ד טבת תשפ"ו

בעזרת ה' יתברך - יום ד' פרשת ויגש, ד' טבת, שנת תשפ"ו לפרט קטן

 

טייערער נשות אנשי שלומינו שתחיו

קומענדיגע וואך מאנטאג נאכט פרשת ויחי וועט פארקומען די יארצייט פון דעם גרויסן תלמיד פון הייליגן רבי'ן, רבי נתן זכר צדיק לברכה און מיר ווילן מאכן אין אלע שולן אין אלע שטעט א סעודה; מיר ווילן וויסן ווער עס וויל האבן א חלק אין די סעודה, עפעס קאכן, עפעס באקן, עס זאל זיין א זכות פאר די משפחה; ביטע זיך מעלדן יעדער איינער צו די גבאים פון זייער שטאט.

אלעס וואס מיר האבן און וואס מיר ווייסן - איז אין זכות פון רבי נתן זכותו יגן עלינו; דער רבי האט געזאגט (חיי מוהר"ן, סימן שע): "מיר דארפן דאנקען ר' נתן, ווייל ווען נישט אים וואלט נישט געבליבן איין בלעטל שמות פון מיר".

דער אייבערשטער זאל העלפן איר זאלט האבן הצלחה אין אלע ענינים.

---

בעזרת ה' יתברך - יום ד' פרשת ויגש, ה' טבת, שנת תשפ"ו לפרט קטן

לכבוד ... נרו יאיר

אפילו דו קוקסט וואס דו קוקסט, אבער פאר דיינע קינדער זאלסטו גארנישט ווייזן; עס איז נישט געזונט פאר קינדער צו קוקן אויפן טעלעפאן, טו עס נישט; פאלג מיך, איך מיין נישט דיין שלעכטס, איך וויל דו זאלסט האבן געזונטע קינדער.

נעם א משניות, זאג פרקים משניות, און בעט דעם אייבערשטן ער זאל דיך ארויסנעמען פון די טומאה, פון די קליפות, פון די זוהמה פון קוקן עבירות. זאגן משניות וועט דיר העלפן; ווייל אפילו אין שאול תחתית, אפילו אין די דיוטא התחתונה - גייט די תורה דארט אראפ און שלעפט ארויס דעם מענטש פון דארט.

הלואי וועסטו מיך אויסהערן, הלואי וועסטו מיך פאלגן; וואס נאך קען איך טון דו זאלסט נישט צוגרונד לייגן דיינע אייגענע קינדער, דיין אייגענע שטוב? עס איז גענוג שווער דאס לעבן אן דעם טעלעפאן, אן דעם קאמפיוטער, די קינדער גייען שוין אריבער שווערע נסיונות אן דעם, וואס דארף מען זיי יונגערהייט געבן די ביטערע טעם פון קוקן, השם ישמרינו...

דער אייבערשטער זאל העלפן זאלסט האבן הצלחה אין אלע ענינים.