בעזרת ה' יתברך

יום ב' פרשת מטות-מסעי, כ"ה תמוז, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

הייב אן ש"ס, גיי כסדרן גיי אויף דיין וועג, לויט דיינע כוחות, לויט דיינע פעיגקייטן. קוק נישט אויף קיינעם, מאך נישט נאך קיינעם; ווייל דער יצר הרע זוכט ווי ער קען מחליש דעת זיין און אראפווארפן דעם מענטש, ער וויל אים אוועק נעמען פון די גמרא און מיטן אנדרייען און רייץ פון מענטשן וואס לערנען אסאך און זיי מקנה זיין, פון דעם קען מען זייער צעבראכן ווערן און אלעס אפלאזן.

קוק נישט אויף קיינעם, דו גיי דיין וועג. נעם א גמרא און לערן פאר דיר כסדרן דווקא. דער רבי האט אונז דערציילט די מעשה פונעם חכם און תם (סיפורי מעשיות, מעשה ט), דער תם האט געהאט א גוט לעבן און איז שטענדיג געווען פרייליך. ער איז געווען א שוסטער, ער פלעגט ארבעטן זייער שווער צו פאבריצירן שיך, און ווען ער האט שוין געענדיגט מאכן דעם שיך האט עס געהאט יענץ פנים, עס האט געהאט דריי עקן, אבער ער פלעגט אנכאפן דעם שיך און זיך מחי' זיין דערמיט, ער פלעגט זאגן: "וואס פאר א שיינקייט, וואס פאר א וואוילקייט דאס שיכעלע איז"; "וואס פאר א זיסקייט דאס שיכעלע איז"; "וואס פאר א האניגדיג, וואס פאר א צוקערדיג שיכעלע דאס איז"; זיין ווייב האט יא געהאט חכמות וכו', האט זי זיך זייער געוואונדערט, זי האט אים געפרעגט: "אז עס איז יא אזוי, פארוואס אנדערע שוסטערס נעמען דריי גילדן פאר א פאר שיך און דו נעמסט נאר א האלבן טאלער?" האט איר דער תם געענטפערט: "וואס האט דאס צו טון מיט מיר; דאס איז יענעמ'ס מעשה און דאס איז מיין מעשה, און ווייטער פארוואס דארפן מיר שמועסן פון אנדערע מענטשן; לאמיר מאכן א חשבון וויפיל איך פארדין פון דעם שיך", ער פלעגט צוזאמרעכענען וויפיל ער האט אויסגעגעבן פאר די סחורה און וויפיל עס איז אים אריינגעקומען ריווח, און ער האט געזען אז ער האט מרוויח געווען צען גראשן, האט ער געזאגט פאר זיין ווייב: "וואס זאל מיר באדערן אז איך האב פארדינט עפעס ריווח מיד ליד?"

אז דו וועסט גיין אין א סדר און נישט קוקן אויף קיינעם, נאר לערנען א בלאט נאך א בלאט, וועט נישט נעמען לאנג און דו וועסט ענדיגן ש"ס.

דער אייבערשטער זאל העלפן זאלסט האבן הצלחה אין אלע ענינים.