ה תשרי תשפ"ה

בעזרת ה' יתברך - יום ב' פרשת וזאת הברכה א', ה' תשרי, שנת תשפ"ה לפרט קטן

לכבוד ... נרו יאיר

חסדי השם יתברך מיר זענען שוין אהיים געקומען בשלום פון אומאן, מיר דארפן נאך קומען צו זיך פון די לאנגע נסיעה. די לעצטע פאר יאר פון ווען עס איז דא די מלחמה צווישן רוסלאנד און אוקריינא און מען קען נישט פארן גלייך קיין אוקריינא, מען דארף גיין פון איין לאנד צום צווייטן - איז די נסיעה שווערער, און מיט דעם אלעם זענען אנשי שלומינו נישט מוותר אויף די נסיעה, מען פארט צום רבי'ן מיט מסירות נפש.

זיי פרייליך אז דו ביסט געווען אין אומאן. דער רבי האט געזאגט (חיי מוהר"ן, סימן תג): "מִי שֶׁזּוֹכֶה לִהְיוֹת עַל רֹאשׁ הַשָּׁנָה רָאוּי לוֹ לִשְׂמֹחַ מְאֹד מְאֹד", ווער עס איז געווען ביי אים ראש השנה דארף זיין פרייליך א גאנץ יאר; אויך די וואס זענען נישט אנגעקומען קיין אומאן (די יאר זענען אסאך פון אנשי שלומינו בני ארץ ישראל אפגעהאלטן געווארן און נישט געקענט אנקומען קיין אומאן) - דארפן זיך אויך זייער פרייען, די זענען אויך געווען אין אומאן.

איך האב אסאך צו דערציילן פון אונזער שיינע ראש השנה, איך דארף אבער קומען צו מיינע כוחות, איך דארף זיך נאך אפרוען.

א גמר חתימה טובה, א גוט געבענטשט יאר.