בעזרת ה' יתברך
יום ג' פרשת חיי שרה, כ"ב חשון, שנת תש"פ לפרט קטן
לכבוד מיין טייערער ... נרו יאיר.
איך האב זיך זייער געפרייט צו הערן נאך א סיום מסכתא פון דיר, דו האסט מסיים געווען מסכת סוטה. דו לערנסט ש"ס כסדרן על פי סדר דרך הלימוד פון רבי'ן, יעצט זאלסטו גיין ווייטער צו מסכת גיטין, קידושין און אזוי ווייטער.
איך בעט דיר זייער, איך ווייס אז דו ביסט זייער פארנומען, דאך בעט איך דיר זייער, אזוי ווי דער אייבערשטער האט דיר מזכה געווען מיט א ספעציעלע חוש הנגינה, דארפסטו דאס אויסנוצן צו מקרב זיין אידישע קינדער צו די אמונה. מיר וויל יעצט ארויסגעבן נאך א סידי, "טאנץ מיט אמונה - חלק ד'", אבער מיר ווילן עס נישט מאכן אן דיר; ווען מען הערט די פריערדיגע חלקים זעט מען א גרויסע חילוק פון די דריטע חלק וואס דו האסט געמאכט – ביז די ערשטע צוויי חלקים.
בעט איך דיר אויב דו קענסט ארויסכאפן אביסל צייט צו קומען זינגען מיט די בחורים און אינגעלייט; אויך איך בין גרייט צו זינגען מיט דיר ווען דו האסט אביסל צייט. ווייל מיט נגינה קען מען אויסהיילן די בת מלך, אזוי ווי דער רבי האט דערציילט (סיפורי מעשיות, מעשה יג, מז' בעטלערס): "און איך הייל זי".
אלעס איז גרייט, די מוזיק איז אויך גרייט; מען ווארט אז דו זאלסט העלפן מיט דיין חוש הנגינה.
איך ווארט צו הערן אויב דו וועסט העלפן.
דיין ראש ישיבה.