בעזרת ה' יתברך - יום ג' פרשת בא, ב' שבט, שנת תשפ"ו לפרט קטן
... תחי', קרית ברסלב
איך האב ערהאלטן אייער בריוו.
וואויל איז אייך און וואויל איז אייער חלק אז איר האט זיך געשטארקט און זיך אפגעשוירן, דאס איז אזוי ווי איר האט געברענגט א קרבן פארן אייבערשטן און געמאכט א גרויסע נחת רוח פארן אייבערשטן; ווייל אז מען זעט ארויס די האר איז זייער זייער הארב. דער הייליגער זוהר זאגט (נשא קכה:), א פרוי וואס דעקט אויף אירע האר אין שטוב זיך שיין צו מאכן ברענגט עניות אין שטוב, און זי ברענגט צו אז אירע קינדער זאלן נישט מצליח זיין, און זי איז גורם אז די סמ"ך מ"ם און די חיצונים זאלן זיין אין שטוב, און עס זאל זיין מחלוקת אין שטוב.
דער זוהר זאגט אז דאס איז אפילו מען דעקט אויף די האר נאר אין שטוב, און זיכער אויב מען גייט ארויס פון שטוב מיט האר.
דערפאר זאלט איר וויסן אז איר האט מקדש געווען דעם אייבערשטן אין אייער שטוב און אויף די גאנצע וועלט, און בזכות די הייליגע זאך זאל קומען צו ענק רפואות און ישועות און הצלחה.