בעזרת ה' יתברך
יום ב' פרשת אמור, י"ד אייר, פסח שני, שנת תשפ"א לפרט קטן
לכבוד מיין טייערער ... נרו יאיר
איך וויל דיר מחזק זיין זאלסט לערנען יעדן טאג אביסל חומש, אביסל משניות און כאטשיג א בלאט גמרא.
דעם זונטאג נאכט בין איך געווען אין בלומינגראוו פאר א סעודה לכבוד פסח שני און בעיקר פאר א סיום, דער גבאי פון בית המדרש היכל הקודש האט מסיים געווען די צווייטע מאל הונדערט און איין מאל ששה סדרי משנה, דאס איז אינאיינעם צוויי הונדערט און צוויי מאל. איך בין געווארן אזוי פרייליך צו זען די שכל פון אנשי שלומינו; אנשטאט זיין פארנומען מיט הבלים, זענען זיי פארנומען מיט תכלית; מען גרייט זיך אן מיט אסאך תורה, דאס וועט מיט גיין אויף יענע וועלט.
זאלסט זיך באשטומען מיט א שטארקייט צו עפענען יעדן טאג די הייליגע משניות און די הייליגע גמרא, אפילו דו פארשטייסט נישט וואס דו לערנסט - זאלסטו זאגן די ווערטער פון די הייליגע תורה, דאס וועט דיר באגליקן.