בעזרת ה' יתברך
יום ד' פרשת תרומה, ה' אדר, שנת תשפ"א לפרט קטן
לכבוד ... נרו יאיר
מזל טוב! דער אייבערשטער זאל העלפן שתזכה להכניסו בבריתו של אברהם אבינו בעתו ובזמנו, ולגדלו לתורה ולחופה ולמעשים טובים.
בנוגע אויב דו זאלסט נעמען פאר א מוהל דיין פעטער; געב אכטונג, נעם נאר א מוהל וואס איז א גרויסער מומחה, מען קען נישט קוקן אויף קיין שום אנדערע זאך.
איך געדענק, איך האב געפרעגט מוהרא"ש ביי איינע פון מיינע זון וועם איך זאל נעמען פאר מוהל, ווער עס איז א צדיק; דער רבי זאגט דאך (ספר המידות אות בנים חלק ב', סימן י): "צָרִיךְ לַחֲזֹר אַחַר מוֹהֵל צַדִּיק וִירֵא שָׁמַיִם", מען זאל זוכן א מוהל א צדיק, אן ערליכער איד; איך האב געבעטן מוהרא"ש זאל מיר זאגן ווער עס איז אן ערליכער מוהל. האט מיר מוהרא"ש געזאגט: "דער עיקר דארף מען קוקן ווער עס איז א גרויסער מומחה", אזוי ווי דער רבי זאגט ווייטער (שם): "כִּי כְּשֶׁהַמּוֹהֵל אֵינוֹ טוֹב", ווייל אויב מען נעמט א נישט גוטער מוהל, "יָכוֹל לִהְיוֹת שֶׁלֹּא יִהְיֶה מוֹלִיד, חַס וְשָׁלוֹם, הַנִּמּוֹל עַל יָדוֹ", קען זיין אז דער קינד וועט נישט קענען האבן קיין קינדער, "גַּם עַל יְדֵי שֶׁהַמּוֹהֵל אֵינוֹ טוֹב, עַל יְדֵי זֶה בָּא הַתִּינוֹק, חַס וְשָׁלוֹם, לִידֵי חֳלִי נוֹפֵל", אויך קען פאסירן אז אויב מען נעמט א נישט גוטער מוהל וועט דער קינד באקומען די קרענק פון חולי נופל רחמנא לצלן.
לאז נישט דיין פעטער זאל זיך לערנען מוהלות אויף דיינע קינדער; געב אכטונג עס זאל נישט פאסירן וואס האט פאסירט ביי משה חינקעס. ווען ער האט מכבד געווען רבי נתן מיט די מצוה פון חיתוך און זיין שוואגער הרב ... - מיט פריעה; דער רב האט נישט געקענט מאכן די פריעה און דער קינד האט געשריגן שרעקליכע קולות. אברהמ'ל פייעס האט דאס נישט געקענט אויסהאלטן, האט ער אים אוועק געשטופט און אליינס געמאכט די פריעה; פון דעמאלט האט זיך אנגעהויבן די מחלוקה אויף רבי נתן, יענער רב איז געווען א חסיד פונעם ... און פון דעמאלט האט זיך אנגעהויבן די ביטערע מחלוקת.
איך ווייס פון אינגעלייט וואס האבן געפרעגט מוהרא"ש אויב זיי זאלן נעמען א געוויסער מוהל וכו' און מוהרא"ש האט זיי געזאגט: "חס ושלום; ער זאל זיך לערנען מוהלות אויף זיינע אייגענע קינדער וכו'".
דער אייבערשטער זאל העלפן זאלסט האבן הצלחה אין אלע ענינים.