כד תמוז תשפ

בעזרת ה' יתברך - יום ה' פרשת מטות-מסעי, כ"ד תמוז, שנת תש"פ לפרט קטן

 לכבוד ... נרו יאיר.

רבי נתן זכרונו לברכה האט געוואוינט אויפ'ן גאס וואו עס האט זיך געפונען דער מארק, ער האט שטענדיג געהאלטן די פענסטער און די פירהאנג פארמאכט און ער איז קיינמאל נישט צוגעגאנגען צום פענסטער קוקן וואס טוט זיך אין גאס. איינמאל זיצנדיג אין שטוב בשעת'ן שרייבן חידושי תורה האט ער געהערט הויכע קולות פון גאס - מער ווי געווענליך, האט ער אראפ געלייגט דעם פעדער און געוואלט גיין קוקן וואס עס גייט פאר, ווען ער האט זיך שוין אויפגעשטעלט צו גיין קוקן, האט ער אנגעכאפט דעם טיש און געזאגט צו זיך אליין: "נתן נתן... איין קוק ווייניגער אויף די וועלט -  איז פארט בעסער", און ער האט זיך צוריק אראפ געזעצט.

ווען דו גייסט אין גאס און דו האסט א נסיון צו קוקן - זאלסטו זיך דערמאנען דעם ווארט וואס רבי נתן האט געזאגט: "איין קוק ווייניגער אויף די וועלט - איז פארט בעסער"; איין קוק ווייניגער איז א ברי ווייניגער פאר די נשמה.

"חזק חזק ונתחזק!" איך האף אז דו וועסט קענען מיט זאגן די וואך שבת ביי קריאת התורה מיט'ן גאנצן עולם: "חזק חזק ונתחזק"; אז מען לערנט יעדן טאג אביסל חומש רש"י מיט'ן תרגום, ווען עס קומט סוף ספר זעט מען וואס מען האט אין די האנט, מען האט נאך א ספר פון די חמשה חומשי תורה; ווען מען פרעגט: "חמשה מי יודע?" קען מען ענטפערן: "חמשה אני יודע", איך האב חומש אין די האנט.

