בעזרת ה' יתברך
יום ה' פרשת ראה, כ"ח מנחם-אב, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך בין אזוי פרייליך אז די נייע סידי איז שוין ארויסגעקומען. דאס איז שוין די פערטע "טאנץ מיט אמונה", די ניגונים זענען נישט אבי ניגונים, דאס זענען ניגונים פון התבודדות; בשעת'ן שמועסן מיט'ן אייבערשטן, אינמיטן בענקען צום אייבערשטן - זענען געמאכט געווארן רוב ניגונים.
די נייע סידי "איך בין נישט אליין" האט צען ניגונים, חיזוק אויף אלע נקודות וואס מען לערנט אין היכל הקודש:
ניגון 1) תפילה. דער ניגון דערמאנט אונז מען זאל וויסן אז עס איז דא מיט וועם צו שמועסן, 'דער באשעפער הערט מיך אויס, איך בין נישט אליין, איך האב וואו צו גיין, דער באשעפער הערט מיך שטענדיג אויס'.
ניגון 2) תורה. דער ניגון איז געבויט אויף שיחות הר"ן, סימן עו; דאס גרויסקייט פון לערנען, "אין צריכין בלימוד רק האמירה", דער עיקר איז לערנען, זאגן די ווערטער פון תורה, אפילו אן פארשטיין.
ניגון 3) שלום בית. דער ניגון זאגט אונז וואס איז אן עובד השם; דער וואס העלפט אין שטוב. ווער איז אן ערליכער איד? דער וואס פירט זיך מיט שלום און מיט ליבשאפט אין שטוב.
ניגון 4) אמונה. דער ניגון זאגט אונז וואס מוהרא"ש האט אונז געלערנט, מיר זאלן חזר'ן אמונה, אלעס איז דער אייבערשטער; דאס בארואיגט פון אלע שרעקעדיגע נייעס וכדומה.
ניגון 5) ממלא כל עלמין. דער ניגון ברענגט ארויס דאס שיינקייט פון לעבן מיט'ן אייבערשטן, ווען מען ווייסט אז אלעס איז ממלא כל עלמין וסובב כל עלמין, אין שום מציאות מבלעדיך יתברך כלל, ובכל תנועה ותנועה שם אלופו של עולם. מוהרא"ש זאגט, דער ניגון וועט משיח זינגען מיט די גאנצע וועלט, יעדער וועט וויסן אז אלעס איז נאר אייבערשטער, די גאנצע בריאה איז אייבערשטער.
ניגון 6) תיקון הכללי. דער ניגון שרייט אויס די עצה און תיקון פאר ווער עס איז נעבעך אראפגעפאלן אין פגם הברית, זאגן די צען קאפיטלעך תהילים, קאפיטל טז, לב, מא, מב, נט, עז, צ, קה, קלז, קנ; דאס פאררעכט דעם מענטש, מען ווערט אפגעוואשן פון אלעם שלעכטס, מען ווערט ריין.
ניגון 7) קינדער. דער ניגון זינגען די ערליכע משפחות וואס גייען נאך די תורה, די צדיקים; מען גייט נישט נאך די לינקע גאס פון נישט ברענגען קינדער מיט'ן טענה אז מען קען נישט האבן צייט פאר זיך אויב מען האט א גרויסע משפחה, דער ניגון זינגט: "א מחי' גרויסע משפחה, יעדע קינד ברענגט נאר הצלחה".
ניגון 8) אליינס מיט'ן באשעפער. מענטשן זענען צעבראכן, מען זאגט 'איך בין אליין, איך האב נישט קיינעם', מען פארגעסט אז מען איז נישט אליין, מען איז אליינס מיט'ן אייבערשטן, און אז מען איז אליינס מיט'ן באשעפער, מען שמועסט זיך אויס מיט'ן אייבערשטן אליינס, דעמאלט איז אליין א גוטע זאך. מען קען טראכטן שלעכט 'איך בין אליין', מען קען אבער טראכטן טיפער, 'איך בין אליינס מיט'ן באשעפער', דאס איז שוין א גרויסע מדריגה.
ניגון 9) שכוח אייבערשטער. דער ניגון איז דער מקור הישועות, ווייל ווען מען זינגט און זאגט: "שכוח אייבערשטער פאר מיין לעבן, שכוח אייבערשטער פאר מיין ווייב און קינדער" - דאס עפנט אויף די הימלען און עס גיסט ישועות און רפואות; ווי מער מען זינגט "שכוח אייבערשטער", מען רעכנט אויס נאך און נאך פרטים - ווערט מען נענטער צום אייבערשטן. דער רבי זאגט (לקוטי מוהר"ן חלק ב', סימן ב): "כִּי כָל מַה שֶּׁיּוֹדְעִין וּמַכִּירִין אוֹתוֹ יִתְבָּרַךְ בְּיוֹתֵר", ווי מער מען דאנקט דעם אייבערשטן, "סְמוּכִין אֵלָיו בְּיוֹתֵר", ווערט מען מער און מער נענטער.
ניגון 10) כל הנשמה. דאס איז אויך תודה והודאה, דאנקען און לויבן דעם אייבערשטן אויף יעדע אטעם, אויף יעדע פרט אין לעבן.
די סידי איז הערליך שיין, איך וויל דיר זייער בעטן זאלסט שוין אנהויבן נאך א סידי, איך האף עס וועט נישט נעמען אזוי לאנג. אויך זאלסטו עס מאכן מער פארגעשריטן אז די יוגנט זאל דאס וועלן הערן; אנשטאט הערן ליידיגע ניגונים, פוסטע ניגונים - זאלן זיי ווערן אנגעפילט מיט אמונה, מיט בטחון וכו'.
יעצט פארן מיר שוין צום רבי'ן. ווען דו וועסט זיין ביים ציון זאלסטו דערציילן דעם רבי'ן אז דו מאכסט די שיינע סידי טאנץ מיט אמונה.
די סידי איז זייער א גרויסע הפצה, הלוואי וואלסטו זיך צוגעפלייסט און ארויסגעגעבן יעדע חודש א סידי, צוריק צו ברענגען אלע אידן צום אייבערשטן.
א כתיבה וחתימה טובה.