ז ניסן תשפ"ו

בעזרת ה' יתברך - יום ד' פרשת צו, ז' ניסן, שנת תשפ"ו לפרט קטן

 

לכבוד ... נרו יאיר

שטארק זיך צו דאווענען מיט מנין, שפרינג אריבער אלע שוועריקייטן און אויך די גייסטישע שוועריקייטן, טאנץ איבער די אלע מחשבות וכו', גיי אין שול מיט שמחה, דאווען מיט מנין. חכמינו זכרונם לברכה זאגן (ברכות ז:) אויפן פסוק (תהלים סט, יד): "'וַאֲנִי תְפִלָּתִי לְךָ ה' עֵת רָצוֹן', אֵימָתַי עֵת רָצוֹן", ווען איז אן עת רצון? - "בְּשָׁעָה שֶׁהַצִּבּוּר מִתְפַּלְּלִין", ווען די ציבור דאווענט, דעמאלט קען מען אלעס פועל'ן.

זיי זיך מוסר נפש צו דאווענען מיט מנין, די הייליגע חכמים זאגן, (תענית ח.) דער אייבערשטער נעמט אן די תפילות וואס מען דאווענט, נאר די תפילות וואס מען האט אינזין, פרעגט די גמרא, עס שטייט דאך (תהלים עח, לו-לז), די אידן האבן געפאפט דעם אייבערשטן מיט זייער מויל, זיי האבן נישט אינזין געהאט ווען זיי האבן געבעטן דעם אייבערשטן וכו', דאך זאגט דער פסוק ווייטער: "וְהוּא רַחוּם יְכַפֵּר עָוֹן" וגו', אז דער אייבערשטער האט אנגענומען זייערע תפילות און ער האט זיי מוחל געווען אויף זייערע עבירות? ענטפערט די גמרא: "לֹא קַשְׁיָא, כָּאן בְּיָחִיד כָּאן בְּצִבּוּר", אויב מען דאווענט מיט מנין דעמאלט נעמט דער אייבערשטער אן יעדע תפילה, אפילו מען האט נישט אינזין וכו'; זעט מען דאס גרויסקייט פון דאווענען מיט מנין, אז דער אייבערשטער נעמט אן די תפילה אזוי ווי עס זעט אויס, אפילו מען האט נישט אינזין דאס דאווענען אזוי ווי עס דארף צו זיין.

איך דארף האבן די וואך א גרויסע נס צו קענען באצאלן אונזערע איינגעשטעלטע אויף יום טוב, איך בין אנגעוויזן אויף דיין הילף, איך קען נישט גיין צום סדר ווען איך בין שולדיג פאר זיי, דו קענסט מיר העלפן מאכן גרינגער, פארבינד זיך מיט אברהם משה שטראססער נרו יאיר, ער העלפט מיר שאפן געלט צו קענען באצאלן אלע מלמדים, טיטשערס, אפיס וכו'.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.