דער אייבערשטער זאל העלפן זאלסט האבן הצלחה אין אלע ענינים.

~~~~~~~~~~

בעזרת ה' יתברך - ה' פרשת מטות-מסעי, כ"ה תמוז, שנת תש"פ לפרט קטן

 לכבוד ... נרו יאיר.

געב אכטונג אויף דיין שלום בית, זיי זיך מבזה אבי דיין שטוב זאל בלייבן גאנץ; זאלסט טון אלעס אויף די וועלט אז דיין שלום בית זאל זיין גוט, דיין שטוב זאל נישט צאמפאלן.

די הייליגע חכמים דערציילן (ויקרא רבה, פרשה ט, סימן ט): "רַבִּי מֵאִיר הֲוָה יָתִיב וְדָרִישׁ בְּלֵילֵי שַׁבַּתָּא, הֲוָה תַּמָּן חָדָא אִתְּתָא יַצִּיבָא וְשָׁמְעָה לֵיהּ תָּנְתָא מִדְרָשָׁא", עס איז געווען א פרוי וועלכע פלעגט גיין יעדן פרייטאג צו נאכט'ס צום שיעור פונעם הייליגן תנא רבי מאיר בעל הנס, "אַמְתִּינַת עַד דִּיחֲסַל מִמִּדְרָשׁ", איין וואך האט דער תנא רבי מאיר אריינגעצויגן די שיעור אביסל שפעט און די פרוי האט געטראכט אז זי וועט אויסווארטן ביז ער ענדיגט דעם שיעור. "אָזְלָה לְבֵיתָהּ, אַשְׁכְּחָא בּוּצִינָא טָפֵי", ווען זי איז אהיים געקומען איז שוין געווען טונקל אין שטוב, די ליכט האבן זיך שוין געהאט אויסגעלאשן, "אֲמַר לָהּ בַּעְלָהּ, אָן הֲוֵית", ווען איר מאן האט איר געפרעגט וואו זי איז געווען, "אָמְרָה לֵיהּ אֲנָא יָתִיבָא וְשָׁמְעָה קָלֵיהּ דָּרוֹשָׁה", האט זי געענטפערט: ביים שיעור פון הייליגן תנא רבי מאיר, "אֲמַר לָהּ כֵּן וְכֵן לָא אִעַיַּלְתְּ לְהָכָא עַד דַּאֲזַלְתְּ וְרוֹקַת בְּאַנְפֵּי דָרוֹשָׁה", איר מאן איז געווען א שלעכטער מענטש, א כעסן, א לץ; האט ער איר געזאגט: 'דו קענסט נישט אריין קומען אין שטוב ביז ווילאנג דו גייסט נישט שפייען אויפ'ן פנים פונעם בעל דרשן', און ער האט פארמאכט די טיר. "יְתִיבָא שַׁבַּתָּא קַמַּיְיתָא תִּנְיָנָא וּתְלִיתָא, אֲמָרִין לָהּ מְגֵירָתָא כַּדּוּ אַתּוּן צְהִיבִין, אֲתֵינָן עִמָּךְ לְגַבֵּי דָּרוֹשָׁה", די פרוי איז געווען א ערליכע פרוי און זי האט געטראכט צו זיך: 'ענדערש וועל איך בלייבן אינדרויסן ווי איידער מבזה זיין דעם הייליגן תנא רבי מאיר', און זי איז געגאנגען צו א חבר'טע שלאפן.

אזוי זענען אריבער אפאר וואכן וואס זיי זענען געווען צעטיילט. דער הייליגער תנא רבי מאיר בעל הנס האט דאס געזען מיט רוח הקודש, האט ער ארויס געלאזט א שמועה אז זיין אויג טוט אים וויי, ער שפירט ווי עס ברענט אים, און ער בעט אז ווער עס קען לוחש זיין אויף דעם זאל קומען צו אים. (אמאל איז געווען אזא סארט רפואה, אז מען פלעגט שפייען אויפ'ן אויג און זאגן עפעס ווערטער, און אזוי איז מען אויסגעהיילט געווארן).

ווען די חבר'טעס פון די פרוי האבן דאס געהערט האבן זיי איר געזאגט: "גיי שפיי אריין אין רבי מאיר'ס אויג, אזוי וועט דיין מאן מאכן שלום מיט דיר". אזוי האט זי געטון, זי איז געגאנגען צו רבי מאיר, און רבי מאיר האט איר געפרעגט: "דו קענסט לוחש זיין"? האט זי זיך דערשראקן און געזאגט דעם אמת אז זי קען נישט. האט איר רבי מאיר געזאגט: "אֲפִלּוּ הָכֵי, רוֹקִי בְּאַנְפִּי שְׁבַע זִמְנִין וַאֲנָא מִינְשִׁים", אפילו דו קענסט נישט לוחש זיין שפיי אריין זיבן מאל אויף מיין פנים, אזוי וועל איך האבן א רפואה, "עָבְדָה הָכִין", און זי האט אזוי געטון, "אֲמַר לָהּ אִיזִילִי אִמְרִי לְבַעֲלִיךָ אַתְּ אֲמַרְתְּ חָדָא זִימְנָא וַאֲנָא רָקֵית שְׁבַע זִימְנִין", האט איר רבי מאיר געזאגט: גיי אהיים און זאג פאר דיין מאן: דו האסט מיר געהייסן שפייען איינמאל, אבער איך האב געשפיגן זיבן מאל.

האבן די תלמידים געפרעגט פון רבי מאיר: רבי, כבוד התורה! פארוואס האט אונז נישט דער רבי געזאגט אז דער מענטש האט געהייסן זי זאל שפייען אויפ'ן רבי'ן, מיר וואלטן אים מסדר געווען ער זאל זיך נישט ווייגן אזוינס צו טון?! "אֲמַר לְהוֹ לָא דַּיּוֹ לְמֵאִיר לִהְיוֹת שָׁוֶה לְקוֹנוֹ, דְּתָנֵי רַבִּי יִשְׁמָעֵאל גָּדוֹל שָׁלוֹם שֶׁשֵּׁם הַגָּדוֹל שֶׁנִּכְתַּב בִּקְדֻשָּׁה אָמַר הַקָּדוֹשׁ בָּרוּךְ הוּא יִמָּחֶה עַל הַמַּיִם בִּשְׁבִיל לְהַטִּיל שָׁלוֹם בֵּין אִישׁ לְאִשְׁתּוֹ", האט רבי מאיר געזאגט: דער אייבערשטער האט געהייסן מען זאל אויסמעקן זיין נאמען אבי צו מאכן שלום צווישן מאן און ווייב, איז דאך זיכער אז רבי מאיר'ס נאמען זאל אויסגעמעקט ווערן אבי צו מאכן שלום צווישן מאן און ווייב; זעט מען ווי חשוב עס איז אז עס זאל זיין שלום צווישן מאן און ווייב.

איך האף אז דו וועסט ארויס נעמען פון דעם סיפור א לימוד לעובדא ולמעשה ווי אזוי זיך צו פירן אין שטוב אז דיין שטוב זאל נישט צאמפאלן.

 

דער אייבערשטער זאל העלפן זאלסט האבן הצלחה אין אלע ענינים.