בעזרת ה' יתברך - יום ג' פרשת יתרו, ט"ז שבט, שנת תשפ"ו לפרט קטן
... נרו יאיר
דו זאגסט מיר אז דו דארפסט חיזוק אויף נישט שניידן דיין בארד און פיאות ווען אלע ארבעטערס שניידן.
איך בעט דיך זייער מיין ליבער קינד, נאר דאס טו נישט, נאר דאס נישט, בלייב מיט דיין בארד און פיאות, ריר נישט אן די הייליגע בארד, רייס נישט ארויס אפילו איין הייליגע האר, די בארד איז זייער זייער הייליג, יעדע האר איז זייער זייער חשוב, די בארד וועט דיך אפהיטן סיי בזה און סיי אויף יענע וועלט.
זיי שטאלץ מיט דיין בארד און פיאות, קוק אויף די וואס שניידן די בארד ווי נישט קיין קליגע, ווי רחמנות'ער, זאלן זיי זיך שעמען פון דיר אז זיי שניידן, דו שעם זיך נישט פון זיי, דו שעם זיך נאר פונעם אייבערשטן און פון די הייליגע צדיקים.
עס איז דא א דיבור פון הייליגן רבי'ן: "וואס דארף א איד זיך זארגן, אז ער וועט ליגן מיט די פיס צום טיר (דאס מיינט זיין נפטר), מיט די בארד און פיאות".