בעזרת ה' יתברך - יום ג' פרשת שמיני, כ"ד ניסן, ט' לעומר, שנת תשפ"ה לפרט קטן
לכבוד מיין טייערער זון ... נרו יאיר, קרית ברסלב
בנוגע קומען אויף מירון ל"ג בעומר; איך מיין דו זאלסט בלייבן אין שטוב העלפן דיין ווייב מיט די קליינע קינדערלעך, מילא ראש השנה ווען דער רבי האט געהייסן קומען קיין אומאן אויף ראש השנה דארפן מיר אלע קומען קיין אומאן, מען קען נישט קוקן אויף גארנישט, דער רבי זאגט קיינער טאר נישט פעלן (חיי מוהר"ן, סימן תג), איז ווי קען מען פעלן, אבער יעצט ל"ג בעומר איז נישט קיין עסק צו איבערלאזן די ווייב מיט די קליינע קינדער.
מען קען זיך מקשר זיין צו רבי שמעון פון איבעראל, דורך לערנען דעם הייליגן זוהר; זאלסטו זיך מאכן א קביעות צו לערנען יעדן טאג תיקונים און יעדן שבת זאלסטו לערנען דעם גאנצן פרשת השבוע פונעם זוהר. איידער מען טוט דאס - מיינט מען אז דאס איז אוממעגליך, און אז מען געוואוינט זיך צו שפירט מען א זיסע טעם, ממש מעין עולם הבא.
איך האב געהאט די זכי' צו לערנען יעדן שבת מיטן זיידן, קארלסבורגער רב זכרונו לברכה דעם זוהר פון פרשת השבוע. די סדר איז געווען, זיידי האט געזאגט דעם זוהר און איך האב מיט געזאגט שטילערהייט ווארט ביי ווארט, זיידי האט נישט געטייטשט, נאר געזאגט די ווערטער מיט א חיות און התלהבות, און נאך יעדע שטיקל זיך אנגערופן: "מען דארף נישט פארשטיין, דאס זאגן די ווערטער איז מקדש און מזכך דעם מענטש".
העלף דיין ווייב מיט די קינדער, דאס איז זייער א גרויסע מצוה.
דער אייבערשטער זאל העלפן זאלסט האבן הצלחה אין אלע ענינים.