ל סיון תשפ

בעזרת ה' יתברך - יום ב' פרשת קרח, א' דראש חודש תמוז, שנת תש"פ לפרט קטן

 לכבוד ... נרו יאיר, קרית ברסלב ליבערטי.

איך וויל בעטן אלע אנשי שלומינו וואס האבן נאך נישט גענומען א חלק אין די צדקה פאר'ן עירוב וואס מיר בויען יעצט אין קרית ברסלב ליבערטי - צו נעמען א חלק אין דעם; עס איז א גרויסע זכות צו האבן אין א חלק אין די מצוה.

העלפן בויען אן עירוב איז מסוגל פאר קינדער, אזוי ווי עס איז ידוע די מעשה, עס איז געקומען א איד צום הייליגן ייטב לב זכותו יגן עלינו און געבעטן א ברכה פאר זרע של קיימא נאכדעם וואס ער האט לאנגע יארן נישט געהאט קיין קינדער, האט אים דער ייטב לב געזאגט אז ער זאל מאכן דעם עירוב אין שטאט, דער איד האט מתקן געווען דעם עירוב און ער האט זוכה געווען צו זרע של קיימא.

וואס וועלן מיר מיט נעמען אויבן אויף יענע וועלט? וואס וועט בלייבן פון אלע פלאג וואס מיר פלאגן זיך? וואס וועט בלייבן פון אלע הארעוואניע? - נאר דאס ביסל צדקה.

דער אייבערשטער זאל העלפן זאלסט האבן הצלחה אין אלע ענינים.

~~~~~~~~~~

בעזרת ה' יתברך - ב' פרשת קרח, ב' דראש חודש תמוז, שנת תש"פ לפרט קטן

 לכבוד ... נרו יאיר.

לאז אפ, הער שוין אויף; שוין גענוג געקוקט. לייג שוין אוועק דעם טעלעפאן; ענדערש קוק אויף דיין ווייב און קינדער, ענדערש קוק אין די הייליגע משניות.

אלע צרות קומען פון קוקן עבירות, אלע ארעמקייט קומט פון פגם הברית וואס הייבט זיך אן מיט די אויגן; איך בעט דיר, לאז אפ. הער אויף, האסט שוין גענוג געקוקט! אז דו וועסט נישט קוקן עבירות וועסטו זיך שפירן ווי א פרייער מענטש.

יישר כח פאר'ן העלפן די ישיבה מיט'ן קאמפיין.

אויב דו ווייסט פון א פלאץ וואו איך קען גיין מיט די בחורים פאר'ן זומער - לאז מיר וויסן, אדער רוף האברך ... נרו יאיר.

דער אייבערשטער זאל העלפן זאלסט האבן הצלחה אין אלע ענינים.