כה אייר תשפ"ג

בעזרת ה' יתברך - יום ג' פרשת במדבר, כ"ה אייר, מ' לעומר, שנת תשפ"ג לפרט קטן

לכבוד ... נרו יאיר ברסלב, ליבערטי

היות די וועכנטליכע ליל שישי שיעור קומט אויס אין די צייט וואס מען דאווענט מנחה מעריב און עס שטערט די צענטעראלע מנין מנחה מעריב - וועט מען מאכן א טויש מיטן ליל שישי שיעור. מען וועט מער נישט קענען מיט האלטן די שיעור אין בית המדרש, אין שול וועט מען דאווענען מנחה מעריב. די שיעור וועט פארקומען יעדן ליל שישי אין 'היכל ראזענבערג' אום ניין אזייגער.

דער אייבערשטער זאל העלפן זאלסט האבן הצלחה אין אלע ענינים.

---

בעזרת ה' יתברך - יום ג' פרשת במדבר, כ"ה אייר, מ' לעומר, שנת תשפ"ג לפרט קטן

לכבוד ... נרו יאיר

איך וועל נישט זיין באליידיגט אז דו וועסט זיך טרעפן א נייעם ראש ישיבה, א נייעם פלאץ. איך מוז דיר זאגן וואס ליגט מיר שוין א לאנגע צייט אויפן הארץ, איך מוז דיר זאגן דעם אמת; אז דו לעבסט נישט, דו ביסט פארנומען רוב טאג מיט דיין טעלעפאן, מיט שטותים והבלים, און אז דו פארשטייסט בעסער - ווער איך נישט באליידיגט, איך וויל אבער נישט זאלסט קומען דא און זיך דרייען צווישן מיינע תלמידים.

איך וויל נישט זאלסט קומען ביי מיר אין שול מיט דיין טעלעפאן.

---

בעזרת ה' יתברך - יום ג' פרשת במדבר, כ"ה אייר, מ' לעומר, שנת תשפ"ג לפרט קטן

לכבוד ... נרו יאיר

מזל טוב פארן סיום מסכת כלאים ירושלמי, און מזל טוב פארן מארגנדיגע סיום מסכת סוטה, און די גרעסטע מזל טוב פארן אנהייבן מסכת גיטין; יעצט בזמן וואס מען גרייט זיך אויף קבלת התורה - הויבסטו אן לערנען יעדן טאג א בלאט גמרא, דאס וועט דיך אפהיטן פון אלעם שלעכטס.

שבועות וועל איך זיין מיטן אייבערשטנ'ס הילף אין קרית ברסלב, איך וועל דאווענען אלע תפילות אינעם בית המדרש אויף האשקי גאס.

אויך אם ירצה ה' זומער הבא עלינו לטובה וועל איך זיין מיט די בחורים אין שטעטל; די יאר הויבט זיך אן די קעמפס מיט א וואך פריער, מען הויבט אן פרשת חקת בלק. איך האף מיטן אייבערשטנ'ס הילף צו געבן שיעורים במשך די זומער וואכן אין 'היכל ראזענבערג'.

איך האב געמאכט א נייע זאך אין ישיבה, איך וויל דו זאלסט וויסן, מען קען נישט קומען אין ישיבה נאר מיט א ריינעם טעלעפאן. איך בעט זיך שוין ביי די בחורים א לאנגע צייט, יעצט האב איך געדארפט טון למעשה, איך האב געדארפט אוועק שיקן סיי בחורים און סיי אינגעלייט וואס דרייען זיך דא אין ישיבה; מען קען נישט קומען אין ישיבה מיט א טעלעפאן.

איך שרייב דיר דאס פאראויס, זאלסט וויסן אז איך מיין דיך אויך; מען קען נישט קומען אין ישיבה מיט א טעלעפאן.

איך האב נעכטן געשמועסט ביי די שיעור מיט די בחורים, זיי זאלן וויסן, וואס דיין ווייב וועט נאר פרובירן צו טון זי זאל זיין אינטערעסאנט פאר דיר, ווי אזוי זי וועט זיך אנטון, ווי שיין זי וועט זיך מאכן - וועט זי נישט קענען קאמפיטן מיטן טעלעפאן. אז דו וועסט האבן א טעלעפאן וועט דאס זיין מער אינטערעסאנט, און זי וועט ווארטן זאלסט געבן א בליק אויף איר און איר געבן אויפמערקזאמקייט, די שטוב וועט צעפאלן.

וואויל איז דעם וואס איז נישט צוגעבינדן צום טעלפאן, ער איז צוגעבינדן צום אייבערשטן און צו די תורה.

דער אייבערשטער זאל העלפן זאלסט האבן הצלחה אין אלע ענינים.