הייליגקייט פון די מצוות - איז מען זוכה אנצוקומען צו דעם.

פסח זיצט מען די גאנצע משפחה אינאיינעם, אזוי ווי מען פלעגט עסן אינאיינעם די 'קרבן פסח' - וואס מען האט געגעסן אינאיינעם מיט די משפחה.

ביים הייליגן רבי'ן האט קיינער נישט מיט געגעסן ליל הסדר, דער רבי האט געגעסן נאר מיט זיין משפחה. איינמאל האט רבי נתן געדארפט עפעס נעמען פון א צימער, איז ער אריבער די שטוב וואו דער רבי איז געווען, און ער האט געזען דעם רבי'ן זיצן מיטן קיטל און מיט א טלית און די פנים איז אים געווען רויט פון דביקות און התלהבות, רבי נתן האט זיך זייער מחי' געווען מיט דעם.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.