יב אייר תשפ"ו

בעזרת ה' יתברך - יום ד' פרשת אמור, י"ב אייר, שנת תשפ"ו לפרט קטן

 

לכבוד ... נרו יאיר

אשרינו מה טוב חלקינו ומה נעים גורלינו אז מיר ווייסן פון הייליגן רבינ'ס עצות ווי אזוי צו זוכה זיין צו דינען דעם אייבערשטן. דער הייליגער רבי האט געזאגט (חיי מוהר"ן, סימן שיד): "הַפָּחוּת שֶׁבַּאֲנָשַׁי אֲנִי מוֹלִיךְ אוֹתוֹ בְּדֶרֶךְ שֶׁל צַדִּיק גָּדוֹל מְאֹד", דער קלענסטער פון מיינע מענטשן - אויך אים - פיר איך אויפן וועג פון גרויסע צדיקים; נאך האט דער רבי געזאגט (שם, סימן שלב): "אֲנִי נָהָר הַמְטַהֵר מִכָּל הַכְּתָמִים", איך בין א טייך וואס רייניגט פון אלע שמוציגע פלעקן; מיט די עצות פון רבי'ן קען מען זיך רייניגן פון אלע שלעכטס, קריג זיך נישט מיט די מחשבות, נעם די עצה פון רבי'ן, דער רבי זאגט (לקוטי מוהר"ן חלק א, סימן רלג), דער אייבערשטער האט א גרויסע תענוג פון זען ווי מען שטארקט זיך אויף שלעכטע מחשבות, און אזוי ווי עס איז דא ביי די קעניגן, זיי האבן א פארגעניגן צו ברענגען חיות וואס קריגן זיך איינער מיטן צווייטן, און אלע שטייען און קוקן וועלכע חיה וועט מנצח זיין, און די קעניגן האבן א גרויסע פארגעניגן פון דעם, אזוי אויך זאגט דער רבי איז מיט די מחשבות פונעם מענטש, די מחשבות פונעם מענטשן זענען אזוי ווי חיות, גוטע מחשבות זענען טהור'ע חיות און די שלעכטע מחשבות זענען די טמא'נע חיות, און פון הימל ברענגט מען די שלעכטע מחשבות פארן מענטש אז ער זאל זיך קריגן מיט זיי, און דער אייבערשטער האט א גרויסע תענוג ווען מען שטארקט זיך אויף זיי.

דער רבי זאגט (שם), אן עצה ווי אזוי מען קען זוכה זיין צו האבן ריינע פאזעטיווע מחשבות, "הַכְּלָל שֶׁאִי אֶפְשָׁר בְּשׁוּם אֹפֶן בָּעוֹלָם שֶׁיִּהְיוּ שְׁנֵי מַחֲשָׁבוֹת בְּיַחַד בְּפַעַם אֶחָד", עס איז נישט מעגליך מען זאל טראכטן צוויי מחשבות אויף איין מאל, ממילא איז זייער גרינג צו פטור ווערן פון נישט גוטע מחשבות, דורך אריינעמען אין זיך א גוטע מחשבה, דורך טראכטן פון תורה און פון תפילה, אדער אפילו פון ביזנעס וכו'; אזוי גייט פון זיך אליינס אוועק די שלעכטע מחשבה.

מארגן ליל שישי וועט די שיעור נישט זיין אין ישיבה, די שיעור וועט זיין ביי די מסיבה וואס וועט פארקומען פאר די תומכים וואס העלפן די מוסדות רבי מאיר בעל הנס, אונזערע שיינע הייליגע מוסדות אין ארץ ישראל, מען וועט קענען מיט האלטן די שיעור אויפן די הוקאפ. ביי די וועלט איז אנגענומען אז פסח שני איז די יארצייט פון דער הייליגער תנא אלוקי רבי מאיר בעל הנס, וועלן מיר מאכן א סעודה אינאיינעם מיט א פסח שני סעודה מיט די חברים וואס העלפן מיר דעקן די מוסדות צו קענען באצאלן די מלמדים און טיטשערס אין צייט.

דער אייבערשטער זאל העלפן זאלסט האבן הצלחה אין אלע ענינים.