ז אדר תשפ"ו

בעזרת ה' יתברך - יום ג' פרשת תצוה, ז' אדר, שנת תשפ"ו לפרט קטן

 

לכבוד ... נרו יאיר

עס קומט פורים, מען גייט זוכה זיין צו הערן די מגילה; צדיקים זאגן, עס לוינט זיך צו קומען אויף די וועלט און ליידן וואס מען ליידט – אבי זוכה זיין צו הערן איין מאל אין לעבן די מגילה.

צדיקים זאגן, 'מגילת' אסתר, עס ווערט אנטפלעקט אז דער אייבערשטער איז באהאלטן אין יעדע זאך, ווייל אז מען לייגט צו די אויערן צו די מגילה פון אנהייב הערט זיך עס ווי א געווענליכע מעשה; אחשורוש מאכט א סעודה און ער רופט ושתי וכו', ער הרג'עט איר, ער זוכט א ווייב, אסתר ווערט פארכאפט, א מעשה מיט בגתן ותרש וכו' וכו', און מען זעט ווי דער אייבערשטער איז באהאלטן אין די מעשה, און דאס וועקט אונז אויף מיר זאלן זיך ערוועקן און וויסן אז אין אונזער טאג טעגליכע לעבן, אין אונזער לעבנ'ס געשיכטע – איז באהאלטן דער אייבערשטער.

ברודער וועק זיך אויף, הייב אן הערן די קול פון הייליגן רבי'ן וואס איז אונז מגלה אז אפילו בהסתרה נמצא השם יתברך, אז אין די באהעלטעניש איז דער אייבערשטער (לקוטי מוהר"ן חלק א, סימן נו), דער רבי לערנט אונז אויס מיר זאלן זיך ווענדן צום אייבערשטן, אים בעטן: "רבונו של עולם איך וויל דיך זען, רבונו של עולם באהאלט זיך נישט פון מיר, איך וויל זיין נאנט צו דיר" (שם חלק ב, סימן יב).

שטארק זיך צו דאווענען די דריי תפילות מיט מנין מיט א סידור, ברענג נישט אין שול דיין טעלעפאן, נעם די פאר מינוט צו זיין פריוואט, דו מיטן אייבערשטן, אליינס זיך אויסשמועסן.

דער אייבערשטער זאל העלפן זאלסט האבן הצלחה אין אלע ענינים.