בעזרת ה' יתברך - יום ג' פרשת בא, ב' שבט, שנת תשפ"ו לפרט קטן
... נרו יאיר
דארפסט זיך זייער שטארקן צו זיין א געדולדיגער מענטש, זיך נישט פארלירן, און ווען דו זעסט זאכן גייען נישט ווי דו ווילסט וכו' – זאלסטו זיך נישט אויפרעגן, ווייל אויב מען האלט זיך צוריק פון ווערן בכעס – איז מען זוכה צו קומען צו די העכסטע פלאץ, צו עולם האצילות, אפילו מען ליגט אין מדור הקליפות וכו', דורך זיך איינהאלטן און זיך נישט אויפרעגן, דורך זיין בטל ומבוטל צום אין סוף ברוך הוא; בפרט אין שטוב אויף די ווייב טאר מען נישט האבן קיין טענות און תרעומות, און אז זאכן באדערן, זאכן שטערן, דארף מען זיך אינגאנצן מבטל זיין צום אייבערשטן.
הלוואי זאלסטו צוריק אנהייבן לערנען יעדן טאג חומש מיט תרגום – מעביר סדרה זיין יעדן טאג די פרשה פון די וואך, איינגעטיילט לויט די טעג פון די וואך, און אויך א שיעור אין משניות, זאגן פרקים משניות, און אויך זאגן יעדן טאג תהילים, און אפאר בריוון פון אשר בנחל; אויף די שיעורים זאלסטו זיך פארלייגן וועסטו ווערן מער און מער געדולדיג, דו וועסט קענען סובל זיין ווען זאכן גייען נישט ווי דו ווילסט, און ווען זאכן ווערן געטון נישט ריכטיג.
די בריוו שרייב איך דיר אלס שדכן, איך בין געווען יארן צוריק דיין שדכן און איך וויל בלייבן שדכן, איך וויל דיין שטוב זאל בלייבן, און נאר דורך זיין בטל ומבוטל צום אייבערשטן קען מען האבן שלום בית.